ಕೇಳ್ರಪ್ಪೋ ಕೇಳಿ,

ಇದು ನಿಜವೆಂದು ನನಗೆ ನಂಬುವುದಕ್ಕೇ ಆಗುತ್ತಿಲ್ಲ. ನಾನು ಬರೆದಿದ್ದನು ನೀವು ನಂಬುವುದು ಬಹಳ ಕಷ್ಟ ಆದರೆ ನಂಬಲೇಬೇಕು. ಅಂಥಾ ಸುದ್ಧಿ ಇದು.

ನಿಮಗೆ ತಿಳಿದಿರಬಹುದು, ಬೆಂಗಳೂರಿನಲ್ಲಿ "ಊರ್ವಶಿ" ಎಂಬ ಸಿನಿಮಾ ಮಂದಿರವಿದೆಯೆಂಬುದು. ಇದು ಜಯಚಾಮರಾಜೇಂದ್ರ ರಸ್ತೆಯಿಂದ, ಕೆಂಗಲ್ ಹನುಮಂತಯ್ಯ ರಸ್ತೆಗೆ (ಅದೇ ಡಬಲ್ ರೋಡು) ಹೋಗುವಾಗ ಲಾಲ್ ಬಾಗ್ ಕೂಡು ರಸ್ತೆಯಲ್ಲಿ ಸಿಗುತ್ತದೆ. ಈ ಸಿನಿಮಾ ಮಂದರಿದ ವೈಶಿಷ್ಟ್ಯವೆಂದರೆ ಅಪ್ಪಿತಪ್ಪಿಯೂ ಕನ್ನಡ ಚಿತ್ರಗಳನ್ನು ಹಾಕುವುದಿಲ್ಲ. ಅಲ್ಲೇನಿದ್ದರೂ ಇತರ ಭಾಷೆಯ ಸಿನಿಮಾಗಳೇ. ಮತ್ತೇನೀಗ ಎಂದೇನಾದರು ನೀವು ಕೇಳಿದರೆ, ಹೇಳುತ್ತೇನೆ ಕೇಳಿ, ನೆನ್ನೆ ಬೆಳಿಗ್ಗೆ ಸುಮಾರು ೮:೩೦ರ ಸುಮಾರಿಗೆ ಆ ಸಿನಿಮಾ ಮಂದಿರದ ಸುತ್ತಾ ಕಾಗದದ ಹಳದಿ ಕೆಂಪು cutouts ಗಳನ್ನು ತೋರಣದಂತೆ ಜೋಡಿಸಲಾಗುತ್ತಿತ್ತು. ನನಗೋ ಆಶ್ಚರ್ಯವೆಂದರೆ ಆಶ್ಚರ್ಯ. ಏನಿದು ಕನ್ನಡದ ಕಂಪು "ಊರ್ವಶಿ"ಯಲ್ಲಿ ಎಂದು ನೋಡಿದರೆ ಮತ್ತೊಂದು ಆಶ್ಚರ್ಯ, ಮುಖ್ಯಬಾಗಿಲಿನ ಬಳಿ ಕನ್ನಡ ಸಿನಿಮಾದ ಬೃಹತ್(relatively) cutout ನೇತಾಡುತ್ತಿತ್ತು. ನನಗೋ ಸಂತೋಷವೋ ಸಂತೋಷ. ಇದೇನಿದು "ಊರ್ವಶಿ" ಮಂದಿರದಲ್ಲಿ ಕನ್ನಡವೇ ಎಂದು. ಸರಿ ಯಾವ ಸಿನಿಮಾ ಎಂದು ಕತ್ತೆತ್ತಿ ನೋಡಿದೆ. ತಲೆಬುಡ ಅರ್ಥವಾಗಲಿಲ್ಲ. ಸಿನಿಮಾದ ಹೆಸರು ಕೇಳಿದರೆ ನೀವೂ ಸಹ ತಲೆ ಕೆರೆದುಕೊಳ್ಳುವಿರಿ. ಸಿನಿಮಾದ ಹೆಸರು "ಸೈಯನೈಡ್". ಯಾರು ಸೇವಿಸಲಿದ್ದಾರೋ ಗೊತ್ತಿಲ್ಲ. ಆದರೆ ಬಡಪಾಯಿ ಪ್ರೇಕ್ಷಕನಿಗೆ ತಿನಿಸದಿದ್ದರೆ ಅದು ಪುಣ್ಯ.

ವಿಶೇಷ ಸೂಚನೆ : ಖಂಡಿತ ಇದು ಸಿನಿಮಾದ ಪ್ರಚಾರವಲ್ಲ. ಸಿನಿಮಾ ನೋಡುವುದು ಬಿಡುವುದು ಪೂರ್ತಿಯಾಗಿ ನಿಮ್ಮ ನಿಮ್ಮ ಇಷ್ಟಕ್ಕೆ ಬಿಟ್ಟದ್ದು. ಆದರೆ ಕನ್ನಡ ಈ ರೀತಿಯಲ್ಲಾದರು ಕನ್ನಡೇತರ ಮಂದರಿದಲ್ಲಿ ನಲಿದಾಡುತ್ತಿದೆ ಎಂದು ಹೇಳುವುದಷ್ಟೇ ನನ್ನ ಉದ್ಧೇಶ.

ಸವಿಯೊದಗೆಗಳೊಂದಿಗೆ,