ಹಾಗೆ ನೋಡಿದರೆ ಎಷ್ಟೋ ಕನಸುಗಳು ಬರುತ್ತಿರುತ್ತವೆ. ಆದರೆ ಇಂದು (ಅಂದ ಹಾಗೆ ನೆನ್ನೆ ಎನ್ನಬೇಕೆ) ಕಂಡ ಕನಸಿನ ಬಗ್ಗೆ ಹೇಳಬೇಕೆನಿಸಿತು.

ನಾನು ನನ್ನ ಹೊಂಡಾ ಆಕ್ಟಿವಾ ದಲ್ಲಿ ಹೊರಟೆ, ಅದನ್ನು ಡಕೋಟ ಎನ್ನಬೇಕೆ ತಿಳಿಯುತ್ತಿಲ್ಲ ಆದರೆ ನನ್ನ ತಮ್ಮನ ಪ್ರಕಾರ ಅದು ಡಕೋಟ. ನನ್ನ ತಮ್ಮ ಯಾವಾಗಲೂ ಅಷ್ಟೇ ಸ್ವಲ್ಪ ಜೋಷ್ ಜಾಸ್ತಿ. ಸರಿ ಹೊರಟೆ, ಎಲ್ಲಿಗೆ ಎಂದು ಕನಸಿನಲ್ಲಿ ತಿಳಿಯಲಿಲ್ಲ. ಹಾಗೆಯೇ, ಗಮನಿಸುತ್ತಿದ್ದೆ, ನನ್ನ ತಮ್ಮ ಎಲ್ಲಿಂದಲೋ ಸಖತ್ತಾಗಿರೋ ಆಟೋ ತಂದ. ಇದೆಂಥಹ ಹುಚ್ಚು ಎಂದುಕೊಂಡೆ. ನೋಡ ನೋಡುತ್ತಿದ್ದಂತೆಯೆ ಆಕ್ಟಿವಾಗಿಂತ ವೇಗವಾಗಿ ಗಾಡಿಬಿಡಲಾರಂಭಿಸಿದ್ದ. ಈಗ ತಿಳಿಯಿತು ಆಟೋದಲ್ಲೇ ನಿನ್ನ ಆಕ್ಟಿವಾ ವೇಗವನ್ನು ಮೀರಿಸುತ್ತೀನಾದರೆ, ಇನ್ನು ಬೈಕ್ ಕೊಡಿಸಿದರೆ....ಹೇಗೆಂದು ಹೇಳಬಹುದು ಎಂದು. ಹಾಗಾಗಲಿಲ್ಲ. ಬದಲಾಗಿ, ಅವ ಆಟೋವನ್ನ ಅದ್ಯಾವುದೋ ಗೇಟ್ ಒಳಗೆ ನುಗ್ಗಿಸಿದ. ಈ ಗೇಟೇನು ಅಂಥಾ ಭವ್ಯವಾಗೇನಿರಲಿಲ್ಲ. ಆದರೂ ಇವ ಏಕೆ ಹೋದ ಎಂದು ತಿಳಿಯುವ ಕುತೂಹಲದಿಂದ ಹೋದೆ. ನೋಡಿದರೆ ಅಲ್ಲೊಂದು ಅಪರೂಪವಾದ ಜಿಂಕೆ ಆಕಡೆ ಮುಖ ಮಾಡಿ ಮಲಗಿದೆ. ಅದರ ಕಾಲುಗಳು, ಪಟ್ಟೆಗಳು ಕಾಣುತ್ತಿವೆ, ಆದರೆ ಮುಖ ಆಕಡೆ ತಿರುಗಿಸಿರುವ ಕಾರಣ ಮುಖ ಮಾತ್ರ ಕಾಣುತ್ತಿಲ್ಲ. ನನ್ನ ತಮ್ಮನನ್ನು ಇಲ್ಲಿಗೇಕೆ ಬಂದೆಯೆಂದು ಗದರಿಸಿ, ಪರೀಕ್ಷೆಗೆ ಓದಿಕೋ ಎಂದು ಬೈದು ಮನೆಗಟ್ಟಿದೆ. ಅವನನ್ನು ಪರೀಕ್ಷೆಗೆ ಓದಕ್ಕಾಗಿ ಮನೆಗೆ ಕಳುಹಿಸಿದ್ದು ಕೇವಲ ನೆಪಮಾತ್ರಕ್ಕೆ. ಆ ಮನಮೋಹಕ ಜಿಂಕೆಯ ಮುಖ ಒಬ್ಬನೆ ನೋಡುವ ಕುತೂಹಲ, ಸರಿ ಅವನು ಸಪ್ಪೆ ಮೋರೆ ಹಾಕಿಕೊಂಡು ಮನೆಗೆ ಹೊರಟ. ನಾನೇ ಈ ಜಿಂಕೆಯ ಮುಖವಿರುವ ದಿಕ್ಕಿಗೆ ಹೋಗುವ ಎಂದರೆ, ಜಾಗವಿಲ್ಲ, ಜಿಂಕೆಯೇ ತಿರುಗಬೇಕು. ನಾನು ಒಂದು ಕ್ಷಣವೂ ತಡಮಾಡಲ್ಲಿಲ್ಲ. ಸಣ್ಣ ಕಡ್ಡಿಯಿಂದ ಜಿಂಕೆಗೆ ಸವರಿದೆ, ಕಚಗುಳಿ ಇಡುವ ಹಾಗೆ.
ಗರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್ರ್, ಸಿಂಹ ಗರ್ಜನೆ, ಒಂದೆ ಸಲಿಗೆ ಓಟ ಕಿತ್ತೆ. ಈಗ ಪೊದೆಗಳ ನಡುವೆ ಅವಿತು ಕುಳಿತೆ. ಜಿಂಕೆ ನನ್ನನ್ನು ಅಟ್ಟಿಸಿಕೊಂಡು ಬರುವ ಹಾಗೆ ಕಾಣಿತು. ಈ ನೆಪದಲ್ಲಾದರು ಜಿಂಕೆಯ ಮುಖವನ್ನ ನೋಡುವ ಎಂದು ಇಣುಕಿದೆ. ಯಪ್ಪಾ, ಅದೊಂದು ಭಯಂಕರ ದೃಶ್ಯ. ಸಿಂಹ ಬರುತ್ತಿದೆ ನನ್ನೆಡೆ, ಜೂಪಾದ ಹಲ್ಲನು ತೋರುತ್ತಾ, ನನಗೆ ಹಿಂದೆ ಜಿಂಕೆಯನ್ನು ನೋಡಿದ ಸ್ಪಷ್ಟ ನೆನಪು. ನನ್ನ ಕಣ್ಣಗಳನ್ನೆ ನಂಬದಾದೆ. ಈಗ್ಗೆ ಕೆಲವು ದಿನಗಳ ಹಿಂದೆ, ನನ್ನ ಒಬ್ಬ ಸ್ನೇಹಿತ ಒಂದು ಚಿತ್ರ ಕಳುಹಿಸಿದ್ದ, ಅದರಲ್ಲಿ ನಾಯಿಗೆ, ಗರುಡದ ಮುಖವಿತ್ತು, ಅದೊಂದು ಚಿತ್ರ ಕಲಾವಿದನ ಕಲಾಕೌಶಲ್ಯ ಎಂದು ಸುಮ್ಮನಾಗಿದ್ದೆ. ಹಾಗೆಯೆ, ಬೆಳಗ್ಗೆ ಸುಧಾ ಓದುವಾಗ, ಸಿಂಹುಲಿಯ ಚಿತ್ರ ನೋಡಿದ್ದೆ, ಸಿಂಹ ಮತ್ತು ಹುಲಿಯ ಸಮಾಗಮದಿಂದ ಹುಟ್ಟಿದ ಪ್ರಾಣಿ, ಸಿಂಹುಲಿ, ಅದರ ಮುಖ ಸಿಂಹದ್ದು ಆದರೆ ದೇಹ ಹುಲಿಯದ್ದು. ಒಂದು ಕ್ಷಣ ಹೆದರಿಕೆಯಾಗಿಯಾಯಿತು. ನನ್ನ ದೃಷ್ಟಿ ಈಗ ನನ್ನೆಡೆ ಧಾವಿಸುತ್ತಿರುವ ಸಿಂಹದ ದೇಹದ ಮೇಲೆ ಹರಿಯಿತು. ಹೌದು ನನ್ನ ಊಹೆ ನಿಜವಾಯಿತು. ಅದೊಂದು ಸಿಂಕೆ. ಭಯ ಮತ್ತಷ್ಟು ಹೆಚ್ಚಾಯಿತು. ನೋಡನೋಡುತ್ತಿದ್ದಂತೆಯೆ ಸಿಂಕೆ ನಿಷ್ಪಾಪಿ ಯುವಕನಾದ ನನ್ನನ್ನು ತಿನ್ನಲು ಬಾಯಿ ತೆರೆಯಿತು. ತಕ್ಷಣ ಕಣ್ಣು ಬಿಟ್ಟೆ, ಮೈ ಬೆಚ್ಚಗಾಗಿತ್ತು ಬೆವರಿತ್ತು, ಸದ್ಯ ಬದುಕಿದೆಯಾ ಬಡಜೀವವೇ ಎಂದು ಹೇಳುತ್ತಾ ಮತ್ತೆ ಕಣ್ಣು ಮುಚ್ಚಿ ನಿದ್ರಿಸಿದೆ. ಆನಂತರ ಆ ಸಿಂಕೆಯು ಕನಸಿನಲ್ಲಿ ಕಾಣಿಸಲಿಲ್ಲ.

ಇದನ್ನು ಗಮನಿಸಿ, ನಮ್ಮ ಸುತ್ತಮುತ್ತಲಿನ ಆಗು ಹೋಗುಗಳು ಹೇಗೆ, ಎಷ್ಟೊಂದು ಪರಿಣಾಮ ಬೀರುತ್ತದೆ ಎಂದು ಅರ್ಥವಾಗುತ್ತದೆ. ಬೆಳಗ್ಗೆ ಓದಿದ ಲೇಖನ ಅದೂ ನಾನು ಸುಮ್ಮನೆ ತಿರುವಿ ಹಾಕಿದ ಪುಟ ಹೀಗೆ ನಿದ್ರೆಯಲ್ಲಿ ತೊಂದರೆ ಕೊಡುತ್ತೆದೆ ಎಂದರೆ ಏನು. ಈ ಮನಸ್ಸು ನಿಜಕ್ಕೂ ತುಂಬಾ ನಿಗೂಢ.
ಮತ್ತೊಂದು ವಿಷಯ, ಕನಸಿನಲ್ಲಿದ್ದಾಗ ಧುತ್ತನೆ ಎಚ್ಚರವಾಗುವುದು.
ನನ್ನ ಪ್ರಕಾರ, ಯಾವುದು ನಮ್ಮ ಅನುಭವಕ್ಕೆ ಬಂದಿರುವುದಿಲ್ಲವೋ ಅಂತಹ ಸನ್ನಿವೇಶ ಕನಸಿನಲ್ಲಿ ಬಂದರೆ ನಮಗೆ ತಕ್ಷಣ ಎಚ್ಚರವಾಗುತ್ತದೆ.
ಉದಾ: ನನ್ನನ್ನೇ ಯಾರೋ ತಿನ್ನುವುದು. ನಾನು ಜೀವಂತವಿರುವ ತನಕ, ಅಥವಾ ನನ್ನ ಜ್ಞಾನೇಂದ್ರಿಯಗಳು ಸರಿಯಾಗಿ ಕೆಲಸ ಮಾಡುವ ತನಕ ಇದು ನಡೆಯದ ಮಾತು. ಇಂತಹ ಘಟನೆ ನನ್ನ ಅನುಭವಕ್ಕೆ ಬರಲು ಸಾಧ್ಯವೇ ಇಲ್ಲ.
ಹಿಂದೆ ಹೀಗೆಯೆ ನಾನು ಒಂದು ಎತ್ತರದ ಬೆಟ್ಟದಿಂದ ಜಿಗಿದಿದ್ದೆ, ಆಗಲೂ ತಕ್ಷಣ ಎಚ್ಚರವಾಯಿತು.

ನಿಮಗೂ ಇಂತಹ ಕನಸು ಬಿದ್ದಿವೆಯೇ? ಬರೆದು ತಿಳಿಸಿ.