ಸದರಿ ಬರಹ, ಕನ್ನಡದಲ್ಲಿ ವಿಜ್ಞಾನದ ವಿಷಯಗಳನ್ನು ಪಾಠ ಮಾಡುವವರಿಗೆ, ಕನ್ನಡದ ವೈಜ್ಞಾನಿಕ ಬರಹಗಾರರಿಗೆ, ಕನ್ನಡ ಸಾಹಿತ್ಯದ ಮೇಷ್ಟರುಗಳಿಗೆ ಮತ್ತು ಎಲ್ಲಕ್ಕಿಂತ ಹೆಚ್ಚಾಗಿ ಗಿಡ, ಮರಗಳನ್ನು ಇಷ್ಟಪಡುವವರಿಗೆ ಮೆಚ್ಚುಗೆಯಾಗಬಹುದು. ಸರ್ವಜ್ಞನ ವಚನಗಳ ಮೂಲಕ ನಾವು ಹೇಗೆ ಹುರುಪನ್ನು(Motivation) ಪಡೆದು ಕನ್ನಡದಲ್ಲಿ ವೈಜ್ಞಾನಿಕ ಬರಹಗಳನ್ನು ರೂಪಿಸಬಹುದು ಎಂಬುದನ್ನು ನಿರೂಪಿಸುತ್ತದೆ ಕೂರ್ ಬೇಕೇ ಕೂರಿನ ಕೊನೆಯ ಕಂತು, "ಸರ್ವಜ್ಞನ ವಚನಗಳಲ್ಲಿ ಕನ್ನಡದ ಅಪ್ಲೈಡ್ ಟರ್ಮಿನಾಲಜೀಸ್".

ಪೀಠಿಕೆ
ಹುಟ್ಟು ಈ ಜಗತ್ತಿನ ಒಂದು ಅತ್ಯಂತ ಸಂಕೀರ್ಣವಾದ ಚಟುವಟಿಕೆ. ಯಾವುದೇ ಜೀವಿಯಿರಲಿ, ಅದರ ಹುಟ್ಟು ನಿಜಕ್ಕೂ ವಿಸ್ಮಯ. ಸದರಿ ಬರಹದಲ್ಲಿ ನಾವು “ಹೂಗಿಡಗಳು ಹೇಗೆ ಪೆರ್ಚುತ್ತವೆ (ಸಂತಾನೋತ್ಪತ್ತಿ ಮಾಡುತ್ತವೆ)?”, “ಈ ಹೂಗಿಡಗಳ ಪೆರ್ಚಿಗೂ ಕನ್ನಡದ ಕಾನ್ಸೆಪ್ಚುಯಲೈಸೇಶನ್ನಿಗೂ ಏನು ಸಂಬಂಧ?”..ಹೀಗೆ ಹೂಗಿಡಗಳಿಗೆ ನಂಟಾದ ಒಂದು ವಿಷಯವನ್ನು ಚರ್ಚಿಸೋಣ. ಹಾಂ!!!!ಹೂವುಗಳಿಲ್ಲದ ಗಿಡಗಳೂ ಇವೆ. ಆದರೆ ಪ್ರಸ್ತುತ ಬರಹ ಕೇವಲ ಹೂಗಿಡಗಳಿಗೆ ನಂಟಾದದ್ದು.

ಹೂಗಿಡಗಳ ಪೆರ್ಚು(ಸಂತಾನೋತ್ಪತ್ತಿ)

ಚಿಕ್ಕವರಿದ್ದಾಗ ಬಹುಶಃ ನಾವೆಲ್ಲರೂ ಇದನ್ನು ಓದಿರುತ್ತೇವೆ, Pollination. ಬಹುತೇಕ ಗಿಡಗಳು ತಮ್ಮ ಸಂಕುಲವನ್ನು ಬಾಳಿಸಿಕೊಂಡು ಹೋಗುವುದು ಈ ಹೂವುಗಳಿಂದ. ಹೂವುಗಳು ಯಾವ ಜೀವಿಯನ್ನು ತಾನೇ ಆಕರ್ಷಿಸಿಲ್ಲ. ಚಿಕ್ಕಮಕ್ಕಳು, ಮದುಮಕ್ಕಳಿನಿಂದ ಹಿಡಿದು ಮುದುಕರಿಗೂ ಇಷ್ಟವಾಗುವಂತಹ ಹೂವುಗಳಿವೆ. ಕಾರಣ (ಪರಿಮಳ, ಆಕಾರ, ರಚನೆ, ರುಚಿ, ರಸ, ಅಂದ, ಬಣ್ಣ ಹೀಗೆ) ಎನೇ ಇರಬಹುದು ಹೂವುಗಳ ಸೆಳೆತದಿಂದ ತಪ್ಪಿಸಿಕೊಳ್ಳುವುದು ಅಷ್ಟು ಸುಲಭವಲ್ಲ. ಹೂಗಿಡಗಳ ಸಂಕುಲ ಹೇಗೆ ಪೆರ್ಚುತ್ತದೆ. ಗಿಡಸಂಕುಲದ ಪೆರ್ಚಿಗೆ(ಸಂತೋನೋತ್ಪತ್ತಿಗೆ) ಪಾಲಿನೇಶನ್ (ಅಥವಾ ಸಂಸ್ಕೃತದಲ್ಲಿ ಪರಾಗಸ್ಪರ್ಷ) ಎನ್ನುತ್ತಾರೆ. Pollination ಎಂಬ ಕಾನ್ಸೆಪ್ಟನ್ನು ಕನ್ನಡದಲ್ಲಿ ಹೇಗೆ ಅರಗಿಸಿಕೊಳ್ಳಬಹುದು. Pollination, Pollen grains, Pollenಆಹಾ!! ಸರಿ ಈ ಕೂರ್ ಎಂದರೇನು ಅಂತ ಗಮನಿಸೋಣ. ಭಾಗ ೧, ಭಾಗ ೨, ಭಾಗ ೩ ರಲ್ಲಿ ನಾನು ಈಗಾಗಲೇ ಕೂರ್ ಪದದ ಬಗ್ಗೆ ಸಾಕಷ್ಟು ವಿವರಿಸಿರುವ ಹಾಗೆ. ಈ ಕೂರ್ ಗಳನ್ನು ಪರಸ್ಪರ ಪ್ರೀತಿ, ನಲ್ಮೆ, ಸ್ನೇಹವನ್ನು ಬೆಸೆಯುವ ಕಣಗಳು ಎಂಬುದಾಗಿ ತಿಳಿದುಕೊಳ್ಳಬಹುದಾದರೆ, ಕೂರುಗಳನ್ನು ಕಣಗಳ ರೀತಿ Pollen ಎಂಬುದಾಗಿ ಬಳಸಬಹುದು. ಎಲ್ಲಿ ಸ್ನೇಹದ ಬೆಸುಗೆ ಸಾಧ್ಯವೋ ಅಲ್ಲಿ ಸೆಳೆತ ಇದ್ದೇ ಇರುತ್ತದೆ. ನನಗನ್ನಿಸುವ ಹಾಗೆ ಹೇಳುವುದಾದರೆ, ಕೂರ್ ಎಂಬ ಕನ್ನಡದ ಪದವನ್ನು Pollen (ಸಂಸ್ಕೃತದಲ್ಲಿ-ಪುಷ್ಟಧೂಳಿ) ಎಂಬುದಾಗಿ ಬಳಸಬಹುದು. ನಾವುಗಳು ಕೂರ್ ಎಂಬುದನ್ನು Pollen ಎಂಬುದಕ್ಕೆ ಬಳಸಬಹುದಾದರೆ, Pollen grains (ಕೂರುಕಣ), Pollination(ಕೂರುಪರ್ವ) ಎಂಬುದಾಗಿ ಬಳಸುತ್ತಾ ನಮ್ಮ ಕನ್ನಡವನ್ನು ಗಟ್ಟಿಗೊಳಿಸಿಕೊಳ್ಳಬಹುದು.

ಒಂದೇ ಮಾತು (To Put it in a Nutshell)

“ಹೂವುಗಳ ಕೂರ್ ಕಣಗಳು ಒಂದರ ಒಳಗೊಂದು ಕೂತು, ಕಲೆತು, ಕೂಡಿ ಆಯಾ ಹೂಗಿಡಗಳ ಪೆರ್ಚಿಗೆ ಕಾರಣವಾಗುವ ಕ್ರಿಯೆಗೆ ಕೂರುಪರ್ವ ಎಂದು ಹೆಸರು”