ಈ ಬಾರಿ ರಣಜಿ ಋತು ಪ್ರಾರಂಭವಾಗುವ ಹೊತ್ತಿನಲ್ಲಿಯೇ, ಕಹಿಯಾದ ಸುದ್ಧಯೊಂದು ಹೊರಬಿದ್ದಿತ್ತು. ವಿಜಯ್ ಭಾರದ್ವಾಜ್ ರವರು ಜುಣುಗಿದ್ದರು(ಜುನುಗಿದ್ದರು). ರಣಜಿಯನ್ನು ಆಡಲಾಗದಿದ್ದದ್ದಕ್ಕೆ ಬೇಸರವೇನೋ ಇದ್ದೇ ಇರುತ್ತದೆ, ಆದರೆ ನಾದಲೀಲೆ ಕಾರ್ಯಕ್ರಮದಲ್ಲಿ ಮತ್ತೆ ನಗುಮೊಗವಿತ್ತು. ನಾನು ಸಮಾಧಾನದಿಂದ ಹಿಂದಿರುಗಿದ್ದೆ.

ಅದೂ ಅಲ್ಲದೆ, ಮೊದಲ ಪಂದ್ಯದಲ್ಲೇ ನಮ್ಮವರು, ಮುಖಭಂಗ ಅನುಭವಿಸಿದ್ದರು. ನಂತರ ಅದೇನು ಬಂತೋ, ಎರಡು ಪಂದ್ಯಗಳನ್ನು ನಮ್ಮವರು ಗೆದ್ದರು. ಹಾ! ಒಂದು ಮಾತು. ನೋಡಿ, ಭಾರತ ತಂಡಕ್ಕೆ ಅನೇಕ ವಿಕೇಟ್ ಕೀಪರುಗಳು ಬಂದು ಹೋದರು. ಆದರೆ ಕರ್ನಾಟಕದಲ್ಲಿ ತಿಲಕ್ ನಾಯ್ಡು ಎಷ್ಟು ವರ್ಷಗಳಿಂದ ವಿಕೇಟ್ ಕೀಪರ್ ಆಗಿ ಉಳಿದಿದ್ದಾರೆ ಗೊತ್ತೆ. ದಕ್ಷಿಣ ಆಫ್ರಿಕಾದ ವಿರುದ್ಧದ ಅಭ್ಯಾಸ ಪಂದ್ಯವೊಂದನ್ನು ಗೆದ್ದ ತಂಡದಲ್ಲಿ ತಿಲಕ್ ನಾಯ್ಡು ಇದ್ದರು ಅಂತ ಕಾಣತ್ತೆ. ಒಟ್ಟಿನಲ್ಲಿ ನಾನು ಆಸಕ್ತಿಯಿಂದ ರಣಜಿ ಪಂದ್ಯಗಳನ್ನು ಓದುತ್ತಾ(ಹೌದು ಓದುತ್ತಾ, ಏಕೆಂದರೆ, ಯಾವ ಟಿ.ವಿ. ವಾಹಿನಿಯವರೂ ನಮ್ಮ ರಣಜಿ ತಂಡದ ಬಗ್ಗೆ ಮಾತನಾಡುವುದಿಲ್ಲ. ಬಹುಶಃ ರಣಜಿಯ ಬಗ್ಗೆ ಮಾತನಾಡುವುದು ಅವಮಾನ ಅಂತ ಅವು ತಿಳಿದಿರಬಹುದು), ಇರಲಿ.

ಸರಿ, ಮೊದಲ ಪಂದ್ಯದಲ್ಲಿ ಮುಖಭಂಗ ಅನುಭವಿಸಿದ ಮೇಲೆ, ಎರಡು ಬರೋಬ್ಬರಿ ಗೆಲುವನ್ನು ದಾಖಲಿಸಿದ್ದಾರೆ ನಮ್ಮವರು. ಈ ದಿನ ಮುಕ್ತಾಯವಾದ ನಾಲ್ಕನೇ ಪಂದ್ಯದಲ್ಲಿ ಮೊದಲ ಇನ್ನಿಂಗ್ಸ್ ಮುನ್ನಡೆ ಪಡೆದು ಎರಡು ಅಂಕಗಳನ್ನು ಪಡೆದು ಅಂಕಪಟ್ಟಿಯಲ್ಲಿ ಎಲ್ಲರಿಗಿಂತ ಮುಂದಿದ್ದಾರೆ.

ಹೀಗೆಯೇ ಜಯಭೇರಿ ಬಾರಿಸುತ್ತಾ, ಈ ಬಾರಿ, ರಣಜಿ ಟ್ರೋಫಿಯನ್ನು ಕರ್ನಾಟಕಕ್ಕೆ ದೊರಕಿಸಿಕೊಡಲಿ ಎಂದು ಹಾರೈಸೋಣ.

ಅಂದ ಹಾಗೆ, ಜುಣುಗು-ಜುನುಗು ಎಂದರೆ ನಿವೃತ್ತಿ(ಸಂಸ್ಕೃತದ್ದು) ಎಂದು ಅರ್ಥ. ಕನ್ನಡದಲ್ಲಿ ಜಿನುಗು ಪದವಿದೆಯಲ್ಲವೇ, ಹಾಗೆಯೇ ಜುಣುಗು(ಜುನುಗು).

ನೋಡಿ, ಕನ್ನಡ ಎಷ್ಟು ಸರಳ ಅಲ್ಲವೇ ?