ತೊದಲ್ನುಡಿ, ಈ ಬ್ಲಾಗಲ್ಲಿ ಸ್ವಲ್ಪ ಸಸ್ಪೆನ್ಸ್ ಇದೆ. ನೆನಪಿರಲಿ ಚಿತ್ರದ "ಕೂರಕ್ಕುಕ್ಕಳ್ಳಿ ಕೆರೆ" ಹಾಡನ್ನು ಕೇಳುತ್ತಾ ಈ ಬ್ಲಾಗನ್ನೋದಿ. ಸೀರಿಯಸ್ಲಿ ಗೆಳೆಯರೆ, ಅಲುಮಿನಿಯಮ್ ತಡಕುತ್ತಿದ್ದವನಿಗೆ ಒಮ್ಮೆಗೇ ಮಣಗಟ್ಟಲೆ ವಜ್ರ ಸಿಕ್ಕಿಬಿಟ್ಟರೆ ಏನಾಗುತ್ತೋ ಆ ಅನುಭವವಾಗ್ತಾ ಇದೆ ನನಗೆ. ಸಂತೋಷದ ಅಲೆಯಲ್ಲಿ ತೇಲುತ್ತಾ, ತೇಲುತ್ತಾ ಮತ್ತೂ ತೇಲುತ್ತಾ ಆಕಾಶದಲ್ಲಿ ಹಾರಾಡುವ ಹೀಲಿಯಮ್ ಬಲೂನಿನಂತಾಗಿದೆ ನನ್ನ ಮನಸ್ಸು. ನನ್ನ ಅನಿಸಿಕೆಯಲ್ಲಿ ಈ ಬ್ಲಾಗ್ ಇವರುಗಳಿಗೆ ಇಷ್ಟವಾಗಬಹುದು.

೧. ತುಂಬಾ ಮುಖ್ಯವಾಗಿ "LOVE" ಮಾಡುತ್ತಿರುವವರಿಗೆ ಅಂದರೆ ಕನ್ನಡದ ಗರ್ಲ್‌ಫ್ರೆಂಡ್ಸ್/ಬಾಯ್‌ಫ್ರೆಂಡ್ಸ್ ಇರುವವರಿಗೆ
೨. ಅಚ್ಚಗನ್ನಡದಲ್ಲಿ ಪ್ರೇಮವನ್ನು ತೋಡಿಕೊಳ್ಳಲು ತಿಣುಕಾಡುತ್ತಿರುವವರಿಗೆ.
೩. ವಿಜ್ಞಾನಕ್ಕೆ ಸಂಬಂಧಪಟ್ಟ ಅಚ್ಚಗನ್ನಡ ಪದಗಳ ಹುಡುಕಾಟದಲ್ಲಿರುವವರಿಗೆ.
೪. ಸರ್ವಜ್ಞನ ವಚನಗಳನ್ನು ಮೆಚ್ಚುವವರಿಗೆ.
೫. ಕಾವ್ಯ-ಕಲಾ ರಸಿಕರಿಗೆ...ಮರೆತಿಲ್ಲ ಸ್ವಾಮಿ ನಿಮಗೂ ಕೂಡ.

ಎಚ್ಚರಿಕೆ : ಈ ಬ್ಲಾಗಿನಲ್ಲಿ ಒಂದಕ್ಕೊಂದು ಸಂಬಂಧವೇ ಇರದ ಏನೇನೋ ವಿಷಯಗಳೂ ಅಲ್ಲಲ್ಲಿ ತೂರಿರುವಂತೆ ಭಾಸವಾಗಬಹುದು.

ಸರ್ವಜ್ಞ ಮತ್ತು ಹಂಸಲೇಖ

ಕಳೆದ ವಾರ ನಾನು ನನ್ನ ಜೀಮೇಯ್ಲ್ ಸ್ಟೇಟಸ್ಸಿನಲ್ಲಿ ' "ಕೂರ್" ಬೇಕೆ "ಕೂರ್" ' ಎಂದು ಹಾಕಿಕೊಂಡಿದ್ದೆ. ಹಾಗೆಂದರೇನು ಅಂತ ಪಿಂಗ್ ಮಾಡಿದ ಕೆಲವರನ್ನಂತೂ ಸಿಕ್ಕಾಪಟ್ಟೆ ಗೋಳುಹೊಯ್ದುಕೊಂಡುಬಿಟ್ಟಿದ್ದೇನೆ ನನ್ನಿಂದ ತೊಂದರೆಗೊಳಗಾದವರಲ್ಲಿ ನಲ್ಮೆಯ ಕ್ಷಮೆ ಕೋರುತ್ತಾ.....

ಕಳೆದ ವಾರ ಒಂದು ಸರ್ವಜ್ಞನ ವಚನ ಓದಿದೆ. ಹೀಗಿದೆ ಅದು.
ಮಲ್ಲಿಗೆಯ ಹೂ ಲೇಸು, ಬಲ್ಲವರ ಕೆಳೆ ಲೇಸು,
ನಿಲ್ಲದೇ ಕರೆವ ಹಸುಲೇಸು, ಕೂರ್ಪವಳ
ಸೊಲ್ಲು ಲೇಸೆಂದ ಸರ್ವಜ್ಞ

ಇಲ್ಲಿ ಕಷ್ಟವೆನಿಸುವ ಪದ ಎಂದರೆ "ಕೂರ್ಪವಳ ಸೊಲ್ಲು" - ಈ ಕೂರ್ಪವಳ ಎನ್ನುವದರ ಬಗ್ಗೆ ಸಿಕ್ಕಾಪಟ್ಟೆ ತಲೆಕೆಡಿಸಿಕೊಂಡು ಅಲೆದಾಡುತ್ತಿದ್ದ ನನಗೆ ಕನ್ನಡದ ಮತ್ತೊಂದು ಅನರ್ಘ್ಯ ರತ್ನವೊಂದು (೧) ಸಿಕ್ಕಿತು. ಹಾಗೆಯೇ ಈ ರತ್ನದಿಂದ ಎಷ್ಟೆಲ್ಲ ಆಭರಣಗಳು ಸಾಣೆಹಿಡಿಯಲ್ಪಟ್ಟಿದೆಯೋ ತಿಳಿಯದು. ಕೆಲವೇ ಕೆಲವು ಮಣಿಗಳ ಪ್ರಸ್ತಾಪ ಇಲ್ಲಿ ಮಾಡುತ್ತೇನೆ.

ಕೂರ್ಪವಳು = ಕೂರ್ತಳು, ಪ್ರೀತಿಯವಳು, ನಲ್ಲೆ, ಪ್ರಿಯೆ.
ಕೂರ್ಪವನು = ಪ್ರೀತಿಸುವವನು, ವಲ್ಲಭ, ನಲ್ಲ, ದಯಿತ, ಪ್ರಿಯ, ಮಾರ.

ಇಷ್ಟೇ ಆಗಿದ್ದರೆ ಪರವಾಗಿಲ್ಲ, ಆದರೆ ಬುದ್ಧಿ ಕೇಳಬೇಕಲ್ಲ. ಸರಿ ಕೂರ್ಪವನು, ಕೂರ್ಪವಳು ಎಂಬ ಪದಗಳಿವೆ ಎಂದ ಮೇಲೆ ಕೂರ್ಪ ಎಂಬ ನಾಮಪದವೂ ಇರಬೇಕಲ್ಲವೇ, ನೋಡಿದರೆ ಆಶ್ಚರ್ಯ!!!!
ಕೂರ್ಪ = ನಲ್ಮೆ, ಪ್ರೇಮ, ಪ್ರಿಯ, ಪ್ರೀತಿಯವನು(ಳು), ಹುಬ್ಬುಗಳ ನಡುವಿನ ಸ್ಥಳ.
ಸರಿ ಕೂರ್ಪ ಎಂಬ ನಾಮಪದ ಇದ ಎಂದ ಮೇಲೆ ಅದರ ಮೂಲಪದವೂ ಇರಬೇಕಲ್ಲವೇ. ಯೋಚಿಸಿದಾಗ ಹೊಳೆದದ್ದು, "ಕೂರ್". ಈ ಯೋಚನೆ ಬಂದಾಗ ತನ್ನಷ್ಟಕ್ಕೆ ತಾನೇ ಸಿಕ್ಕಾಪಟ್ಟೆ ನಗು ಬಂತು. "ಏನ್ ತಿಕ್ಲಾನೋ ನೀನು ಸುನಿಲ, ಕೂರು ಅಂದರೆ ಕೂತ್ಕೋ ಅಲ್ವೇನೋ" ಅಂತ ನನ್ನ ಮನಸ್ಸು ನನ್ನನ್ನೇ ಗೇಲಿ ಮಾಡಿತು. ಆದರೂ ಏನಾದರಾಗಲಿ ಅಂತ ಹುಡುಕಿದರೆ, ಮತ್ತಷ್ಟು ಆಶ್ಚರ್ಯ!!!!!!!!!!!!!!!!!!!!!!!
ಕೂರ್ = ನಲ್ಮೆ, ಸ್ನೇಹ, ಒಲವು, ಅಕ್ಕರೆ.....

ಏನಾಶ್ಚರ್ಯ ಅಂತೀರಿ. ಕನ್ನಡದಲ್ಲಿ ಕೂರ್ ಎಂದರೆ ನಲ್ಮೆ, ಸ್ನೇಹ ಅಂತಲೇ. ಇಷ್ಟೇ ಆಗಿದ್ದರೆ ಪರವಾಗಿಲ್ಲ. ಒಂದು ವಜ್ರ ಸಿಕ್ತು ಅಂತ ಸುಮ್ಮನಾಗಿಬಿಡುತ್ತಿದ್ದೆ. ಆದರೆ ವಜ್ರದ ಗಣಿ ಸಿಗುವ ಅದೃಷ್ಟ ಇತ್ತು ಅಂತ ಕಾಣತ್ತೆ. ಮನಸ್ಸು ಬಿಡಲೇ ಇಲ್ಲ.

ಏನು ಆ ವಜ್ರದ ಗಣಿ. ನನಗೆ ಹೇಗೆ ಸಿಕ್ತು. ಸದ್ಯದಲ್ಲೇ ನಿರೀಕ್ಷಿಸಿ, ಈ ಬ್ಲಾಗಿನ ಎರಡನೆಯ ಕಂತು <ಮುಂದುವರಿಯುವುದು>