ಕುಹಕಕ್ಕೆ ಮನಸ್ಯಾಕೆ ನೋಯುತ್ತೆ?

ನೇರಾ ನೇರಾ ನಾಲ್ಕು ಬೈದೋ ಇಲ್ಲವೆ ಕೆನ್ನೆಗೆರಡು ಬಾರಿಸಿ ಹೋದರೂ ಚಿಂತೆಯಿಲ್ಲ ಆದರೆ ಸೊಟ್ಟಗೆ ಆಡಿದ ಮಾತು, ಕುಹಕ ಮನಸ್ಸಿಗೆ ಉಂಟು ಮಾಡುವ ಗಾಯ ಮಾಯುವುದು ಕಷ್ಟ. ನೇರವಾದ ಹಣಾಹಣಿ, ಸೆಣೆಸಾಟ ಹುಟ್ಟಿಸುವ ದಣಿವು, ಆಯಾಸಗಳನ್ನು ಹೇಗೋ ತಾಳಿಕೊಳ್ಳಬಹುದು. ಆದರೆ ಈ ಮರೆಯಲ್ಲಿನ ಏಟುಗಳು, ಕೊಂಕು ನೀಡುವ ಯಾತನೆ, ಹುಟ್ಟಿಸುವ ಅಸಹನೆಯನ್ನು ಸಹಿಸುವುದು ಕಷ್ಟ. 

ಇಷ್ಟಕ್ಕೂ ಈ ಕುಹಕ ನಮಗ್ಯಾಕೆ ಅಷ್ಟು ತೊಂದರೆ ಕೊಡುತ್ತದೆ? ಎಷ್ಟು ಬಾರಿ ಕುಹಕಕ್ಕೆ ಉದಾಸೀನವೇ ಮದ್ದು ಎಂದಂದುಕೊಂಡು ಸುಮ್ಮನಿರುವ ಯಾವ ಪ್ರತಿಕ್ರಿಯೆಯನ್ನೂ ಕೊಡದಿರುವ ನಿರ್ಧಾರವನ್ನು ಕೈಗೊಂಡರೂ ಸಣ್ಣ ಕುಹಕದ ಮಾತಿಗೆ ಸಿರ್ರನೆ ಸಿಟ್ಟಿಗೆದ್ದು ನಮ್ಮ ನಿರ್ಧಾರಗಳನ್ನೇ ಕೈಬಿಡುವಷ್ಟು ಅಸಹಾಯಕರಾಗುವುದು ಏಕೆ? 

ಜೋಕು, ಕಾಮಿಡಿಗಳಲ್ಲಿ ನಡೆಯುವ ಪ್ರಕ್ರಿಯೆಯೇ ಈ ಕುಹಕದಲ್ಲೂ ಅಡಗಿದೆಯಾ? 

ನಾವೆಷ್ಟೇ ಪ್ರಜ್ಞಾಪೂರ್ವಕವಾಗಿ ನಮ್ಮ ಪ್ರತಿಕ್ರಿಯೆಯನ್ನು ನಿಯಂತ್ರಿಸಿಕೊಳ್ಳುವ ನಿರ್ಧಾರ ಮಾಡಿಕೊಂಡಿದ್ದರೂ ಸಹ ಜೋಕುಗಳು ನಮ್ಮನ್ನು ನಗಿಸುತ್ತವೆ. ಜೋಕುಗಳಲ್ಲಿ ಸಹಜವಾಗಿರುವ ನಮ್ಮ ಎಣಿಕೆಯನ್ನು ತಲೆ ಕಳಗು ಮಾಡುವ ಲಾಜಿಕ್ಕು ನಮ್ಮ ಮೆದುಳಿನಲ್ಲಿ ನಿರ್ದಿಷ್ಟ ಸಂಜ್ಞೆಗಳನ್ನು ಹುಟ್ಟಿಸಿ ನಮ್ಮನ್ನು ನಗಿಸಿಬಿಡುತ್ತದೆ. ಅದರ ಮೇಲಿನ ನಿಯಂತ್ರಣವೆನ್ನುವುದು ಗಾಳಿಯನ್ನು ಮುಷ್ಠಿಯಲ್ಲಿ ಬಂಧಿಸಿದಂತೆಯೇ.

ಈ ಕುಹಕಕ್ಕೂ ಇಂಥದ್ದೇ ಶಕ್ತಿಯಿದೆಯಾ? ಅದು ಎದುರಾಗುವ ಸೂಚನೆ ಸಿಕ್ಕರೂ, ಆ ಕುಹಕವನ್ನು ಸಂಯಮದಿಂದ ಎದುರಿಸುವ ಸಿದ್ಧತೆಯನ್ನು ಮನಸ್ಸು ಮಾಡಿಕೊಂಡರೂ, ಆ ಕಣಿವೆಯಲ್ಲಿ ಬೀಳದಿರುವ ಎಚ್ಚರವನ್ನು ತೆಗೆದುಕೊಂಡರೂ ಎಲ್ಲಾ ಪ್ರಯತ್ನಗಳನ್ನು ಅಪಹಾಸ್ಯಕ್ಕೀಡು ಮಾಡುವಂತೆ ಕುಹಕ ನಮ್ಮನ್ನು ತನ್ನ ಜಾಲಕ್ಕೆಳೆದು ಕೆಡವಿಕೊಂಡು ಬಿಡುತ್ತದೆಯಾ? ಕುಹಕದಲ್ಲಿರುವ ಯಾವುದೋ ಸರಳವಾದ ಲಾಜಿಕ್ಕಿಗೆ ನಮ್ಮ ಮೆದುಳು ನಿರ್ದಿಷ್ಟವಾಗಿ ತೋರುವ ಪ್ರತಿಕ್ರಿಯೆಯೇ ನಮ್ಮಲ್ಲಿ ಸಿಟ್ಟನ್ನು, ಅಸಹನೆಯನ್ನು ಹುಟ್ಟಿಸುತ್ತದೆಯಾ? ನಮ್ಮ ನೆಮ್ಮದಿಯನ್ನು ನಾಶಗೊಳಿಸುತ್ತದೆಯಾ? 

ಹೌದೆನ್ನುವುದಾದರೆ, ನಾವು ಹೇಗೆ ನಗುವುದಕ್ಕಾಗಿ ಜೋಕು ಓದುತ್ತೇವೋ ಜೋಕಿನ ವಿಮರ್ಶೆಯನ್ನು ಮಾಡುತ್ತೇವೋ ಹಾಗೆಯೇ ನೆಮ್ಮದಿ ಕಳೆದುಕೊಳ್ಳುವುದಕ್ಕೆ ಕುಹಕಗಳನ್ನು ಎದುರಿಸಬಹುದೇನೋ! 

• uniquesupri's blog
• Login or register to post comments
• 365 ಹಿಟ್ಸ್
• ಈ ಪುಟವನ್ನು ಇ-ಮೇಯ್ಲ್ ಮಾಡಿ
• Printer-friendly version
•