ಇಲ್ಲಿ ಸೋತವರ್ಯಾರೂ ಇಲ್ಲ

ನನಗೊಂದು ಆಮಂತ್ರಣ ಕಳಿಸದೆ

ಹುಣ್ಣಿಮೆ ರಾತ್ರಿಯ

ಚಂದಿರ ಮಾಯವಾದಂತೆ

ಅವನ ಕೈ ಹಿಡಿದು ಹೊರಟು

ಹೋದೆ ನೀನು

ಮರವು ತೊರೆದ ಬಳ್ಳಿಯ ಹಾಗೆ

ಒಡಲು ಬರಿದಾದ ತಾಯಿಯ ಹಾಗೆ

ಸಂತೆಯಲ್ಲಿ ತಂದೆಯ ಬೆರಳು ಕೈ ಬಿಟ್ಟ ಕಂದನ ಹಾಗೆ

ಬಾಣವ ಹೂಡಿ ಮಂತ್ರ ಮರೆತ ಕರ್ಣನ ಹಾಗೆ

ಉಳಿದೆ ನಾನು

ನನಗೆ ಗೊತ್ತು

ಮಾತುಕತೆ ಮುಗಿದಿದ್ದ ಸಾಕ್ಷಿಗೆ

ನಾಜೂಕು ಕೈಬೆರಳ ಒತ್ತುತ್ತಿರುವ

ಚಿನ್ನದುಂಗುರ

ಹಣೆಗೆ ಬಿಗಿದ ಬಾಸಿಂಗ

ಕೊರಳ ಹಿಸುಕುವ ಮಾಂಗಲ್ಯ

ಕಾಲ ಮೃದು ಬೆರಳನು

ಹಿಂಸಿಸುವ ಬೆಳ್ಳಿಯ ಉಂಗುರ

ಸಪ್ತಪದಿಯ ಒಂದೊಂದು

ಹೆಜ್ಜೆಯನು ಭಾರವಾಗಿಸಿದೆ

***

ಇದೇನು, ಕಳೆದಿರುಳು

ಅರಳಿ ಹಿತ್ತಲನು

ಆವರಿಸಿದ ಹೂವು

ಬೇರೇನೋ ಹೇಳುತಿದೆ

ನೀ ತೊಟ್ಟ ಉಂಗುರ,

ಬಾಸಿಂಗ, ಸೊಂಟದ ಡಾಬು

ಚಿನ್ನದ ಮಾಂಗಲ್ಯದ ಸುತ್ತ

ಹೂಬಳ್ಳಿ ತಬ್ಬಿದೆ

ಕನಸಿನ ಬೀಜ ಬಿತ್ತಿದೆ

ತಪ್ಪು ಅವಳದೋ

ತ್ಯಾಗ ನಿನ್ನದೋ

ಸಂಚು ವಿಧಿಯದೋ

ಎದೆಯಲ್ಲಿ ಚಿಗಿತು

ಅರಳಿ ನಿಂತ ಪ್ರೀತಿ ಸತ್ಯ

ಪ್ರೀತಿ

ಒಮ್ಮುಖ ರಸ್ತೆ ಕಾಣೋ ಮೂರ್ಖ

ಇಲ್ಲಿ ಸೋತವರ್ಯಾರೂ ಇಲ್ಲ.

• uniquesupri's blog
• Login or register to post comments
• 377 ಹಿಟ್ಸ್
• ಈ ಪುಟವನ್ನು ಇ-ಮೇಯ್ಲ್ ಮಾಡಿ
• Printer-friendly version
•