ಸಮಾನವೆನಿಸುವ ಪದಗಳಿಲ್ಲದಾಗ ಇಂಗ್ಲೀಷ ಮೊರೆ ಹೋಗುವದು ಸರಿಯಾಗಬಹುದು.
ಹೊಸ ಪದಗಳನ್ನು ಹುಟ್ಟುಹಾಕುವ ಸಮಯದಲ್ಲಿ ನಿಮ್ಮ ಮಾತು ನನಗೆ ಒಪ್ಪಿಗೆ. ಯಾಕೆಂದರೆ ಕ್ಲಿಷ್ಟವಾದ ಹೊಸ ಪದಕ್ಕಿಂತ ಸರಳ ಇಂಗ್ಲೀಷ ಪದವೇ ಮೇಲು.

ಆದರೆ ಈಗಾಗಲೆ ದಿನಬಳಕೆಯಲ್ಲಿ ಸರಿಯಾದ ಪದಗಳಿದ್ದಲ್ಲಿ ಅವನ್ನೆ ಬಳಸುವದು ಸರಿಯಲ್ಲವೇ?
ಸದ್ಯದ ಮಟ್ಟಿಗೆ ಗಣಕವೆನ್ನುವದು ಇಂಗ್ಲೀಷು ಬಲ್ಲ ಗಣಕ ಸಾಕ್ಷರರ ವಸ್ತು.
ಇದು ಬರುಬರುತ್ತ ಶಾಲಾಮಕ್ಕಳ ಸಂಗಾತಿಯಾಗಿ, ಅಂಗಡಿಕಾರರ ಖಾತೆ/ಕಿರ್ದಿಯಾದಗ ತಂತ್ರಾಂಶಗಳಲ್ಲಿ ವಿಶೇಷವಾಗಿ 'UI/GUI'ನಲ್ಲಿ ಕನ್ನಡವಿರುವದೇ ಸರಿಯೆನ್ನಿಸುತ್ತೆ.

ಹೀಗಾಗಿ tabನ್ನು ಅಂಕಣವಾಗಿಸುವದು ಸರಿ ಅನ್ಸುತ್ತೆ. ಯಾಕೆಂದರೆ ಅಂಕಣ ಸರಳವಾಗಿಯೂ ಇದೆ ದಿನಬಳಕೆಯಲ್ಲಿಯೂ ಇದೆ.

ವೀರೇಶ ರಾಯ ಚನ್ನಪ್ಪಗೋಳ್

ಈಗ ಆಗಿರೋದೇ ಹೀಗೆ. ಒಬ್ಬ ಕನ್ನಡಿಗ ಇಂದು ಕಂಪ್ಯೂಟರ್ ಬಳಸಬೇಕೆಂದರೆ, ಅವನು ಸಂಸ್ಕೃತ ನಿಘಂಟನ್ನು ಕೈಲಿ ಹಿಡಿದು ಪುಟಗಳನ್ನು ತಿರುವಿಹಾಕಬೇಕು. ಪಾಪ ಅವನಿಗೆ ತಿಳಿದಿರುವುದಿಲ್ಲ, ಅಂತರ್ಜಾಲ, ತಂತ್ರಾಂಶ, ಯಂತ್ರಾಂಶ ಎನ್ನುವುದು ಕನ್ನಡ ಅಲ್ಲವೇ ಅಲ್ಲ ಎಂಬುದು. ಈ ಪದಗಳನ್ನು ಹುಟ್ಟುಹಾಕಿದ ದಿನಕ್ಕೂ, ಇಂದಿನ ದಿನಕ್ಕೂ ತುಂಬಾ ವ್ಯತ್ಯಾಸವಿದೆ. ಅಂತರ್ಜಾಲ (ಅನ್ತರ್ಜಾಲ) ಎನ್ನುವುದಕ್ಕಿಂತ ಇನ್ಟರ್ನೆಟ್ ಎನ್ನುವುದೇ ಹತ್ತಿರವಾಗುತ್ತದೆ. ಯಂತ್ರಾಂಶ(ಯನ್ತ್ರಾಂಶ) ಎನ್ನುವುದಕ್ಕಿಂತ ಹಾರ್ಡವೇರ್ ಎನ್ನುವುದೇ ಸುಲಭ(easy). ಅಲಂಕಾರ, ವ್ಯಾಕರಣಗಳನ್ನು ಗಣನೆಗೆ ತೆಗೆದುಕೊಂಡರೂ ಕೂಡ ಇನ್ಟರ್ನೆಟ್ಟೇ ಸುಲಭ.

ಅಂತರ್ಜಾಲ, ತಂತ್ರಾಂಶ, ಯಂತ್ರಾಂಶ ಎಂಬ ಪಲುಕುಗಳು ಆಡು ನುಡಿಯಲ್ಲಿ ಎಂದೂ ಇರಲಿಲ್ಲ. ಹಾಗಾಗಿ ಹೊಸದಾದ ಒರೆಗಳನ್ನು ಹೆಕ್ಕಿ ತೆಗೆಯಲು, ಕಷ್ಟವಾದರೂ ಪರವಾಗಿಲ್ಲ, ನಾನು Dravidian Etymologyಯನ್ನೇ ಹೆಚ್ಚು ಬಳಸುತ್ತೇನೆ. ಕಷ್ಟವಾದ ಸಂಸ್ಕೃತ ಪದಗಳನ್ನು, ಸಂಸ್ಕೃತವಾಗಿಯೇ ಸ್ವೀಕರಿಸುವುದು ಒಳ್ಳೆಯದು, ಕನ್ನಡವಾಗಿ ಬರಮಾಡಿಕೊಂಡರೆ ಅದನ್ನು ಪಂಡಿತರು ಸ್ವೀಕರಿಸತ್ತಾರೆಯೇ ಹೊರತು ದಿನವೂ ಅವುಗಳನ್ನು ಬಳಸುವ ಜನರು ಅದನ್ನು ಬಳಸುವುದೇ ಇಲ್ಲ. ಜನರು ಯಾವತ್ತಿದ್ದರೂ ಕೂಡ ಯಾವುದು ಸುಲಭವೋ ಅದನ್ನು ಬಳಸುತ್ತಾರೆ. ಆದರೆ ನಾವು ಕನ್ನಡವು ಸಂಸ್ಕೃತಕ್ಕಿಂತ ಅಥವಾ ಇಂಗ್ಲೀಷಿಗಿಂತ ಸರಳ ಎಂದು ತೋರಿಸಿಕೊಡುವ ಪ್ರಯತ್ನವನ್ನೇ ಮಾಡುವುದಿಲ್ಲ. ಒಮ್ಮೆ ಜತುನಗೈದರೆ, ಹೌದು! ಕನ್ನಡವು ಎಷ್ಟು ಸುಲಭ ಎಂದು ಒಪ್ಪಿಕೊಂಡೇ ಒಪ್ಪಿಕೊಳ್ಳುತ್ತಾರೆ. ಕನ್ನಡ ಕನ್ನಡ! ಹಾ ಸವಿಗನ್ನಡ ಕನ್ನಡದಲ್ಲಿ ಹರಿ ಬರೆಯುವನು, ಕನ್ನಡದಲಿ ಹರ ತಿರಿಯುವನು, ಕನ್ನಡದಲ್ಲಿಯೇ ಬಿನ್ನಹಗೈದೊಡೆ, ಹರಿ ವರಗಳ ಮಳೆ ತಾ ಕರೆಯುವನ್ನು ಎಂದು ಕುವೆಂಪುರವರು ಹೇಳಿದ್ದರೂ, ಎಷ್ಟೋ ಪಂಡಿತರು ಇಂದಿಗೂ ಕೂಡ, ಕನ್ನಡವು ಗ್ರಾಮ್ಯ ಭಾಷೆ ಎಂದು ಜರಿದು ಬಿಡುತ್ತಾರೆ.

ಸಂಸ್ಕೃತದ ಪದಗಳು ಕಷ್ಟವೆನಿಸಿದಾಗ, ಕಷ್ಟವಾದರೂ ಪರವಾಗಿಲ್ಲ, ಸರಳವಾಗಿರುವ ಕನ್ನಡದ್ದೇ ಪದವನ್ನು ಹುಡುಕಬೇಕು, ಹುಟ್ಟಿಸಬೇಕು. ಇಲ್ಲ, ಅದು ನಮ್ಮ ಕೈಲಿ ಆಗದಿದ್ದರೆ, ಇಂಗ್ಲೀಷನ್ನೇ ಸ್ವೀಕರಿಸಬೇಕು.

ಒಮ್ಮೆ ನಾನು ಶಂಕರಾಚಾರ್ಯರ ವಿವೇಕ ಚೂಡಾಮಣಿ ಎಂಬ ಗ್ರಂಥ ಓದುತ್ತಿದೆ. ಅದರಲ್ಲಿ
"....ಸಮ್ಯಕ್ ದರ್ಶನ ನಿಷ್ಠಯಾ" ಎಂಬ ಶ್ಲೋಕ ಬರುತ್ತದೆ. ಅದರ ಅನುವಾದ ಹೇಗೆ ಮಾಡಿದ್ದರು ಗೊತ್ತೇ, ಸಮ್ಯಕ್ ದರ್ಶನ ನಿಷ್ಠೆಯಿಂದ ........ ಇದನ್ನು ಅನುವಾದ ಎನ್ನುವುದಕ್ಕಾಗುತ್ತದೆಯೇ ?.

ಇಂತಹ ಕಾರಣಗಳಿಂದಾಗಿಯೇ, ಕನ್ನಡದ ಹೆಸರಿನಲ್ಲಿ ಕಷ್ಟವಾದ ಕೆಲವು ಸಂಸ್ಕೃತ ಪದಗಳನ್ನು ಬಲವಂತವಾಗಿ ತುರುಕಿದರೆ ಜನರು ಅದನ್ನು ತಿರಸ್ಕರಿಸಿ ಇಂಗ್ಲೀಷನ್ನೇ ಅಪ್ಪಿಕೊಳ್ಳುತ್ತಾರೆ.

ಪ್ರತಿಕ್ರಿಯೆಗಳನ್ನು ನೋಡಿ ಖುಶಿಯಾಯ್ತು.

ಈಗಾಗಲೇ ಬಳಸುವ ಪದಗಳ ಬದಲಿಗೆ ಇನ್ನಾವ ಪದಗಳನ್ನು ಬಳಸಿದರೆ ಚೆನ್ನಾಗಿರತ್ತೆ?

ಅಂಕಣವಾಗಲಿ ಬಿಂಬವಾಗಲಿ, ನಿಘಂಟನ್ನು ಬೇಡುವದಿಲ್ಲ.
diode transistor ಮುಂತಾದ ಪದಗಳಿಗೆ ಆಡುಮಾತಿನಲ್ಲಿ ಯಾವುದೇ ಸಮಾನ ಪದಗಳಿಲ್ಲದ್ದರಿಂದ ಇಂಗ್ಲೀಷ್ ಪದ ಬಳಸುವದರಲ್ಲಿ ತಪ್ಪಿಲ್ಲ.

ಆದರೆ ನಿತ್ಯಬಳಕೆಯ ಕನ್ನಡ ಪದಗಳಿದ್ದೂ ಇಂಗ್ಲೀಷ್ ಮೊರೆಹೋಗುವದು ಸರಿಯೆ?

ಅಂದಹಾಗೆ ಅಂಕಣವನ್ನು ನಮ್ಮ ಕಲಬುರಗಿ, ಬಿಜಾಪುರದ ಜನ tabನ ಇನ್ನೊಂದು ಅರ್ಥದಲ್ಲೂ(ನಿರ್ದಿಷ್ಟಾಂತರ) ಬಳಸ್ತಾರೆ.
ಮನೆಗಳ ಬಗ್ಗೆ ಆರಂಕಣದ ಮನೆ ಮೂರಂಕಣದ ಕೊಟ್ಟಿಗೆ ಅಂತೆಲ್ಲ ಹೇಳ್ತಾರೆ.
ಇಲ್ಲಿ ಅಂಕಣ ಅಂದರೆ ಎರೆಡು ತೊಲೆ ಅಥವ ಕಂಬಗಳ ನಡುವಿನ ಅಂತರ. ಇದು ನಡುವೆ ಹಾಕುವ ಜಂತಿಗಳ ಸಂಖ್ಯೆಯ ಮೇಲೆ ತುಸು ಹೆಚ್ಚೂ ಆಗಬಹುದು ಕಡಮೆಯೂ ಆಗಬಹುದು.
tab ಕೂಡ ನಮ್ಮ settingನಂತೆ ೪ ಸ್ಥಾನ ೮ ಸ್ಥಾನ ಹಾಗೆ ಬದಲಾಗುವಂತೆ.
ಹೀಗಾಗಿ ಅಂಕಣವನ್ನು ಪರಿಪೂರ್ಣ tab ಎನ್ನಲೇ?

ನಾವು spreadsheet (excel...) ಒಳಗಿನ sheetನ್ನು ಹಾಳೆಯೆನ್ನಬಹುದೆ?
softwareನ್ನು ತಂತ್ರಾಂಶ hardwareನ್ನು ಯಂತ್ರಾಂಶವೆಂದಂತೆ firmwareನ್ನು ಧೃಡಾಂಶವೆನ್ನಬಹುದೆ?
ಯಾವುದೇ ವಿಷಯದ ಬಗ್ಗೆ ನಿರ್ಣಯ ತೆಗೆದುಕೊಳ್ಳುವದು ಇಲ್ಲಿಯ ಉದ್ದೇಶವಲ್ಲ.
ಆದರೆ ಚಿಂತನ ಮಂಥನ ಮಾಡಲು ತೊಂದರೆಯಿಲ್ಲವಲ್ಲ?

ವೀರೇಶ ರಾಯ ಚನ್ನಪ್ಪಗೋಳ್