"ತಮ್ಮೆಲ್ಲರ ಪ್ರಯತ್ನದಿಂದ ಕನ್ನಡ ಅರಿಶಿನದ ದಾರದ ಸ್ಥಿತಿಯಿಂದ ಚಿನ್ನ, ವಜ್ರದ ಹಾರವಾಗಲಿ."

ನಲ್ವೇ/ಸನ್ಮಾನ್ಯೆ,

ನೀವು ನೆಲೆಸಿರುವ ಬೆಂಗಳೂರೋ, ಮಂಗಳೂರೂ ಮತ್ತಾವುದೋ ಒಂದು ಹೊಳಲೊಂದರ ಕನ್ನಡವನ್ನೇ ಹಿಡಿದು ಪಟ್ಟಣಿಗರಂತೆ ನಿಮ್ಮ ದೊಡ್ಡ ದೊಡ್ಡ ಮಾತಿದೆ.

ನಿಮ್ಮ ಉಂಕಿಗೆ ಗಟ್ಟಿ ನೆಲೆಯಿಲ್ಲ. ಅದರಲ್ಲಿ ನಮ್ಮತನ ಉಳಿಸುಕೊಳ್ಳುವ ಹೊಣೆಯಂತೂ ಇಲ್ಲವೇ ಇಲ್ಲ. ನಿಮ್ಮ ಮಾತು ಜಾರಿಕೆಯ ಮಾತಾಗಿದೆ. ನಿಮಗೆ ಕನ್ನಡದ ಹಲವು ಒರೆಗಳೇ ಗೊತ್ತಿರದೇ ಬರೀ ಈ ಹೊಳಲ್ಗನ್ನಡವನ್ನೇ ಓದಿಕೊಂಡು ಆಡಿಕೊಂಡು, ಹೆಚ್ಚು ಕನ್ನಡದೊರೆಗಳನ್ನು ಬಳಸಿ ಮಾತಾಡುವ ಬೇರೆಡೆಯ ಕನ್ನಡಿಗರೊಂದಿಗಿಂತ ನಿಮಗೆ ಬೇರೆನುಡಿಗಾರರ ಕೂಟೇ ಮಾತುಕತೆ ಹೆಚ್ಚಿರುವಂತೆ.

ನಿಮ್ಮ ಮಾತಿನ ಸರಣಿಗೆ ಗಟ್ಟಿ ನೆಲೆಯಿಲ್ಲ.! ಸುಮ್ಮನೆ ತೇಲಿಸಿದ ಮಾತುಗಳು. ನಿಮ್ಮ ಮಾತಿನಂತೆ ಬಿಯಗರಣ/ವ್ಯಾಕರಣವೇ ಇರಬಾರದು. ಜಗದಲ್ಲಿ ಬಿಯಗರಣವಿಲ್ಲದ ನುಡಿಯುಂಟೆ? ಹಾಗೆ ಪಾಂಡಿತ್ಯಕ್ಕೆ ಬೆಲೆಯಿಲ್ಲ.

ನೀವು ಆಡುನುಡಿಯಲ್ಲಿ ಇರದ ಎನಿತೋ ಸಕ್ಕದ ಒರೆಗಳನ್ನು ಬಳಸಿದ್ದೀರಿ. ಇದು ಯಾಕೆ?

"ಸಂಸ್ಕೃತ ಸುಂದರ,ಸುಲಲಿತ,ಸುಶ್ರಾವ್ಯ ಭಾಷೆ.ಆದರೆ ಕೇವಲ ಕೆಲವೇ ಪಂಡಿತರು ಸೇರಿ ವ್ಯಾಕರಣಕ್ಕೇ, ಉಚ್ಛಾರಕ್ಕೇ ಮಹತ್ವ ಕೊಟ್ಟು,ಉಳಿದವರು ಕಲಿಯದಂತೆ, ಕಲಿತವರು ಮಾತನಾಡಲು ಹಿಂಜರಿಯುವಂತೆ ಮಾಡಿದರು,"

ಇದು ಯಾಕೆ? ಇದು ಬರೀ ಪಾಂಡಿತ್ಯಪ್ರದರ್ಶನ, ತೋರಿಕೆ ಅಲ್ಲವೇ? ಹೀಗೆ ಇಲ್ಲಿ. ಪಾಂಡಿತ್ಯ ಅನ್ನೋದು ತಮಗೂ ಬೇಕಾಯಿತಲ್ಲ!! ಆದುದರಿಂದ ಪಾಂಡಿತ್ಯ/ಪಂಡಿತರನ್ನು ಹಂಗಿಸುವಾಗಿಲ್ಲ. ಏಕೆಂದರೆ ನೀವು ಪಾಂಡಿತ್ಯ ತೋರಿ ಪಂಡಿತೆಯಾದಿರಿ.

ಉಚ್ಚಾರವದು, ಉಚ್ಛಾರವಲ್ಲ!
ಹಾಗೇ ಮಾತನ್ನಾಡಲು, ಮಾತನಾಡಲು ಹೇಗೆ ಸರಿ?.
ಹಿಂಜರಿ ಹೇಗೆ ? ಜರಿ ಅಂದರೆ ಬೈಯಿ/ಹಳಿ ಅಂತ ಅಲ್ವಾ? )

ನೋಡಿ ನೀವು ಬರೆದಿರುವುದು ಎಷ್ಟು ಗೋಜಲಿಂದಕೂಡಿದೆ. ಇವನ್ನೆಲ್ಲ ಬಿಡಿಸಲು ಬೇಕಲ್ಲ ಬಿಯಗರಣ.

"ಸಂಸ್ಕೃತ ಸುಂದರ,ಸುಲಲಿತ,ಸುಶ್ರಾವ್ಯ ಭಾಷೆ" ಅಂದಿರಲ್ಲ. ಸರಿ ಹಾಗಾದರೆ ನನಗೂ ನಿಮಗೂ ಸಂಸ್ಕೃತ ಯಾಕೆ ಸುಂದರವಲ್ಲ, ಸುಲಲಿತವಲ್ಲ, ಸುಶ್ರಾವ್ಯವೂ ಅಲ್ಲ, ಅನ್ನುವದಕ್ಕೆ ಮಾತುಕತೆಗೆ ಇಳಿಯಲು ನೀವು ಅಣಿಯೇ?
( ನನಗೆ ಸಂಸ್ಕೃತದ ಕೊರತೆ ತೋರಲು ಹಂಬಲವಿಲ್ಲ, ಅದರಲ್ಲಿ ಹೆಮ್ಮೆಯೂ ಇಲ್ಲ. ಅದರೆ ಅದು ಕನ್ನಡಕ್ಕಿಂತ ಸುಂದರ, ಸುಲಲಿತ, ಸುಶ್ರಾವ್ಯ ಹೇಗೆ? ಸಂಸ್ಕೃತದ ಸಾಹಿತ್ಯ/ಬರೆವಣಿಕೆ ದೊಡ್ದದು ಹರಿಮೆಯದು, ಇದನ್ನು ಅಲ್ಲಗಳೆಯುತ್ತಿಲ್ಲ, ಆದರೆ ಒಂದು ನುಡಿಯಾಗಿ ಸಕ್ಕದದಲ್ಲಿ ಬಲು ಕೊರತೆಗಳಿರುವುದಂತೂ ದಿಟ )

ಸಂಸ್ಕೃತ ನುಡಿಯು ಹಲವಾರು ಕೊರತೆಗಳಿಂದ ತುಂಬಿಕೊಂಡಿದೆ. ಕನ್ನಡವೂ ಆ ಕೊರತೆಗಳನ್ನು ಹೆಚ್ಚು ಕಡೆ ಮೀರಿದೆ.

ನಿಮಗೆ ಸಂಸ್ಕೃತದಲ್ಲಿ ತಕ್ಕುಮೆ ಇರಬಹುದು, ಆದರೆ ಕನ್ನಡದಲ್ಲಿ ತಕ್ಕುಮೆ ಇರದ ಓಸುಗರ, ಹೀಗೆ ನೆವವೇಳುವದು ತರವಲ್ಲ. ಬರೀ ಕನ್ನಡದ ಒರೆಗಳಲ್ಲೇ( ಬೇಕಾದರೆ ಕೊಂಚ ೧೦% ಹೊರನುಡಿ ಒರೆಗಳು ಬಂದರೆ ಅಡ್ಡಿಯಿಲ್ಲ, ಆದರೆ ೯೯% ಹೊರನುಡಿ ಆದರೆ ...)

ಹೀಗೆ ಎಗ್ಗಿಲ್ಲದೇ, ಬೇಕಾಬಿಟ್ಟಿ ಸಕ್ಕದದ ಒರೆಗಳ ಬಳಕೆಯನ್ನು ಹಿಂದಿನವರೂ ತಪ್ಪೆಂದಿದ್ದಾರೆ ( ಕವಿರಾಜಮಾರ್ಗ, ಶಬ್ದಮಣಿದರ್ಪಣ ನೋಡಿರಿ ), ಈಗಿನ ನುಡಿಕಲಿಗಳು ಹೇಳುತ್ತಿದ್ದಾರೆ ( ಶಂಕರಭಟ್ಟ, ಕಾಡದೇವನೂರ(?) )!!

ಕವಿರಾಜಮಾರ್ಗ ಪದ್ಯ(೫೧-೬೧) : ಈ ಹನ್ನೊಂದು ಪದ್ಯಗಳಲ್ಲಿ ಬಿಡಿಸಿ ಬಿಡಿಸಿ ಕನ್ನಡದಲ್ಲಿ ಎಂತಹ ಸಕ್ಕದದ ಪದಗಳು ಬರಬಹುದು, ಎಂತವು ಬರಬಾರದು, ಯಾಕೆ ಮುಂತಾದವುಗಳನ್ನು ಕೊಟ್ಟಿದೆ.

ಅದರಲ್ಲಿ( ಪದ್ಯಗಳನ್ನು ಬರೆದಿಲ್ಲ )
೫೧)ಕನ್ನಡಕ್ಕೆ ಹೊಂದಿಕೆಯಾಗುವಂತಹ ಒರೆಗಳನ್ನು ಅರಿತು ಬೆರೆಸಬೇಕು. ಇದಕ್ಕೆ ಅವರು ಹೇಳು ಓಸುಗರ ತಿಳಿವು,/ಅರ್ಥ ಕೆಡುವುದು, ಅಲ್ಲದೇ ಕಣ್‌ಕಮಲ, ಮುಖತಾವರೆ( ಈಗಿನ ಕಲಿಕಾ-ಕೇಂದ್ರ, ಅಗಲೀಕರಣ ಮುಂತಾದವು ಕನ್ನಡದ ಸೊಗಡನ್ನು ಮುರಿದಿವೆ, ವೆಂಕಟಸುಬ್ಬಯ್ಯನವರೂ ಇದನ್ನೇ ಹೇಳಿದ್ದಾರೆ) ಇಂತವು ಹೇಳಲೂ ತಿಳಿಯಲೂ ಹೊಂದಿಕೆ ತೋರುವುದಿಲ್ಲ. ಅಂದರೆ ಸಂಸ್ಕೃತದ ಬಳಕೆ ಕನ್ನಡದಲ್ಲಿ ’ಸುಲಲಿತ’ವಲ್ಲ. ( ಸುಲಲಿತ ಅಂದರೆ ಸಲೀಸಾಗಿ ತಿಳಿಯುವಂತಹದ್ದು ಅಲ್ವಾ? ಸಂಸ್ಕೃತ ಕನ್ನಡಕ್ಕಿಂತ ಸುಲಲಿತವೇ? ). ನಿಮಗಸ್ಟು ಸುಲಲಿತವಾಗಿ ಸಕ್ಕದ ಬರುವುದಾದರೇ( ಏಕೆಂದರೆ ಇವರಿಗೆ ಸಕ್ಕದ ಸುಲಲಿತ ಅಂತ ಅವರೇ ಹೇಳಿಕೊಂಡಿದ್ದಾರೆ )

೫೨/೫೩/೫೪/೫೫)ಇದು ಸುಶ್ರಾವ್ಯದ ಬಗ್ಗೆ ಹೇಳುವುದು. ಕನ್ನಡದಲ್ಲಿ ಅಹರಹಃ, ಉಚ್ಛೈಃ, ನೀಚೈಃ, ಮುಹುರ್ಮುಹುಃ, ಇತಸ್ತತಃ, ಪುನಃಪುನಃ, ಈಷತ್ ಮುಂತಾದ ಸಕ್ಕದದ ಒರೆಗಳ ಬಳಕೆಗಳನ್ನು "ಅಸಹಾಯಗಳು"( ಸಹಿಸಲಾರದವು, ತಾಳಲಾರದವು, ಕೇಳಲು ಕರ್ಕಶವಾದವು ) ಎಂದು ಹೇಳಿದೆ. ಅಂದರೆ ಇಲ್ಲಿ ಸುಶ್ರಾವ್ಯತೆ ಬಿದ್ದು ಹೋಯಿತು. ಕನ್ನಡವು ಇಂಪಾಗಿಸಲು ಹಲವು ಬಿರುಸು ಸಂಸ್ಕೃತದ ಒರೆಗಳನ್ನು ಮೆದು ಮಾಡಿದೆ

ಇಂತಹ ಒರಟು ಸಕ್ಕದದ ಒರೆಗಳನ್ನು ಬಳಸುವದರಿಂದ ಮಾತಿನ ಚೆಲುವು, ಕಬ್ಬದ ಚೆಲುವುಗೆಡುವುದೆಂತು ಹಿಂದಿನಿಂದಲೂ ಹೇಳಿದ್ದಾರೆ. ಸಂಸ್ಕೃತವೂ ಸುಶ್ರಾವ್ಯವಲ್ಲ. ( ಸುಶ್ರಾವ್ಯ ಅನ್ನೋ ಪದದಲ್ಲೇ ಎಷ್ಟು ಕರ್ಕಶ(ಶ್ರ,ವ್ಯ) ವ್ಯಂಜನಗಳಿವೆ.)
ಸಂಸ್ಕೃತ = ಸಕ್ಕದ
ಕರ್ಕಶ = ಕಕ್ಕಸ
ಪತಿವ್ರತೆ = ಹದಿಬದೆ

ಪದ್ಯ ನೋಡಿ

ಈ ಮೇಲಿನ ಒರೆಗಳ ಪಟ್ಟಿಕೊಟ್ಟು...

ಬೆರೆಸಿರೆ ಕನ್ನಡದೊಳ್ ಬಂ
ಧುರಮಾಗದು ಕಾವ್ಯರಚನೆ ಪೇೞ್ದೊಡೆ ಪೀನಂ
ಪರುಷತರಮಕ್ಕುಮೊತ್ತುಂ
ಗರಡೆಯ ಮದ್ದಳೆಯ ಜರ್ಝರ ಧ್ವನಿಗಳವೋಲ್

"ಬೆರೆಸಿದ್ದರೆ ಕನ್ನಡದಲ್ಲಿ ಬಂಧುರ/ಚೆಲುವಾಗದು, ಕಾವ್ಯರಚನೆ ಹೇಳಿದರೆ ಪೀನ/ದಪ್ಪಗೆ ಪರುಷತರ/ಕರ್ಕಶವಾಗಿ/ಒರಟಾಗಿ ಇರುವುದು, ಒತ್ತಿ ಬಾರಿಸುವ ಕರಡೆ(ಕರಡಿ) ವಾದ್ಯ, ಮದ್ದಳೆಯ ಜರ್ಝರ ಸದ್ದಂತೆ"

ಸುಶ್ರಾವ್ಯತನವಿಲ್ಲ

೫೩) ಯಾವು ಸುಲಲಿತವಲ್ಲವೋ, ಸುಶ್ರಾವ್ಯವೂ ಅಲ್ಲವೋ ಅಂದು ಹೇಗೆ ಸುಂದರವಾದ ನುಡಿಯಾಗುವುದು? ಇಲ್ಲಿ ನೀವು ಹೇಳಿರುವ ನುಡಿಚೆಲುವು/ಭಾಷಾಸೌಂದರ್ಯವೇನು?

ಇದೇ ಮಾತನ್ನು ಹಲವು ಕನ್ನಡದ ಕವಿಗಳು ಹೇಳಿದ್ದಾರೆ.

ನೀವು ಈ ಮಾತುಗಳನ್ನು ನಿಮ್ಮ ಮೇಲೇ ಮಾಡಿ ಹಳಿತ/ಹಂಗಿಸಿಕೆ ಅಂತ ಎಣಿಸದೇ, ಮುನಿಸದೇ, ಬರೀ ಅರಿಮೆ/ಮಾಹಿತಿಯಾಗಿ ಪಡೆಯಿರೇಂದು ಕೋರಿಕೆ.

ನೀವು ದಯವಿಟ್ಟು ನಿಮ್ಮ ಹೇಳಿಕೆಗಳಿಗೆ/ತೀರ್ಪುಗಳಿಗೆ ಸರಿಯಾದ ಓಸುಗರ/ಕಾರಣಗಳನ್ನು ನೀಡಿರಿ, ತೇಲಿಕೆಯ ಮಾತುಗಳಾದರೆ ಬೇಡ!

ಈಗ ಹೇಳಿ ಸಕ್ಕದ ಯಾಕೆ ವಜುರ ಅಂತ ...ಸುಮ್ನೆ ಹೇಳಿಕೆ ಕೊಟ್ಬುಟ್ಟು ತಪ್ಪಿಸ್ಕೊಬೇಡಿ