ವಿಕ್ರಮಾದಿತ್ಯನಿಗೆ ನಿರಂತರವಾಗಿ ಕಥೆ ಹೇಳುತ್ತಾ ಹೋದ ಬೇತಾಳನಿಗೇಕೆ ಪುಸ್ತಕ ಖರೀದಿಸುವ, ಆಯುವ ಚಿಂತೆ? ತಾನು ಹೇಳಿದ ಕಥೆಗಳನ್ನೆಲ್ಲಾ ಪುಸ್ತಕವಾಗಿಸುವುದು ಹೇಗೆ ಎಂದು ಕೇಳಿದ್ದರೆ ಲೈಬ್ರರಿಗೆ ಹಿಡಿದ ಗೆದ್ದಲುಗಳಂಥ ಪ್ರಕಾಶಕರೇ ಹೇಳಿಕೊಡುತ್ತಿದ್ದರು. ವಿಷಯಾಂತರ ಬೇಡ ಎಂಬ ಕಾರಣಕ್ಕೆ ಬೇತಾಳನ ಪ್ರಶ್ನೆಗಳಿಗೆ ಉತ್ತರ ಕೊಡಲು ಪ್ರಯತ್ನಿಸುತ್ತೇನೆ. ಈ ಪ್ರಶ್ನೆಗಳನ್ನು ಬೇತಾಳ ನನಗೆ ನೇರವಾಗಿ ಕೇಳದೇ ಇರುವುದರಿಂದ ತಪ್ಪು ಉತ್ತರ ಹೇಳಿದರೂ ತಲೆ ಒಡೆದು ಸಾವಿರ ಹೋಳಾಗಲಾರದು ಎಂಬ ಧೈರ್ಯವಿದೆ.

1.ಪುಸ್ತಕದ ಕವರ್ ಪೇಜ್, ಟೈಟಲ್ ಅದಕ್ಕಿರುವ ಟ್ಯಾಗ್ ಲೈನ್ ಎಲ್ಲವನ್ನೂ ನೋಡಿದ ನಂತರವೇ ನಾನು ಪುಸ್ತಕ ಖರೀದಿಸುವುದು. ಎಷ್ಟೋ ಬಾರಿ ಟೈಟಲ್ ಚೆನ್ನಾಗಿದೆ ಎಂಬ ಕಾರಣಕ್ಕೆ ಪುಸ್ತಕ ಖರೀದಿಸಿ ಖುಷಿಯಾದುದೂ ಇದೆ. ನಾನು ಮಾರ್ಕ್ವೆಜ್ ನ ಕ್ರಾನಿಕಲ್ ಆಫ್ ಡೆತ್ ಪೋರ್ ಟೋಲ್ಡ್ ಖರೀದಿಸಿದಾಗ ಮಾರ್ಕ್ವೆಜ್ ಯಾರೂ ಎಂದೇ ಗೊತ್ತಿರಲಿಲ್ಲ. ಬರೇ ಟೈಟಲ್ ನೋಡಿ ಆಕರ್ಷಿತನಾಗದೇ ಹೋಗಿದ್ದರೆ ನನಗೆ ಆ ಲೇಖಕನ ಬಗ್ಗೆ ತಿಳಿಯಲು ಹಲವಾರು ವರ್ಷಗಳು ಬೇಕಾಗುತ್ತಿತ್ತು.  ಉಂಬರ್ಟೋ ಇಕೋನ ಪುಸ್ತಕಗಳನ್ನು ಅವನ ಹೆಸರನ್ನು ನೋಡಿ ಖರೀದಿಸಿದ್ದೇನೆ. ಇವತ್ತಿನವರೆಗೂ ಅವನು ನನಗೆ ನಿರಾಶೆ ಹುಟ್ಟಿಸಲಿಲ್ಲ.

2.ಪುಸ್ತಕದ ಪೀಠಿಕೆಯನ್ನು ಓದುವುದು ಅನುಕೂಲಕರವೇನೋ ಹೌದು. ಆದರೆ ಇದು ಯಾವಾಗಲೂ ಪ್ರಯೋಜನಕ್ಕೆ ಬರುತ್ತದೆ ಎಂದು ಹೇಳಲು ಬರುವುದಿಲ್ಲ. ಪ್ರಖ್ಯಾತರು ಮುನ್ನುಡಿ ಬರೆದ ಅನೇಕ ಪುಸ್ತಕಗಳನ್ನು ಖರೀದಿಸಿ ಇಂಗು ತಿಂದ ಮಂಗನಂತಾಗಿದ್ದೇನೆ.

3.ಲೇಖಕರ ಹೆಸರು ಬೇರೆ ಬೇರೆ ರೀತಿಯಲ್ಲಿ ಕೆಲಸ ಮಾಡುತ್ತದೆ. ಬೇರೊಬ್ಬರು ಲೇಖಕರು ಉಲ್ಲೇಖಿಸಿದ್ದರೆ, ಇಲ್ಲವೇ ನಾವೇ ಅವರ ಇತರ ಕೃತಿಗಳನ್ನು ಓದಿದ್ದರೆ ಉಪಕಾರಕ್ಕೆ ಬರುತ್ತದೆ. ಪಾವ್ಲೋ ಕೊಯೆಲ್ಹೋನ ವೆರೋನಿಕಾ ಡಿಸೈಡ್ಸ್ ಟು ಡೈ ಓದಿ ಅವನ ಇತರ ಪುಸ್ತಕಗಳನ್ನೆಲ್ಲಾ ಖರೀದಿಸಿ ಮಂಗನಾದ ಕಥೆ ಬಹಳ ದೊಡ್ಡದು. ಅದನ್ನು ಇಲ್ಲಿ ಹೇಳುವುದಿಲ್ಲ.

ವಾಸ್ತವದಲ್ಲಿ ನಾನು ಪುಸ್ತಕ ಆರಿಸಲು ಈ ಎಲ್ಲಾ ತಂತ್ರಗಳನ್ನೂ ಒಟ್ಟಿಗೇ ಬಳಸುತ್ತೇನೆ. ಇಷ್ಟರ ಮೇಲೆ ಇನ್ಟೂಷನ್ ಕೂಡಾ ಕೆಲಸ ಮಾಡುತ್ತದೆ. ಬ್ಲರ್ಬ್ ಓದಿ, ಮಧ್ಯೆ ಯಾವುದೋ ಪುಟ ಓದಿ ಖರೀದಿಸಿದ ಅನೇಕ ಪುಸ್ತಕಗಳು ಹೊಸತೊಂದು ಜಗತ್ತನ್ನೇ ತೋರಿಸಿಕೊಟ್ಟಿವೆ. ವಿಮರ್ಶೆಗಳನ್ನು ಓದಿ ಖರೀದಿಸುವುದೂ ಇದೆ. ಇದರಲ್ಲಿಯೂ ರಿಸಲ್ಟ್ 50-50 ಮಾತ್ರ.

ಇಸ್ಮಾಯಿಲ್ ನನ್ನ ಬ್ಲಾಗ್: http://ismail.in