ನಾನು ವ್ಯಾಸ ಭಾರತದ ನೇರ ಅನುವಾದಗಳನ್ನು ಹೆಚ್ಚಾಗಿ ಓದಿಲ್ಲ. ಆದರೂ, ನಾರಾಯಣಾಚಾರ್ಯರ ಲೇಖನವೊಂದರಲ್ಲಿ, ಮೂಲ ಭಾರತದಲ್ಲಿ ಕರ್ಣನನ್ನು ಬಹಳ ಒಳ್ಳೆಯವನನ್ನಾಗಿ ಚಿತ್ರಿಸಿಲ್ಲ, ಅನ್ನುವ ನೆನಪು. ನಂತರದ ಕವಿಗಳು ಕರ್ಣನ ಪಾತ್ರಕ್ಕೆ ಹೆಚ್ಚು ಮೇಲ್ಮೆಯನ್ನು ತಂದುಕೊಟ್ಟಿದ್ದಾರೆ.

ಬಹುಶಃ ಭಾಸನ ಪ್ರಯತ್ನ ಈ ದಿಸೆಯಲ್ಲಿ ಮೊದಲಿರಬಹುದು. ಕರ್ಣಭಾರಂ ನ ಕರ್ಣ ಮನಸ್ಸಿನಲ್ಲಿ ನಿಲ್ಲುವ ದುರಂತನಾಯಕ. ಅಂದರೆ, ಮೂಲ ಭಾರತ ಬಂದ ಕೆಲವಾರು ಶತಮಾನಗಳಲ್ಲೇ ಅದರ ಮೇಲೆ ಹೊಸ ಪ್ರಯೋಗಗಳನ್ನು ಮಾಡಲು ಆರಂಭಿಸಿದರು ಎನ್ನಬಹುದು. ಭಾಸ ಸುಮಾರು ಕ್ರಿ.ಪೂ.೨೦೦ ರಿಂದ ಕ್ರಿ.ಶ.೩೦೦ ರ ಒಳಗೆ ಆಗಿಹೋದವನು ( ಈ ನಾಟಕವನ್ನು ಭಾಸನೇ ಬರೆದದ್ದು ನಿಜವಾದರೆ - ಏಕೆಂದರೆ, ಸ್ವಪ್ನನಾಟಕ, ಮತ್ತು ಪ್ರತಿಜ್ಞಾ ನಾಟಕಗಳನ್ನುಳಿದು ಉಳಿದ ನಾಟಕಗಳನ್ನು, ನಂತರದ ಯಾರೋ ನಾಟಕಕಾರ ಬರೆದಿರಬಹುದೆಂಬ ವಾದವೂ ಇದೆ).

ಕನ್ನಡದಲ್ಲಿ ಪಂಪ ಕರ್ಣನನ್ನು ಮೇಲಕ್ಕೇರಿಸಿ, ಕರ್ಣರಸಾಯನಮಲ್ತೆ ಭಾರತಂ ಎಂದಿದ್ದಾನಂತೆ. ಇನ್ನು ಕುಮಾರವ್ಯಾಸ ಅಂತೂ, ಕರ್ಣನನ್ನು ಭಾರೀ ದುರಂತನಾಯಕನನ್ನಾಗೇ ಮಾಡಿದ್ದಾನೆ.

-ಹಂಸಾನಂದಿ