ಹಾಡಿನಲ್ಲಿ ರಾಗದ ಹೆಸರು ಸೇರಿಸುವುದು ಅಂತಹ ಅಪರೂಪದ ಪದ್ಧತಿಯೇನಲ್ಲ. ಮುತ್ತುಸ್ವಾಮಿ ದೀಕ್ಷಿತರ ಅರ್ಧದಷ್ಟಾದರೂ ರಚನೆಗಳಲ್ಲಿ ರಾಗಮುದ್ರೆ ಇದೆ.

ಮತ್ತೆ ಈ ಕೃತಿ ಮದುರಾಂಬಾ ವಿಭಕ್ತಿ ಕೃತಿ ಸಮೂಹಕ್ಕೆ ಸೇರಿದೆ.

ದೀಕ್ಷಿತರು ಕಮಲಾಂಬಾ, ನೀಲೋತ್ಪಲಾಂಬಾ, ಅಭಯಾಂಬಾ, ಮದುರಾಂಬಾ, ರಾಮ ಮತ್ತು ಗುರುಗುಹ ಇವರಮೇಲೆ ಒಂದೊಂದು ವಿಭಕ್ತಿಯಲ್ಲಿ ಒಂದೊಂದು ರಚನೆಯನ್ನು ಮಾಡಿದ್ದಾರೆ. ಇವಕ್ಕೆ ಆಯಾ ಹೆಸರಿನ ವಿಭಕ್ತಿ ಕೃತಿಗಳೆಂದೇ ಕರೆಯುವ ರೂಢಿ.

ಉದಾ:

ಕಮಲಾಂಬೆಯು ನನ್ನನ್ನು ಕಾಪಾಡಲಿ - ಕಮಲಾಂಬಾ ಸಂರಕ್ಶತು ಮಾಂ - ಪ್ರಥಮಾ ವಿಭಕ್ತಿ
ಕಮಲಾಂಬಾಂ ಭಜರೇ ಮಾನಸ - ಓ ಮನಸ್ಸೇ, ಕಮಲಾಂಬೆಯನ್ನು ನೀ ನೆನೆ - ದ್ವಿತೀಯಾ ವಿಭಕ್ತಿ
ಕಮಲಾಂಬಿಕಯಾ ಕಟಾಕ್ಷಿತೋಹಂ - ಕಮಲಾಬಿಕೆಯಿಂದ ನಾನು ಅನುಗ್ರಹ ಪಡೆದೆನು - ತೃತೀಯಾ ವಿಭಕ್ತಿ
ಕಮಲಾಂಬಿಕಾಯೈ... ನಮಸ್ತೇ - ಕಮಲಾಂಬಿಕೆಗೆ ನಾನು ನಮಿಸುವೆನು - ಚತುರ್ಥೀ ವಿಭಕ್ತಿ
ಕಮಲಾಂಬಿಕಯಾ: ಪರಂ ನಹಿರೇ - ಕಮಲಾಂಬಿಕೆಗಿಂತ ಇತರರು ನನಗಿಲ್ಲ - ಪಂಚಮಿ ವಿಭಕ್ತಿ

ಇತ್ಯಾದಿ ಇತ್ಯಾದಿ.

ಇದೇ ರೀತಿ, ಮದುರಾಂಬಾಂ ಭಜರೇ ಎನ್ನುವ ಕೃತಿ ಮದುರಾಂಬೆ ( ಅದು ಮಧುರಾ ಅಲ್ಲ - ಏಕೆಂದರೆ, ಊರಿನ ಹೆಸರು ಮದುರೈ ಹೊರತು, ಮಧುರೈ ಅಲ್ಲ) ಯ ಮೇಲಿನ ಎರಡನೇ ವಿಭಕ್ತಿ ಕೃತಿ.

-ಹಂಸಾನಂದಿ