ಇನ್ನಷ್ಟು ವಿವರವಾಗಿ ಬರೆದರೆ ನಿಮ್ಮ ದೃಷ್ಟಿಕೋನ ಅರ್ಥೈಸಿಕೊಳ್ಳಲು ಸಹಾಯವಾಗುವುದು. ಅನ್ವಯಿಸುವುದಕ್ಕೆ ಮುನ್ನ ಅವಲೋಕಿಸುವುದು ಒಳ್ಳೆಯದಲ್ಲವೆ?

******

ನಿಮ್ಮೆಲ್ಲರಿಗೂ ನಾನು ಹೇಳೋದಿಷ್ಟೆ:
'ಸಂಪದ'ವನ್ನ 'ಅಂತರ್ಜಾಲದ ಕನ್ನಡ ಪ್ರತಿನಿಧಿ' ಆಗ ಹೊರಟಿದೆ ಎಂದು ತಿಳಿದುಕೊಳ್ಳೋದಾಗಲೀ, ಹೇಳೋದಾಗಲೀ ತಪ್ಪು. ಒಂದು ವರ್ಷದಿಂದ ಕನ್ನಡ ವಿಕಿಪೀಡಿಯ ಬೆಳೆಸುವಲ್ಲಿ ತೊಡಗಿದ್ದಾಗ ವಿಕಿಪೀಡಿಯಕ್ಕೆ ಎಷ್ಟು ಪಬ್ಲಿಸಿಟಿ ಕೊಡಲು ಪ್ರಯತ್ನಿಸಿದರೂ (ಒಬ್ಬಿಬ್ಬರನ್ನು ಬಿಟ್ಟು) ಯಾರೂ ಕನ್ನಡಿಗರು ಅತ್ತ ತಲೆ ಹಾಕಿದ್ದು ನೋಡಲಿಲ್ಲ. ಸಂಪದ ವನ್ನು ಪ್ರಾರಂಭಿಸುವಾಗ "ಹೀಗೆ ಮಾಡಬೇಕು", "ಹೀಗೇ ಇರಬೇಕು" ಎಂದು ಇದ್ದದ್ದು ಖಂಡಿತ ಇಲ್ಲ. "ಪ್ರಾಯೋಗಿಕವಾಗಿ ಪ್ರಾರಂಭಿಸಿದ್ದು" ಬೆಳೆದು ದೊಡ್ಡದಾಯಿತು.

ಹೀಗೆ ಸಂಪದ ಹುಟ್ಟು ಹಾಕಿ ಎಷ್ಟೋ ಕನ್ನಡಿಗರ (ಹೆಚ್ಚಾಗಿ ನನ್ನ ಕೆಲವು ಸ್ನೇಹಿತರ) ನಿಷ್ಠುರ ಕಟ್ಟಿಕೊಳ್ಳಬೇಕಾಗುತ್ತದೆಂದು ನನಗೆ ಮುಂಚೆಯೇ ಗೊತ್ತಿದ್ದಲ್ಲಿ. ನಾನು ಪ್ರಾರಂಭಿಸುತ್ತಲೇ ಇರಲಿಲ್ಲ. ಕನ್ನಡದಲ್ಲಿ ಬರೆಯಬೇಕೆಂಬುದು ನನಗಿಷ್ಟ... ನನ್ನ ಬ್ಲಾಗಿನಲ್ಲಿ ಕನ್ನಡದಲ್ಲಿ ಬರೆದುಕೊಳ್ಳುತ್ತಿದ್ದದ್ದನ್ನು ನನ್ನ ಕೆಲವು ಸ್ನೇಹಿತರನ್ನು ಬಿಟ್ಟರೆ ಇನ್ಯಾರೂ ಓದಿದ್ದಿಲ್ಲ. ಹೀಗಾಗಿ ಎಲ್ಲರೂ ಕನ್ನಡದಲ್ಲಿ ಬರೆದುಕೊಳ್ಳಲಾಗುವಂತಹ, ಎಲ್ಲರೂ ಒಂದು ಕಡೆ ಕೂಡಿ ಚಟುವಟಿಕೆ ಹೆಚ್ಚಿಸುವಂತಹ ಸಮುದಾಯ ಕಟ್ಟಬಹುದೇನೋ ನೋಡೋಣ, ಯುನಿಕೋಡ್ ಕನ್ನಡ ಬಳಕೆಯೂ ಹೆಚ್ಚುತ್ತದೆ ಎಂಬ ಉದ್ದೇಶವಿತ್ತು, ಅಷ್ಟೆ. ಭಾಗವಹಿಸಿದ ಸದಸ್ಯರ ಅಭಿರುಚಿಗೆ ತಕ್ಕಂತೆ ಸಂಪದ ಬೆಳೆದು ಬಂತು. ನಿಮ್ಮ ಪ್ರಕಾರ "ಸಾಹಿತ್ಯ ಪರಿಷತ್ತಿನಂತೆ ಸಾಂಸ್ಕೃತಿಕ ರಂಗದ ಇತರ ಆಯಾಮಗಳನ್ನು ನಿರ್ಲಕ್ಷಿಸುತ್ತಿದೆ", ಬರಿಯ ಒಂದು ಆಯಾಮವನ್ನೇ ಡಾಮಿನೇಟ್ ಮಾಡುತ್ತಿದೆ ಎಂದೆಲ್ಲ ಹೇಳಿದರೆ ಬೇಸರವಾಗತ್ತೆ.