ಸುನಿಲರು ಹೀಗೆಂದರು - ಶ್ರೀವತ್ಸರ ಬರಹದ ಬಗ್ಗೆ

ಕನ್ನಡದಲ್ಲಿ "ಚಾರು" ಇಲ್ಲ ಅಂತ ನಿಮಗೇಕೆ ಅನ್ನಿಸಿತೋ ನನಗೆ ಗೊತ್ತಿಲ್ಲ, ಆದರೆ ತಮಿಳಿನ "ಚಾರಿನಿಂದ" ಕನ್ನಡದ ಸಾರು ಬಂದಿಲ್ಲ. ಅದು
ದ್ರಾವಿಡ "ಚಾರು". "ಕನ್ನಡ"ದಲ್ಲಿ "ಚಾರು" ಮತ್ತು "ಸಾರು" ಎರಡೂ ಇದೆ. ಆದರೆ ತಮಿಳಿನಲ್ಲಿ ಚಾರು(ರಸಂ) ಬಳಕೆ ಹೆಚ್ಚು,
ಕನ್ನಡದಲ್ಲಿ "ಸಾರು" ಬಳಕೆ ಹೆಚ್ಚು. ಬಳಕೆ ಹೆಚ್ಚಾಗಿದೆ ಎಂಬ ಒಂದೇ ಕಾರಣಕ್ಕೆ, ಕನ್ನಡದಲ್ಲಿ ಚಾರು ಇಲ್ಲವೇ ಇಲ್ಲ ಎಂಬ ತೀರ್ಮಾನಕ್ಕೆ
ಬರುವುದು ತಪ್ಪು. ಈಗಲೂ ನಮ್ಮ ನಮ್ಮ ಮನೆಗಳಲ್ಲಿ ಮಕ್ಕಳೊಡನೆ ಮಾತನಾಡುವಾಗ "ಚಾರು"(ಚಾರು ಅನ್ನ) ಅಂತಲೇ ಹೇಳೋದು.
ದೊಡ್ಡವರೊಡನೆ ಮಾತನಾಡುವಾಗ "ಸಾರು" ಅನ್ನುತ್ತೇವೆ.

ತಮಿಳುನಾಡಿನಲ್ಲಿ ಕೆಲ ಕಾಲ ಇದ್ದ, ಹಾಗೂ ಹಲವು ತಮಿಳರ ಜೊತೆ ಒಡನಾಡಿರುವ ನನ್ನ ಅನುಭವದಲ್ಲಿ (ಈಗಿನ) ತಮಿಳಲ್ಲಿ ಚಾರು ಎನ್ನುವ ಪ್ರಯೋಗ ಇಲ್ಲವೇ ಇಲ್ಲ ಎನ್ನಬಹುದು. ಅದು ಏನಿದ್ದರೂ ಬರೀ ’ರಸಂ’ ಅಷ್ಟೇ. ಅಲ್ಲದೆ ಪದಾರಂಭದ ’ಚ’ ಸರಿಸುಮಾರಾಗಿ ಯಾವಾಗಲೂ ’ಸ’ ಆಗುವ ಇಂದಿನ ತಮಿಳಲ್ಲಿ (ಸೆಂದಿರನ್, ಸೆಲ್ವಿ, ಸೆನ್ನೈ, ಸೊಲ್ ಮೊದಲಾದ ಪದಗಳನ್ನು ಗಮನಿಸಿ) ಒಂದು ವೇಳೆ ಚಾರು ಇದ್ದರೂ, ಅದು ಸಾರೇ ಆಗಬೇಕು.

ಹಿಂದೆ ತಮಿಳಲ್ಲೂ ಚಾರು ಎನ್ನುವ ಪದವಿತ್ತೇ? ಇಲ್ಲವೇ ? ನನಗೆ ಗೊತ್ತಿಲ್ಲ. ಏಕೆಂದರೆ ತಮಿಳುಮೂಲದ ಮಾತಾಡುವ (ಕರ್ನಾಟಕದ) ಅಯ್ಯಂಗಾರ್ ತಮಿಳಲ್ಲಿ ರಸಂ ಎನ್ನುವ ಪದವೇ ಉಪಯೋಗವಾಗುತ್ತೆ. ಅದೇ, ಅದಕ್ಕಿಂತ ಕನ್ನಡದ ಪ್ರಭಾವ ಹೆಚ್ಚಿರುವ ನನ್ನ ಮನೆಮಾತಿನಲ್ಲಿ ( ಇದೂ ತಮಿಳು/ಮಲೆಯಾಳ ಮೂಲದ್ದೇ) ಚಾರು ಎನ್ನುವ ಪದ ಬಳಕೆಯಲ್ಲಿದೆ. ಹಾಗಾಗಿ ಒಮ್ಮೊಮ್ಮೆ ಇದು ಕನ್ನಡದಿಂದಲೇ (ನಮ್ಮ ಮನೆ ಮಾತಿಗೆ) ಬಂತೇ ಎಂದು ನನಗನ್ನಿಸಿದೆ.

ಸುನಿಲರು ಹೇಳಿದಂತೆ ಅಪ್ಪಟ ಹದಿನಾರಾಣೆ ಕನ್ನಡದವರೂ ಚಾರು ಎನ್ನುವ ಪದವನ್ನು ಮಕ್ಕಳೊಂದಿಗೆ (ಉದಾ: ಚಾರುಮಮ್ಮು ಕೊಡಲಾ?) ಉಪಯೋಗಿಸುವುದನ್ನು ನಾನೂ ಕಂಡಿದ್ದೇನೆ.

-ಹಂಸಾನಂದಿ