ಹರಿ,

ಇಂತಹ ಉತ್ತಮ ಬರಹವನ್ನ ನಾನೇಕೆ ಬರೆಯಲಿಲ್ಲ ?

ಮತ್ತೆ - ನೀವು ಬರೆದ ಇಷ್ಟು ಹೊತ್ತಿನವರೆಗೆ ಇದನ್ನೇಕೆ ಓದಲಿಲ್ಲ ?

ಪುಸ್ತಕಗಳ ಹಿಂದಿನ ನಿಮ್ಮ ಸವಾರಿ ಬಹಳ ಚೆನ್ನಾಗಿ ಸಾಗಿದೆ. ನನ್ನ ಹಲವು ಅನುಭವಗಳೂ ಹೆಚ್ಚಿಗೆ ನಿಮ್ಮಂತೆಯೇ. ಒಂದು ವ್ಯತ್ಯಾಸವೆಂದರೆ, ನಾನು ಚಿಕ್ಕವನಿರುವಾಗಲೇ, ಅಣ್ಣಂದಿರು ಓದಿ ಉಳಿದಿದ್ದ ಅಮರ ಚಿತ್ರ ಕಥೆಗಳು, ಭಾರತ ಭಾರತಿ ಪುಸ್ತಕ ಸಂಪದ ಮಾಲಿಕೆಯ ಪುಸ್ತಕಗಳು ಬೇಕಾದಷ್ಟಿದ್ದವು. ಹಾಗಾಗಿ ಕಂಡ ಕಂಡ ಸಿಕ್ಕ ಸಿಕ್ಕ ಪುಸ್ತಕವನ್ನು ಓದುವ ಹುಚ್ಚು ನನಗೆ ಯಾವಾಗಲೂ ಇತ್ತು.

ನಮ್ಮೂರಿನ ಪಬ್ಲಿಕ್ ಲೈಬ್ರರಿಯಲ್ಲಿ ಅಮರ ಚಿತ್ರ ಕಥೆಯಂತಹವು ಸಿಗುವುದು ಕನಸಿನ ಮಾತೇ ಆಗಿತ್ತು. ಆ ಕಾಲದಲ್ಲಿನ್ನೂ ಖಾಸಗಿ ಲೈಬ್ರರಿಗಳು ಅಷ್ಟು ಚಲಾವಣೆಯಲ್ಲಿರಲಿಲ್ಲ್ಲ. ಹಾಗಾಗಿ, ಯಾರದಾದರೂ ನೆಂಟರ ಅಥವಾ ಗೆಳೆಯರ ಮನೆಗೆ ಹೋದರೆ, ಅವರ ಮನೆಯಲ್ಲಿ ನಾನು ಓದಿಲ್ಲದ ಯಾವ ಅಮರ ಚಿತ್ರ ಕಥೆ (ಅಥವಾ ಇನ್ಯಾವುದಾದರೂ ಒಳ್ಳೇ ಪುಸ್ತಕ) ಇದೆ ಎಂಬುದನ್ನು ಸದ್ದಿಲ್ಲದೇ ತಪಾಸಣೆ ಮಾಡಿ, ಅಲ್ಲೇ ಎಲ್ಲಾದರೂ ಮೂಲೆ ಸೇರಿ ಓದುತ್ತಾ ಕುಳಿತುಕೊಳ್ಳುತ್ತಿದ್ದೆ. ಎಷ್ಟು ಕೂಗಿದರೂ, ಓ ಎನ್ನದೇ ಇರುತ್ತಿದ್ದೆ ಎನ್ನುವ ದೂರು ನನ್ನ ಮೇಲಿತ್ತು. ಅದರಿಂದ ನನಗೇನೂ ಕೊರಗಿರಲಿಲ್ಲ

ಈಗ ಮೂರು ದಶಕಗಳ ನಂತರ: ಎಷ್ಟು ಕೂಗಿದರೂ ಓ ಎನ್ನುವುದಿಲ್ಲ ಎಂದು ನನ್ನ ಮಗನನ್ನು ಆಗಾಗ ಬೈಯುತ್ತಿರುತ್ತೇನೆ. ಆದರೆ ಅವನ ಪುಸ್ತಕ ಪ್ರೀತಿ ನೋಡಿ ನನಗೆ ಒಳಗೇ ಸಂತೋಷವಾಗುತ್ತೆ, ಮತ್ತೆ ಹಳೆಯ ನೆನಪುಗಳು ಮರುಕಳಿಸುತ್ತೆ, ಅನ್ನೋದನ್ನ ಅವನಿಗೆ ಇನ್ನೂ ಬಿಡಿಸಿ ಹೇಳಿಲ್ಲ. ಅದರ ಮಟ್ಟಿಗೆ ನಾನು ಖಂಡಿತ ಕೊರಗಲಾರೆ

ಅಂದಹಾಗೆ, ಕನ್ನಡದ ಎಷ್ಟೋ ಅಮರ ಚಿತ್ರ ಕಥೆಗಳ narrative ಬರೆದವರು ಶಿವರಾಮ ಕಾರಂತರು ಅನ್ನುವುದು ನನ್ನ ನೆನಪು. ನಿಜ ಹೇಳಬೇಕೆಂದರೆ, ಐದನೆ ತರಗತಿಯ ತನಕ ಇಂಗ್ಲಿಷ್ ಕಲಿಯದ ನನಗೆ ಯಾವತ್ತೂ ಇಂಗ್ಲಿಷ್ ನ ಅಮರ ಚಿತ್ರ ಕಥೆಗಳು ಹಿಡಿಸಲೇ ಇಲ್ಲ. ಹಳೇ ಅಭ್ಯಾಸಗಳನ್ನು ತೊಡೆಯುವುದು ಕಷ್ಟ. ಅಲ್ಲವೇ?

-ಹಂಸಾನಂದಿ
-ಹಂಸಾನಂದಿ
ನನ್ನ (mostly) ಇಂಗ್ಲಿಷ್ ಬ್ಲಾಗ್ - ಅಲ್ಲಿದೆ ನಮ್ಮ ಮನೆ:- http://neelanjana.wordpress.com/