ಶಿವ ಭಕ್ತರಿಗಿಂತ ಹಿರಿಯರಿಲ್ಲ ಎನ್ನುವ ಮಾತಿನಲ್ಲಿ ಶಿವಭಕ್ತರು ಶಿವನಿಗಿಂತ ದೊಡ್ಡವರು ಎಂಬ ಭಾವವಿದೆಯೇ? ಗೊತ್ತಿಲ್ಲ.

ಇನ್ನು ದೇವರು ಇದ್ದಾನೋ ಇಲ್ಲವೋ, ಆದರೆ ದೇವರ ಮೇಲಿನ ನಂಬಿಕೆಯಿಂದಾಗಿ ಜನರು ಎಷ್ಟೆಲ್ಲಾ ಒಳ್ಳೆ ಕೆಲಸ ಮಾಡುತ್ತಾರಲ್ಲವಾ? ಎಷ್ಟು ದತ್ತಿ ಸಂಸ್ಥೆಗಳು ದೇವರ ಹೆಸರಿನಲ್ಲಿ ನಡೆಯುತ್ತಿವೆ, ಶಾಲಾ ಕಾಲೇಜು, ಆಸ್ಪತ್ರೆಗಳು ನಡೆಯುತ್ತಿವೆ ಎನ್ನುವ ವಾದಕ್ಕೆ ಪ್ರತಿಯಾಗಿ ದೇವರ ಹೆಸರಿನಲ್ಲಿ ನಡೆಯುತ್ತಿರುವ ಯುದ್ಧಗಳು, ಮುಗ್ಧರ ಕಗ್ಗೊಲೆಗಳು, ದಯಾಮಯನೆಂದುಕೊಂಡ ದೇವರನ್ನು ನಂಬಿದ ಜನರು ಇತರೆ ಧರ್ಮದವರ ರಕ್ತಕ್ಕಾಗಿ ಪೀಪಾಸುಗಳ ಹಾಗೆ ಕಾತರಿಸುವುದನ್ನು ಕಂಡರೆ ದೇವರಿಗಿಂತಾ ದೇವರನ್ನು ನಂಬುವವರೇ ದೊಡ್ಡವರು ಎಂದು ಹೇಳಬಹುದು!

ಮನುಷ್ಯನ ಅವಲಂಬನೆಗೆ ದೇವರು ಎಂಬುದು ಒಂದು ಸಂಗತಿ ಅಷ್ಟೇ. ಅಕಸ್ಮಾತ್ ಮನುಷ್ಯನ ಸ್ಮೃತಿಕೋಶದಿಂದಲೇ ದೇವರು ಎಂಬ ಸಂಗತಿಯನ್ನು ತೆಗೆದುಹಾಕಿದರೂ ಸಹ ಮನುಷ್ಯ ತನ್ನ ದಾನ, ಧರ್ಮ, ಪುಣ್ಯ, ಪಾಪ, ಧರ್ಮ ಯುದ್ಧ, ಹುತಾತ್ಮ ಮುಂತಾದ ವ್ಯವಹಾರಗಳನ್ನು ಬಿಡುವುದಿಲ್ಲ. ಆಗ ಅವಕ್ಕೆ ನೈತಿಕತೆ, ಆದರ್ಶ, ಎಡ-ಬಲ ಪಂಥೀಯತೆಗಳು ಅವಲಂಬನೆಯ ಸಂಗತಿಯಾಗುತ್ತವೆ. ದೇವರು, ಪಂಥ ಯಾವುದೂ ಮೂಲ ಸಮಸ್ಯೆಯಲ್ಲ ಮೂಲ ಸಮಸ್ಯೆಯಿರುವುದೇ ಮನುಷ್ಯನಲ್ಲಿ... ಎಂಬುದು ನನ್ನ ಅಭಿಪ್ರಾಯ. ನೀವೇನಂತೀರಿ?
_______________________
ಅಸಾಮಾನ್ಯವಾದ ಕೆಲಸಗಳನ್ನು ನಾವು ಮಾಡೋಕಾಗಲ್ಲ. ನಾವೇನಿದ್ದರೂ ಸಾಮಾನ್ಯ ಕೆಲಸವನ್ನು ಅಸಾಮಾನ್ಯ ಪ್ರೀತಿಯಿಂದ ಮಾಡಬಹುದು.
http://uniquesupri.wordpress.com
http://kalaravapatrike.wordpress.com
http://ekshanadasatya.wordpress.com