*** ದಯವಿಟ್ಟು ತಪ್ಪು ತಿಳಿಯಬೇಡಿ, ನಿಮ್ಮನ್ಯಾರ್ನೂ ನಾನು ದೂರುತ್ತಿಲ್ಲ. ***

ಇದೆಲ್ಲ ಓದ್ತಾ ಹೋದ್ರೆ ಬೆಂಗಳೂರಿನಲ್ಲಿರುವ ನಿಮಗೆಲ್ಲರಿಗೂ, ಅಮೇರಿಕದಲ್ಲಿರುವ ನಮಗೆಲ್ಲರಿಗೂ ವ್ಯತ್ಯಾಸವೇ ಕಾಣುತ್ತಿಲ್ಲ. ಅಯ್ಯೊ, ತಾಯ್ನಾಡಿನಲ್ಲೂ ಇನ್ನು ಕನ್ನಡ ಉಳಿಯದೆ ಹೋಗಬಹುದು ಎಂದು ವ್ಯಥೆ ಪಡಬೇಕೋ ಅಥವ ಇನ್ಮೇಲೆ ಎಲ್ಲಿದ್ರೂ ಒಂದೆ, ನಮ್ಮ ಮಕ್ಕಳಿಗೆ ಕನ್ನಡ ಬರೋದಿಲ್ಲಾಂತ ಪಾಪಪ್ರಜ್ಞೆಯಲ್ಲಿ ಬದುಕಬೇಕಾಗಿಲ್ಲಾಂತ ಸಂತೋಷಪಡಬೇಕೋ ತಿಳಿತಾಯಿಲ್ಲ.

ವರುಣ್ ಹೇಳಿದಂತೆ ನನಗೆ ತಿಳಿದಿರುವ ಸುಮಾರು ತರುಣ/ತರುಣಿಯರಿಗೆ ಕನ್ನಡ ಸರಿಯಾಗಿ ಓದಲು ಬರುವುದಿಲ್ಲ(ಶಾಲೆಯಲ್ಲಿ ಕನ್ನಡ ಓದಿದ್ದರೂ!). ಇಂಗ್ಲೀಶ್ ಬ್ಲಾಗ್ ಹೊಂದಿರುವವರಿಗೆ ಇಲ್ಲಿ ಬ್ಲಾಗಿಸಲು ಕರೆದರೆ, ಅಯ್ಯೊ, ಕನ್ನಡದಲ್ಲಿ ಬೇಗ ಓದುವುದೇ ಕಷ್ಟ, ಇನ್ನು ಬರೆಯೋದಂತೂ ದೂರದ ಮಾತು ಅಂತ ತಳ್ಳಿಹಾಕುತ್ತಾರೆ. ಇವರು ಮಾತನಾಡುವುದಂತು ಕಂಗಳೀಶೆ. ಇದು ಈಗಿನ ೧೮-೨೦ ವಯಸ್ಸಿನ ಯುವ ಜನಾಂಗ. ಇವರು ಮುಂದೆ ತಮಗೇನೆ ಸರಿಯಾಗಿ ಬರದ ಕನ್ನಡವನ್ನು ತಮ್ಮ ಮಕ್ಕಳಿಗೆ ನಿಜಕ್ಕೂ ಮನೆಯಲ್ಲಿ ಹೇಳಿಕೊಡುತ್ತಾರ? ಇವರ ಮಕ್ಕಳು ಕನ್ನಡವನ್ನು ಅಜ್ಜಿ, ತಾತ, ಕೆಲಸದವರು, ದಾದಿಯರು ಅಥವ ಶಾಲೆಯಿಂದ ಕಲಿತರೆ ಉಂಟು, ಇಲ್ಲದಿದ್ದರೆ ಇಲ್ಲ.

ಕನ್ನಡ ಮೀಡಿಯಂ ಕಡ್ಡಾಯ ಮಾಡಬೇಕಾಗಿಲ್ಲ, ಆದರೆ, ಕನ್ನಡ (ಎರಡನೆಯ ಅಥವ) ಮೂರನೆಯ ಭಾಷೆಯನ್ನಾಗಿ ಕಲಿಯುವುದನ್ನು ಕಡ್ಡಾಯ ಮಾಡಿದರೆ ಕನ್ನಡ ಚೂರುಪಾರು ಉಳಿದೀತು. ಇಲ್ಲದಿದ್ದರೆ, ವಿದೇಶಕ್ಕೂ ಕರ್ನಾಟಕಕ್ಕೂ ವ್ಯತ್ಯಾಸವೇ ಇರುವುದಿಲ್ಲ. ಇದನ್ನು ನಾನಿಲ್ಲಿ ಕೂತು ಹೇಳುವುದಕ್ಕಿಂತ ಅಲ್ಲಿನ ಜನರೇ ನಿರ್ಧರಿಸಬೇಕು.

~ಕಲ್ಪನ