ಸಬೀರ ಭಾಟಿಯಾ ಬಗ್ಗೆ ಒಂದು ರಸವತ್ತಾದ ಘಟನೆ. ಇದು ಆಗಿದ್ದು ಸುಮಾರು 1995ರ ಆಸುಪಾಸಿನಲ್ಲಿ ಇರಬಹುದು. ಆಗ ತಾನೆ ಭಾರತದಲ್ಲಿ ಇಂಟರ್ ನೆಟ್ ಪ್ರವೇಶಿಸಿತ್ತು. ಬೆಂಗಳೂರಿನ ಮಹಾತ್ಮಾ ಗಾಂಧಿ ರಸ್ತೆಯಲ್ಲಿ ಮೊದಲ ಬ್ರೌಸಿಂಗ್ ಸೆಂಟರ ತೆರೆದಿತ್ತು. ಆಗ ಜನರಿಗೆ ಕಂಪ್ಯೂಟರೆ ಬಳಕೆ ಅಷ್ಟು ಗೊತ್ತಿಲ್ಲದ ಕಾರಣ, ಆ ಸೆಂಟರನ ಜನ ಬಂದವರಿಗೆ ಇಂಟರ್ನೆಟ್ ಬಳಕೆಯ ಬಗ್ಗೆ ಚಿಕ್ಕದಾಗಿ ವಿವರಿಸುತ್ತಿದ್ದರು.

ಅದೇ ಕಾಲಕ್ಕೆ ಸಬೀರ ಭಾಟಿಯಾ ಬೆಂಗಳೂರಿಗೆ ಬಂದಿದ್ದ. ಬೆಂಗಳೂರಿಗೆ ಬಂದವನು ಆ ಬ್ರೌಸಿಂಗ್ ಸೆಂಟರಿಗೂ ಕಾಲಿರಿಸಿದ. ಅಲ್ಲಿ ಖಾಲಿ ಇರುವ ಯಾವುದೋ ಕಂಪ್ಯೂಟರನ ಮುಂದೆ ಕುಳಿತ ತಕ್ಷಣ ಮಧ್ಯವಯಸ್ಕರೊಬ್ಬರು ಬಂದರು. ಬಂದು ಹೇಗೆ ಬ್ರೌಸರ ತೆರೆಯುವುದು, ಹೇಗೆ ಹಾಟಮೇಲ್ ತೆರೆಯುವುದು, ಓದುವುದು, ಉಪಯೋಗಿಸುವುದು ಎಂಬ ಬಗ್ಗೆ 5 ನಿಮಿಷದವರೆಗೆ ಭಾಷಣ ಬಿಗಿದರು. ಕಕ್ಕಾಬಿಕ್ಕಿಯಾಗಿ ಕುಳಿತ ಸಬೀರನಿಗೆ ಏನಾದರು ಮಾತನಾಡಿದ್ದರೆ ಕೇಳಿ! ಹಾಟಮೇಲ್ ಕರ್ತೃನಿಗೆ ಅದರ ಉಪಯೋಗದ ಬಗ್ಗೆ ಉಪದೇಶ. ಇದನ್ನು ಸಬೀರ ಯಾವುದೋ ಸಂದರ್ಶನದಲ್ಲಿ ಹೇಳಿದ್ದರು.
-----
ಶಶಿಧರ