ನಾಡಿಗ್ ಅವರು ಕರ್ನಾಟಕದ ಎಲ್ಲ ಜಿಲ್ಲೆಗಳೂ ಹಿಂದುಳಿದವೇ ಎಂದರೂ, ಉತ್ತರ ಕರ್ನಾಟಕದ ಕಥೆ ತೀರ ಬೇರೆ. ಹೈದರಾಬಾದ್ ಕರ್ನಾಟಕ ಎಂದು ಕರೆಯುವ ನಾಲ್ಕು ಜಿಲ್ಲೆಗಳಿಗೆ ಸ್ವಾತಂತ್ರ್ಯ ಬಂದದ್ದು ಒಂದು ವರ್ಷ ತಡವಾಗಿ, ೧೯೪೮ರಲ್ಲಿ. ಅಲ್ಲಿನ ಜೀವನ ಕ್ರಮ, ಆಹಾರ ಪದ್ಧತಿ, ವ್ಯವಸಾಯದ ನೆಲ, ನೀರಿನ ಕೊರತೆ, ಬಡತನ, ಜಮೀನುದಾರರ ಅಟ್ಟ ಹಾಸ, ಇವೆಲ್ಲ ನಾವು ಊಹಿಸಿಕೊಳ್ಳುವುದೂ ಸಾದ್ಯವಿಲ್ಲ. ಅಷ್ಟೇ ಏಕೆ, ಧಾರವಾಡದ ಭಾಷೆ ನಮ್ಮ ಸಿನಿಮಾಗಳಲ್ಲಿ, ಬಹುತೇಕ ಬರವಣಿಗೆಗಳಲ್ಲಿ ಹಾಸ್ಯದ ಮೂಲವಾಗಿದೆಯಲ್ಲವೆ? ಶಿಕ್ಷಣವೂ ಅಷ್ಟೆ, ಬೆಳೆಯಬೇಕಾದದ್ದು ಬಹಳವಿದೆ. ಮುಖ್ಯವಾದ ಮಾತೆಂದರೆ ಕರ್ನಾಟಕದ ದಕ್ಷಿಣದ ಭಾಗದಂತೆ ಉತ್ತರದ ಭಾಗ ಆಧುನಿಕತೆಗೆ ಮತ್ತು ಪಾಶ್ಚಾತ್ಯ ಪ್ರಭಾವಗಳಿಗೆ ತೆರೆದುಕೊಂಡಿಲ್ಲ. ನಮಗೂ ಆ ಅವಕಾಶ ಕೊಡಿ ಎಂಬುದು ಅವರ ಬೇಡಿಕೆ.