ಧನ್ಯವಾದಗಳು ಇಸ್ಮಾಯಿಲ್ ರವರೆ.
ನನ್ನ ಈ ಮೊದಲಿನ ಪ್ರತಿಕ್ರಿಯೆಗಳಲ್ಲಿ [Quote]ಒಂದು ಸೈದ್ಧಾಂತಿಕ ಬದ್ಧತೆಯೊಂದಿಗೆ ನವ ಉದಾರವಾದೀ ಜಾಗತೀಕರಣ ಜ್ಞಾನದ ಪ್ರಸರಣಕ್ಕೆ ಅಡ್ಡಿಯಾಗುವಂತೆ ರೂಪಿಸುತ್ತಿರುವ ನೀತಿಗಳ ವಿರುದ್ಧ ತಮ್ಮದೇ ಆದ ಮಾರ್ಗದಲ್ಲಿ ಸೆಣಸುತ್ತಿರುವ ಮುಕ್ತ ತಂತ್ರಾಂಶ ಕಾರ್ಯಕರ್ತರನ್ನು ದೂಷಿಸಿದ್ದು[/Quote] - ಈ ರೀತಿ ಯಾರತ್ತಲೂ ಬೊಟ್ಟು ಮಾಡಿ ತೋರಿಸಿ ನಾನು ಹೇಳುತ್ತಿರುವುದಷ್ಟೇ ಸರಿ ಎಂದು ಸಾಧಿಸುವುದಷ್ಟೇ ನನ್ನ ಉದ್ದೇಶವಾಗಿರಲಿಲ್ಲ. ನನ್ನ ಆಶಯ ಕೇವಲ "ಅತ್ಯಂತ ಅಗತ್ಯವಿರುವುದು ಆಗಿಲ್ಲ" ಎಂಬುದರ ಬಗ್ಗೆ ಗಮನ ಸೆಳೆಯುವುದಷ್ಟೇ ಆಗಿತ್ತು. ಸಮಾನಾಸಕ್ತರ ನಡುವೆ Reflective ಆದಂತಹ ಒಂದು ಆರೋಗ್ಯಕರ ಸಂವಾದವನ್ನು ಹುಟ್ಟುಹಾಕುವುದಷ್ಟೇ ನನ್ನ ಉದ್ದೇಶವಾಗಿತ್ತು. ಈ ಆಶಯವನ್ನು ಸಮರ್ಥವಾಗಿ ಕಟ್ಟಿಕೊಡುವಲ್ಲಿ ನಾನು ಎಡವಿದ್ದರೆ ಅದಕ್ಕೆ ಕ್ಷಮೆ ಕೋರುತ್ತೇನೆ.
ದ್ರುಪಾಲ್ ನ ವಿಷಯದಲ್ಲೂ ತಪ್ಪು ನುಸುಳಿದೆ. ಕ್ಷಮೆಯಿರಲಿ. ಆದರೆ ನಮ್ಮ ನೆಲದ ಅಗತ್ಯಗಳನ್ನು ಗಮನದಲ್ಲಿರಿಸಿಕೊಂಡು ಆದಂತಹ ಪ್ರಯತ್ನ ಇದಲ್ಲ ಎಂಬುದು ನನ್ನ ವಾದವಷ್ಟೇ. ಇದನ್ನು ಸಂಪೂರ್ಣವಾಗಿ ಕನ್ನಡಕ್ಕೆ ಕಸ್ಟಮೈಸ್ ಮಾಡುವುದಾದರೆ ಅದಕ್ಕಿಂತ ಸಂತೋಷದ ವಿಷಯ ಮತ್ತೇನಿದೆ. ಅಂತಹ ಪ್ರಯತ್ನಗಳನ್ನು ನಾನೂ ಸ್ವಾಗತಿಸುತ್ತೇನೆ. ಆದರೆ ಇಲ್ಲಿಯವರೆಗೂ ಅದು ಆಗಿಲ್ಲ ಎಂಬುದು ಸತ್ಯ.
ಇನ್ನು ಜಿಪಿಎಲ್ ವಿಚಾರಕ್ಕೆ ಬಂದಾಗ ಈ ಹಿಂದೆ ಹೇಳಿದಂತೆ ಇದು ಡೆವಲಪರ್‍ಗಳ ಸಮುದಾಯದಲ್ಲಿ ಚರ್ಚಿತವಾಗಬೇಕದ್ದಷ್ಟೇ. ಹಾಗೆಂದೇನು ಜಿಪಿಎಲ್ ನಲ್ಲಿ ಹೊರತರುವ ಯೋಚನೆಗಳನ್ನು ಸಂಪೂರ್ಣವಾಗಿ ತಳ್ಳಿಹಾಕಿಯೇನು ಇಲ್ಲ. ಯಾವುದೇ ರೀತಿಯ "dedicated ಸಮುದಾಯ" ರೂಪುಗೊಳ್ಳದೆ ಇದನ್ನು ತಂದು ಜಿಪಿಎಲ್ ನಲ್ಲಿ ಬಿಡುಗಡೆ ಮಾಡಿದರೆ, ಅದನ್ನಭಿವೃದ್ಧಿಪಡಿಸಿದವರಿಗೂ ನ್ಯಾಯ ಸಲ್ಲುವುದೇ... ಓಪನ್ ಸೋರ್ಸ್ ಕಮ್ಯುನಿಟಿಯ ಕಾರ್ಯಗಳೂ ನಮ್ಮ ಅತ್ಯಂತ ಜರೂರಾದ ಅಗತ್ಯಗಳನ್ನು ಗಮನಕ್ಕೆ ತೆಗೆದುಕೊಳ್ಳುವಲ್ಲಿ ಎಡವಿದರೆ ಅಷ್ಟರ ಮಟ್ಟಿಗೆ Technical Elitismಗೆ ನಾಂದಿ ಹಾಡಿದಂತಲ್ಲವೇ...
Open Office ತಂತ್ರಾಂಶದ ಮೂಲಕ ಕನ್ನಡದಲ್ಲಿ ಕಚೇರಿ ತಂತ್ರಾಂಶವನ್ನು ಅಭಿವೃದ್ಧಿ ಪಡಿಸುವ ಪ್ರಯತ್ನವಾಗಿರುವುದನ್ನು ಗಮನಿಸಿದ್ದೇನೆ. ಅದರ ಬಗ್ಗೆ ನನ್ನ ಅನುಭವವನ್ನೂ ಹೇಳಿಬಿಡುತ್ತೇನೆ. ಸದ್ಯಕ್ಕಂತೂ ಅದರಲ್ಲಿ ಒಂದು ಡಾಕ್ಯುಮೆಂಟ್ ತೆರೆದರೆ ಅದು ನುಂಗುವ ರಿಸೋರ್‍ಸುಗಳು ಇತರ ಯಾವುದೇ ಅಪ್ಲಿಕೇಷನ್ ತೆರೆಯಲು ಬಿಡುವುದಿಲ್ಲ. ನುಡಿ/ಬರಹದ ಹೊರತಾದ ಆಪ್ಷನ್ನುಗಳು ಕನ್ನಡದಲ್ಲಿ ನನಗೀಗಲೂ ಇಲ್ಲ ಎಂಬುದು ಸತ್ಯ. ಇನ್ನು ಯೂನಿಕೋಡಿನ ಕಡೆಗೊಮ್ಮೆ ನೋಡಿದರೆ, ಎದ್ದು ಕಾಣುವ ಫಾಂಟುಗಳ ಕೊರತೆ... ಸಂಪಿಗೆ, ಕೇದಗೆ ಇದ್ದಾವೆ...ಆದರೆ ಅವೂ ಬಗ್ ಗಳಿಂದ ಹೊರತಾಗಿಲ್ಲ. ಅಷ್ಟರ ಮಟ್ಟಿಗೆ ಒಂದು ಬಗ್ ಫ್ರೀ ಫಾಂಟಿನ ಅಗತ್ಯವನ್ನು ಬದಿಗಿರಿಸಿದಂತಲ್ಲವೆ... ಈ ದಿಸೆಯಲ್ಲಿ ಯೋಚನೆ ಹರಿದರೆ ಚೆನ್ನ.

ರೋಹಿತ್.