ನಾಯಿಗೆ ಅನ್ವರ್ಥನಾಮಕರಣ ಮಾಡುವುದೂ ಅಪರೂಪವೇನಲ್ಲ; ಉದಾ:

ಕಪ್ಪನೆಯ ನಾಯಿ - ಕರಿಯ
ಕೆಂಪು ನಾಯಿ - ಕೆಂಚ
ರೋಷದ ನಾಯಿ - ಭೈರ, ಕಾಳ, ನಾಗ ಇತ್ಯಾದಿ ಸಿನಿಮಾ ರೌಡಿ ಹೆಸರು.
ಚಿಕ್ಕ ನಾಯಿ - ಚಿಕ್ಕ
ಹೊಟ್ಟೆ ಉಬ್ಬಿದ ನಾಯಿ - ಡುಬ್ಬಿ
ದೈವ ಸ್ವರೂಪಿ ನಾಯಿಗಳು - ಎಂಕ, ನಾಣಿ, ಸೀನ, ದತ್ತ...ಇತ್ಯಾದಿ ಇತ್ಯಾದಿ

ಇವೆಲ್ಲ ಗಂಡು ನಾಯಿಯ ಹೆಸರುಗಳಾದರೂ, ಹೆಣ್ಣು ನಾಯಿಗೂ ಸ್ವಲ್ಪ ಇದೇ ಹೋಲಿಕೆಯ ಹೆಸರುಗಳಿವೆ. ಮೈಮೇಲೆಲ್ಲ ಚುಕ್ಕೆಗಳಿಗಿರುವ ನಮ್ಮ ಬೀದಿ ನಾಯೊಂದನ್ನು ಎಲ್ಲರೂ ಚಿಕ್ಕ ಎನ್ನುತ್ತಿದ್ದರು. ನಮ್ಮ ಮನೆಗೆ ಬಂದ ಚಿಕ್ಕ ಹುಡುಗನೊಬ್ಬ ಅದನ್ನು ಕರೆಯುತ್ತಾ ''ಚಿಕ್ಕ ಚಿಕ್ಕ ಚಿಕ್ಕ... ತ್ಚು ತ್ಚು ತ್ಚು.... ಬಾ ಬಾ ಬಾ..'' ಎಂದು ಎಷ್ಟು ಕರೆದರೂ ಬಾರದೆ ಕೋಪಗೊಂಡು " ಲೇಯ್, ಮೈಮೇಲೆಲ್ಲ ಚುಕ್ಕೆ ಚಿಕ್ಕ..ಬಾರೋ" ಎಂದು ಕಿರುಚತೊಡಗಿದಾಗ, ಮೆಲ್ಲನೆ ಪಕ್ಕದ ಮನೆಯ ಕಿಟಕಿ ತೆರೆದು ಚಿಕ್ಕೇಗೌಡರು ಇಣುಕಿದ್ದನ್ನು ಕಂಡು ನಮಗೆ ನಗು ತಡೆಯಲಾಗಲಿಲ್ಲ. ಚಿಕ್ಕೇಗೌಡರ ಮುಖದ ಮೇಲೆ ಮೊಡವೆಯ ಚುಕ್ಕೆಗಳು ಕಲೆಗಳಾಗಿ ಉಳಿದಿದ್ದವು. ಚುಕ್ಕೆ ಚಿಕ್ಕ ಬಾರೋ ಎಂದದ್ದು ಕೇಳಿ ಅವರಿಗೆ ಮೊದಲು ಭಯವಾಯ್ತೇನೋ; ನಿಜವಿಚಾರ ತಿಳಿದು ಹಲ್ಕಿರಿದು ಕಿಟಕಿಯ ಕದವಿಕ್ಕಿದರು! ಮೊದಲು ಹುಡುಗನನ್ನು ಒಳಗೆಳೆದು ತಂದದ್ದಾಯಿತು!
ಇನ್ನೊಮ್ಮೆ "ಭೈರ ಭೈರ.." ಎಂದು ನಾಯಿಯನ್ನು ಕರೆಯುತ್ತಿದ್ದರೆ, ದಾರಿಹೋಕ - ನಮ್ಮಜ್ಜಿಯ ಸಹಪಾಠಿ ಭೈರಾಭಟ್ಟರು ದುರುಗುಟ್ಟಿ ನೋಡಿ ದೂರು ಕೊಡಲು ಒಳಗೇ ಬರಬೇಕೆ? ಅದರಿಂದುತ್ತೇಜಿತರಾಗಿ ಮಕ್ಕಳು ನಾಯಿ ಇಲ್ಲದಿದ್ದರೂ ಭಟ್ಟರನ್ನು ಕಂಡರೆ ಎಲ್ಲೋ ನೋಡಿಕೊಂಡು 'ಭೈರ ಭೈರ' ಎನ್ನಲು ಶುರು ಮಾಡಿದ್ದರು.

ನಿಮ್ಮ

ಬೆನಕ