ನಿಮ್ಮ ಮೆಕ್ಯಾನಿಕ್ ಮೆಕ್ಯಾನಿಕಲ್ ಇಂಜಿನಿಯರಿಂಗಿಗೆ ಸಂಬಂಧಪಟ್ಟ ಇಂಗ್ಲೀಷ್ ಪದಗಳನ್ನು ಉಪಯೋಗಿಸುತ್ತಾನೆಯೇ ಹೊರತು ಇಂಗ್ಲೀಷ್ ಸಂಸ್ಕೃತಿಯ ಪ್ರಭಾವದಿಂದ ಮಾತನಾಡುವುದಿಲ್ಲ. ಅಂದರೆ ಈ ರೀತಿ ಮಾತನಾಡುವುದು ನಮ್ಮ ನಿಮ್ಮಂಥವರು ಎಂದಾಯಿತಲ್ಲವೇ. ಅಂದರೆ ಸಮಸ್ಯೆ ಇರುವುದು ಬೌದ್ಧಿಕ ಸರ್ಕಸ್ಸಿನ ಆನಂದಕ್ಕಾಗಿ ತುಡಿಯುವವರದ್ದೇ ಹೊರತು ಕನ್ನಡ ಬಳಸುವ ಸಾಮಾನ್ಯನದ್ದಲ್ಲ ಎಂಬುದು ಸರಿಯೇ ಆಯಿತಲ್ಲವೇ?

ಇನ್ನು ನೀವು ನೀಡಿರುವ ಉದಾಹರಣೆಗಳಿಗೆ ನಾನು ಪ್ರತಿಕ್ರಿಯಿಸಲು ಹೋಗುವುದಿಲ್ಲ. ಆಡು ನುಡಿಯಲ್ಲಿ ಹೀಗಿರುವುದನ್ನು ನಾನು ಯಾವತ್ತೂ ಗಮನಿಸಿಲ್ಲ. ನಾನು ವ್ಯಾಕರಣ ವಿರೋಧಿಯೂ ಅಲ್ಲ. ನನ್ನ ನಿಲುವು ಬಹಳ ಸರಳ. ಭಾಷೆ ಸ್ಥಾಯಿ ಅಲ್ಲ. ಅದು ಕಾಲ ಧರ್ಮಕ್ಕೆ ಸ್ಪಂದಿಸುವ, ಬದಲಾಗುವ, ಹೊಸ ರೂಪ ಪಡೆಯುವ ಸಂವಹನ ಮಾಧ್ಯಮ. ನೀವು ಹೇಳುತ್ತಿರುವ ಇಂಗ್ಲಿಷ್ ಸಂಸ್ಕೃತಿ ಕೂಡಾ ಒಂದು ಆರ್ಥಿಕ ಅಗತ್ಯದ ಪರಿಣಾಮ ಎಂಬುದನ್ನು ನಾವು ಮರೆಯಬಾರದು. ಕನ್ನಡ ಈ ಒತ್ತಡವನ್ನು ಬ್ರಿಟಿಷ್ ಆಡಳಿತದ ದಿನಗಳಿಂದಲೂ ಎದುರಿಸಿದೆ. ಉಳಿದುಕೊಂಡಿದೆ. ಇದು ಎಲ್ಲಾ ಭಾರತೀಯ ಭಾಷೆಗಳಿಗೂ ಅನ್ವಯಿಸುತ್ತದೆ.

ಇನ್ನು hold ಮಾಡುವುದು ಮುಂತಾದ ಪ್ರಯೋಗಗಳಿಗೆ ಸಂಬಂಧಿಸಿ ನಾನು ನನ್ನ ಲೇಖನದಲ್ಲಿಯೇ ಉತ್ತರಿಸಿದ್ದೇನೆ. ಅನ್ಯ ಭಾಷೆಯ ಪದಗಳನ್ನು ಒಂದು ಭಾಷೆ ಸ್ವೀಕರಿಸುವುದು ತನ್ನಲ್ಲಿ ಇಲ್ಲದ ಪರಿಕಲ್ಪನೆಗಳ ಅಭಿವ್ಯಕ್ತಿಗೆ ಮಾತ್ರ. ಇಸ್ಕೂಲು-ಶಾಲೆ ಉದಾಹರಣೆ ಗಮನಿಸಿ. ಹೀಗೆ ಸ್ವೀಕಾರಕ್ಕೊಂದು ನಿಯಮವಿದೆ. ಬಸ್ಸು, ರೈಲುಗಳು ಉಳಿದಂತೆ ಗಟ್ಟಿಯಾಗಿರುವವರು ಉಳಿಯುತ್ತವೆ. ಇಲ್ಲದೇ ಇರುವವು ಅಳಿಯುತ್ತವೆ. ಇದನ್ನು ನಾನು ಇಂಗ್ಲಿಷ್ ಆಕ್ರಮಣ ಎಂದು ಭಾವಿಸಬೇಕಾಗಿಲ್ಲ.