ಕನ್ನಡದ ಅಭಿವೃದ್ಧಿಗೆ ಕನ್ನಡ ನಾಡಿನ ಒಳಗಿರುವವರು ಮತ್ತು ಹೊರಗಿರುವವರು ವಿಶೇಷವಾದ ಏನನ್ನೂ ಮಾಡಬೇಕಾಗಿಲ್ಲ. ಹೀಗೆ ಸುಮ್ಮನೆ ಕನ್ನಡದಲ್ಲಿ ಗುದ್ದಾಡಿದರೂ ಸಾಕಾಗುತ್ತದೆ. ಇನ್ನು ಎನ್ ಆರ್ ಐ ಕನ್ನಡ ಉಳಿಸುವಿಕೆಗೆ ಸಂಬಂಧಿಸಿದಂತೆ ಒಂದು ಸ್ಪಷ್ಟೀಕರಣ ಇದೆ. ಇದನ್ನು ಎನ್ ಆರ್ ಐಗಳನ್ನು ದೂಷಿಸಲು ಅಥವಾ ಟೀಕಿಸಲು ಬಳಸಿದ್ದಲ್ಲ. ನಾಡಿನಿಂದ ಹೊರಗಿರುವವರಿಗೆ ನಾಡಿನ ಮೇಲಿ ಪ್ರೀತಿ ಉಕ್ಕುವುದು ಸಹಜ. ಈ ಪ್ರೀತಿ ಕೆಲವು ಭಾವುಕ ಅತಿರೇಕಗಳಿಗೆ ಕಾರಣವಾಗುತ್ತದೆ. ಕನ್ನಡ ಹಾಳಾಗುತ್ತಿದೆ ಎಂಬ ಅಭದ್ರತೆ ಕಾಡುವುದು ಇಂಥ ಎನ್ ಆರ್ ಐ ಮನಸ್ಥಿತಿಯಲ್ಲಿ ಎಂಬುದನ್ನು ನಾನು ಹೇಳಿದ್ದೇನಷ್ಟೇ. ಇನ್ನು ಬೌದ್ಧಿಕ ಕಸರತ್ತಿಗೆ ಸಂಬಂಧಿಸಿದ ವಿಷಯ. ಈ ಪದ ಬಳಕೆಯಿಂದ ನೋವಾಗಿದ್ದರೆ ಕ್ಷಮೆ ಯಾಚಿಸುತ್ತೇನೆ. ಆದರೆ ಆ ನಿಲುವಿಗೆ ನಾನು ಈಗಲೂ ಬದ್ಧನಾಗಿದ್ದೇನೆ. ಏಕೆಂದರೆ ಈ ಬಗೆಯ ಚರ್ಚೆಗಳನ್ನು ನಡೆಸುವ ನನಗೂ ಕನ್ನಡದ ಅಳಿವು-ಉಳಿವು ಒಂದು ಸಾಮಾಜಿಕ, ರಾಜಕೀಯ, ಆರ್ಥಿಕ ಅಗತ್ಯವಾಗಿಲ್ಲ. ಆ ಕಾರಣದಿಂದಾಗಿಯೇ ನಮ್ಮದು ಕೇವಲ ಕಾಫಿ ಶಾಫ್ ಸೋಶಿಯಲಿಸಂ ತರಹ ಕಾಣಿಸುತ್ತದೆ. ಈ ಮಾತುಗಳು ನನ್ನದೇ ನಿಲುವಿನ ವಿಮರ್ಶೆ ಕೂಡಾ.