ಭಾಷೆಗೆ ಸಂಬಂಧಿಸಿದ ಚರ್ಚೆ ಆರಂಭಿಸುವುದೆಂದರೆ ಹೆದರಿಕೆಯಾಗುತ್ತದೆ. ತುಂಬಾ ಲ್ಯಾಂಡ್ ಮೈನ್ಸ್ ಇರುವ ಸ್ಥಳ ಇದು. ಬರೆಹ ಮತ್ತು ಮಾತಿನ ಮಧ್ಯೆ ಇರುವ ವ್ಯತ್ಯಾಸಕ್ಕೆ ಬಹಳ ಮುಖ್ಯ ಕಾರಣವೊಂದಿದೆ. ನೇರವಾಗಿ ಸಂಭಾಷಿಸುವಾಗ ನಮ್ಮ ಧ್ವನಿಯ ಏರಿಳಿತ, ಬಾಡಿ ಲಾಂಗ್ವೇಜ್ ಕೂಡಾ ಕೆಲ ಹಂತದ ಸಂವಹನವನ್ನು ಸಾಧಿಸುತ್ತಿರುತ್ತದೆ. ದೂರವಾಣಿಯನ್ನು ಬಳಸುವಾಗ ಧ್ವನಿಯ ಏರಿಳಿತಗಳು ಮುಖ್ಯವಾಗುತ್ತವೆ. ಎದುರೆದುರು ಕುಳಿತು ಮಾತನಾಡುವಾಗ ಮಧ್ಯೆ ಇರುವ ಮೌನಕ್ಕೂ, ದೂರವಾಣಿಯಲ್ಲಿ ಮಾತನಾಡುವಾಗ ಬಳಕೆಯಾಗುವ ಮೌನದ ನಡುವೆ ವ್ಯತ್ಯಾಸವಿದೆಯಲ್ಲವೇ.

ಬರೆಹದಲ್ಲಿ ಧ್ವನಿಯ ಏರಿಳಿತಕ್ಕೆ ಅವಕಾಶವೇ ಇಲ್ಲ. ಪದಗಳನ್ನು ಅವುಗಳ ತಥಾಕಥಿತ ಪ್ರಮಾಣೀಕೃತ ಅರ್ಥಗಳಲ್ಲಿ ಮಾತ್ರ ಬಳಸಬೇಕಾಗುತ್ತದೆ. ಈ ವ್ಯತ್ಯಾಸವನ್ನು ಓಎಲ್ಎನ್ ಸಹಜ ಮತ್ತು ಕೃತಕ ಎಂದು ವಿಭಜಿಸಿದ್ದಾರೆಂದು ನನ್ನ ಭಾವನೆ.

-ಇಸ್ಮಾಯಿಲ್