ಗೆಳೆಯರೇ,
ಪ್ಲೂಟೊ ಎಂಬ ಮಾಜಿ ಒಂಬತ್ತನೇ ಗ್ರಹವನ್ನು ಮೊದಲು ಕಂಡುಹಿಡಿದವನು ಭಾರತೀಯನೆಂದು ಮೊನ್ನೆ ಕನ್ನಡಪ್ರಭದಲ್ಲಿ ಸುದ್ದಿ ನೋಡಿ ತಿಳಿಯಿತು. ಆತ ಬೇರಾರೂ ಅಲ್ಲ, ಹೆಸರಾಂತ ಖಗೋಲಶಾಸ್ತ್ರಜ್ಞ ಶ್ರೀ. ವೆಂಕಟೇಶ ಕೇತಕರ್. ಭಾರತೀಯ ಪಂಚಾಂಗ ಗಣನೆಗೆ ತಳಹದಿಯಾದ ನಿರಯಣ ರಾಶಿಚಕ್ರ ಅಥವಾ ಫಿಕ್ಸೆಡ್ ಜೋಡಿಯಾಕ್ ಅನ್ನು ಲೆಕ್ಕಹಾಕಲು ಬೇಕಾದ 'ಅಯನಾಂಶ'ವನ್ನು ಒಬ್ಬೊಬ್ಬರು ಒಂದೊಂದು ರೀತಿಯಲ್ಲಿ ನಿರ್ಧರಿಸುತ್ತಿದ್ದಾಗ, ಅಚ್ಚರಿಯುಂಟುಮಾಡುವಂತೆ ಕೇತಕರರು ನಿಖರವಾದ ತಮ್ಮ 'ಕೇತಕೀಯ ಧನಾಯನಾಂಶ'ವನ್ನು ಪ್ರಕಟಿಸಿದರು. ಇದು ಜ್ಯೋತಿಷವಲಯದಲ್ಲೇ ಬೊಬ್ಬೆ ಎಬ್ಬಿಸಿದ ಘಟನೆ! ಕೇತಕರರು ಯಾವುದನ್ನು 'ನಿಖರ'ವೆಂದು ಹೇಳಿದ್ದರೋ ಅದು ಕೇವಲ ಕಲ್ಪಿತವಾಗಿದ್ದು, ಕಾಕತಾಳೀಯವಾಗಿ ಅಯನಾಂಶ ಒಂದೆರಡು ವರ್ಷಗಳಿಗೆ ಹೊಂದುತ್ತಿತ್ತು ಅಷ್ಟೇ. ಇದನ್ನೆಲ್ಲ ಮನಗಂಡ ಭಾರತ ದಿನದರ್ಶಿ ಸಮಿತಿ, ಶ್ರೀ. ಎನ್.ಸಿ.ಲಹಿರಿ ಅವರ ಮುಂದಾಳುತನದಲ್ಲಿ ಚಿತ್ರಾಪಕ್ಷೀಯ ಅಯನಾಂಶವನ್ನು ಮಾನ್ಯಮಾಡಿ ವಿವಾದಕ್ಕೆ ತೆರೆ ಎಳೆಯಿತು. ಕೇತಕರ್ ತಮ್ಮ ಗಣಿತದಲ್ಲಿ ಪ್ಲೂಟೋ ವಿನ ಕಕ್ಷೆಯನ್ನು ಮೊದಲೇ ಲೆಕ್ಕಹಾಕಿದ್ದರಂತೆ; ಆದರೆ ಅಮೆರಿಕದ ವಿಜ್ಞಾನಿಯಿಂದ ಪ್ಲೂಟೋವಿನ ಆವಿಷ್ಕಾರವಾಗುವವರೆಗೂ ಯಾರೂ ಅವರನ್ನು ಆದರಿಸಲಿಲ್ಲ. ಏನಾಯಿತೋ ಏನೋ, ಅದೇ ವರ್ಷ ೧೯೩೭ ರಲ್ಲಿ ಕೇತಕರ್ ಪಾರ್ಶ್ವವಾಯು ಹಿಡಿದು, ನರಳಿ ಕೊನೆಯುಸಿರೆಳೆದರು! 'ಗ್ರಹಚಾರ'ವೆಂದರೆ ಇದೇ ಇರಬೇಕೇನೋ!

ನಿಮ್ಮವ

ಬೆನಕ

ಕನ್ನಡಪುಟ.ಬ್ಲಾಗ್‍ಸ್ಪಾಟ್.ಕಾಂ.