ಯಾವ ದೇಶ ಕಾಲಗಳ ಬಗ್ಗೆ ಮಾತಾಡ್ತಿದ್ದೀರ?? ಟಿ ವಿ ಪರದೆಯ ಮೇಲೆ ಮುದ್ದಾಗಿ ನಕ್ಕ ಮಾತ್ರಕ್ಕೆ ಸ್ವಾತಂತ್ರ್ಯ ಸಿಕ್ಕಿದೆ ಅಂತ ಅರ್ಥಾನಾ?? ಎಲ್ಲೋ ಮೇಲ್ವರ್ಗದ ಒಂದು ಗುಂಪಿನಲ್ಲಿ ಸಾಕಷ್ಟು ಮಟ್ಟಿಗೆ ಸಮಾನತೆಯ ಕಲ್ಪನೆ ಸಾಕಾರ ಆಗಿರಬಹುದು. ಹಾಗಂತ ಸಂಪೂರ್ಣ ಸ್ವಾತಂತ್ರ್ಯ ಬಂದುಬಿಟ್ಟಿದೆ, ಇನ್ನು ಸ್ತ್ರೀ ವಾದದ ಅವಶ್ಯಕತೆ ಇಲ್ಲ ಅಂತ ತೀರ್ಪು ಕೊಟ್ಟುಬಿಡೋಕಾಗುತ್ತ? ಬಿಹಾರದ ಹಳ್ಳಿ ಬಿಡಿ, ನಮ್ಮದೇ ಮಧ್ಯಮ - ಕೆಳಮಧ್ಯಮ ವರ್ಗದ ಮನೆಗಳಲ್ಲಿ ಪುರುಷಪ್ರಧಾನ ಸಮಾಜ ಇನ್ನೂ ದಷ್ಟಪುಷ್ಟವಾಗಿ ಜೀವಂತವಾಗಿದೆ ಅನ್ನೋದು ಸ್ವಲ್ಪ ಆತ್ಮಾವಲೋಕನ ಮಾಡಿಕೊಂಡಾಗ ಸುಲಭವಾಗಿ ಕಾಣಿಸೋ ಸತ್ಯ. ವಿದ್ಯಾಭ್ಯಾಸ ಇರಬಹುದು, ಕೆಲಸ ಇರಬಹುದು, ಬದುಕಿನ ಯಾವುದೇ ಆಯ್ಕೆ 'ಸ್ತ್ರೀ' ಅನ್ನೋ ಕಾರಣಕ್ಕೆ ಹಿಡಿತಕ್ಕೊಳಗಾಗದೇ ಮಾಡೊಕೆ ಸಾಧ್ಯ ಇದ್ರೆ ಅದನ್ನ ಸಂಪೂರ್ಣ ಸ್ವಾತಂತ್ರ್ಯ ಅನ್ನಬಹುದು.ಇದನ್ನ ಸಾಧಿಸಬೇಕಾ ಇಲ್ಲ್ವಾ ಅನ್ನೋದು ಬೇರೆ ಮಾತು - ಆದ್ರೆ ಇದು ಈಗಾಗ್ಲೇ ಸಿಕ್ಕಿಬಿಟ್ಟಿದೆ ಅನ್ನೋದು ಖಂಡಿತ ಸತ್ಯಕ್ಕೆ ದೂರದ ಮಾತು!

ಅಷ್ಟಕ್ಕೂ ಸ್ತ್ರೀವಾದ ಅಂದ್ರೆ ಏನು? ಈಚಿನ ದಿನಗಳಲ್ಲಿ 'ಸ್ತ್ರೀ ವಾದ'ಅಂತ ಒಂದು ಪರಿಕಲ್ಪನೆಯ ಬದಲು ಬೇರೆ ಬೇರೆ ಸಾಮಾಜಿಕ, ಸಾಂಸ್ಕೃತಿಕ ಪರಿಸರಗಳಿಗೆ ನಿರ್ದಿಷ್ಟವಾಗಿ 'ಸ್ತ್ರೀ ವಾದಗಳು' ಕಂಡುಬರುತ್ತಿವೆ - ಇದು ಅಗತ್ಯವೂ ಹೌದು. ಸಾಮಾನ್ಯವಾಗಿ ಕೆಲವು ವಿಷಯಗಳು universal ಎನಿಸಿದರೂ ಅಯಾ ದೇಶ ಕಾಲಗಳಿಗೇ specific ಆದ ವಿಷಯಗಳು ಹಲವು ಸ್ತ್ರೀ ವಾದದ ಬಗ್ಗೆ ಮಾತನಾಡುವಾಗ ಮುಖ್ಯವಾಗುತ್ತವೆ. ಇದನ್ನೆಲ್ಲ ಸಾರಾಸಗಟಾಗಿ ಸಾರಿಸಿ ಸ್ತ್ರೀ ಸ್ವಾತಂತ್ರ್ಯವನ್ನ ಸಾಧಿಸಿ ಆಯ್ತು, ಇನ್ನು ಸ್ತ್ರೀ ವಾದವನ್ನ ಗಂಟು ಕಟ್ಟಿ ಬಿಸಾಕ್ಬೇಕು ಅನ್ನೋದು ಎಷ್ಟು ಸರಿ?