ಸಂಗನಗೌಡರೆ,
ನೀವೆಂದುಕೊಂಡದ್ದಕ್ಕೂ ನಾನು ಬರೆದದ್ದಕ್ಕೂ ಸ್ವಲ್ಪ ವ್ಯತ್ಯಾಸವಿದೆ:
ತಮಿಳಿನ 'ಎತ್ತಣೈ' ಕನ್ನಡದ 'ಎಷ್ಟು' ಎಂಬರ್ಥದಲ್ಲ್ಲಿ ಬಳಸಲ್ಪಡುತ್ತದೆ; ಆದರೆ, 'ಎತ್ತಣೈ' ಕನ್ನಡದ 'ಎತ್ತ'ವಾಗಿ ಉಳಿದಿರಬಹುದಾದ್ದರಿಂದ ದೂರವಾಚಕವಾಗಿ ಬಳಸಲ್ಪಡುತ್ತದೆ ಎಂದು ಹೇಳುವುದು ನನ್ನ ಉದ್ದೇಶ. 'ಎತ್ತ' = 'ಎಷ್ಟು ದೂರ' ಎಂದಲ್ಲ! 'ಎತ್ತ' = 'ಎಲ್ಲಿ' ಎಂದೇ ಬಳಕೆಯಲ್ಲಿರುವುದು! ಇನ್ನೂ ಸರಿಯಾಗಿ ಹೇಳಬೇಕೆಂದರೆ, ಈಗ ಅಷ್ಟೇನೂ ಬಳಕೆಯಲ್ಲಿಲ್ಲದ 'ಎತ್ತಣ' -> 'ಎತ್ತ'ವಾಗಿದೆ.
ಆದ್ದರಿಂದ:

ಎತ್ತಣೈ -> ಎತ್ತಣ -> ಎತ್ತ ಹೀಗಾಗಿರುವ ಸಾಧ್ಯತೆ ಹೆಚ್ಚು. ಆದರೆ ಅರ್ಥ ಮಾತ್ರ ಎಷ್ಟು -> ಯಾವ ಕಡೆ -> ಎಲ್ಲಿ ಎಂದಾಗಿದೆ.
ಹಾಗೆಯೇ,
ಎಣೈತ್ತು -> ಎಣಿತು -> ಎನಿತು ಆಗಿರುವ ಸಾಧ್ಯತೆಯೇ ಹೆಚ್ಚು. ಇಲ್ಲಿ ಅರ್ಥ 'ಎಷ್ಟು' ಎಂದೇ ಉಳಿದುಕೊಂಡಿದೆ.

ಇಲ್ಲಿಂದ ಮುಂದೆ:
ಎನಿತು -> ಎಂತು, ಏಸು, ಎಷ್ಟು ಎಂದೆಲ್ಲಾ ಬದಲಾಗಿರಬಹುದು. ಹಳೆಗನ್ನಡದಲ್ಲಿ 'ಎಷ್ಟು' = ಎನಿತು ಆಗಿತ್ತೆಂಬುದಕ್ಕೆ ಇನ್ನೊಂದು ಪ್ರಸಿದ್ಧ ಉದಾಹರಣೆ ನೋಡಿ:

"ಹದಿಬದೆಯರೆನಿಬರೋ..." = ಹದಿಬದೆಯರು + 'ಎನಿಬರೋ' = ಪತಿವ್ರತೆಯರು + ಎಷ್ಟು ಜನರೋ!
ಓರ್ವ, ಈರ್ವರು, ಮೂವರು, ನಾಲ್ವರು, ಐವರು ಇದ್ದಂತೆ 'ವರು' ಪ್ರತ್ಯಯ ಸೇರಿದ 'ಎನಿತು', 'ಎನಿಬರು' ಆಗಿರುವುದನ್ನು ಗಮನಿಸಿ!

ಅಂದಹಾಗೆ, ನೇರ ಪ್ರಶ್ನೆ: ಕನ್ನಡದ ಮೇಲೆ ಸಂಸ್ಕೃತವನ್ನು ಬಲವಂತವಾಗಿ ಹೇರಲಾಯಿತು ಎಂಬ ನಿಮ್ಮ ಹೇಳಿಕೆಗೆ ಸಾಕ್ಷಿಯೇನಾದರೂ ಇದ್ದರೆ ತೋರಿಸಿ. ತಿಳಿಯಲು ನನಗೂ ಕುತೂಹಲವಿದೆ. ಆಂಗ್ಲರ ಅಭಿಪ್ರಾಯವಾಗಲೀ, ಅವರ ನೆರಳಲ್ಲಿ ಬೆಳೆದ ವಿಚಾರವಾದಿಗಳ ಅಭಿಪ್ರಾಯಗಳಾಗಲೀ, ಅನಿಸಿಕೆಗಳೇ ಹೊರತು ಸಾಕ್ಷಿಗಳಲ್ಲ. 'ಬಲವಂತವಾಗಿ ಹೇರಲಾಯಿತು' ಎಂಬ ನಿಮ್ಮ ವಾದಕ್ಕೆ ಬಲವಾದ ಆಧಾರವೇನೆಂಬುದನ್ನು ನಾನು ತಿಳಿಯಲಿಚ್ಛಿಸುತ್ತೇನೆ.
ನಿಮ್ಮವ

ಬೆನಕ

ಕನ್ನಡಪುಟ.ಬ್ಲಾಗ್‍ಸ್ಪಾಟ್.ಕಾಂ.