ಅದಕ್ಕೇ ಸ್ವಾಮಿ ಹೊಸ ಹೊಸ ಪದಗಳನ್ನು ಹುಟ್ಟುಹಾಕಬೇಡಿ ಎಂದಿದ್ದು! ಮೂಲ ಅಕ್ಷರ ಎಂದಿದ್ದರೆ ಎಲ್ಲರಿಗೂ ಅರ್ಥವಾಗುತ್ತಿತ್ತು. ತಳ ಎಂದರೆ 'ಬುಡ' ಮಾತ್ರವಲ್ಲ, 'ಕೆಳ' ಎಂಬರ್ಥವೂ ಇದೆ; ನನ್ನ ಮಾತಿನಲ್ಲಿ ನಂಬುಗೆಯಿಲ್ಲದಿದ್ದಲ್ಲಿ, ನಿಘಂಟು ತಿರುವಿಹಾಕಬಹುದು. ಇರಲಿ, ನಿಮ್ಮ ಪ್ರಶ್ನೆಗೆ ಬರೋಣ:
ಕ್ಷ ಮತ್ತು ಜ್ಞ , ಜೊತೆಗೆ 'ತ್ರ' ಕೂಡ ಸಂಯುಕ್ತಾಕ್ಷರಗಳೇ. ಅಂದರೆ ಎರಡು ವ್ಯಂಜನಗಳು ಕೂಡಿ ಆದವು. ಅವು ಸಂಸ್ಕೃತದಲ್ಲಿ ವಿಶೇಷಾಕ್ಷರಗಳಾದರೂ, ವರ್ಣಮಾಲೆಯಲ್ಲಿ ಎಂದಿಗೂ ಸೇರಿರಲಿಲ್ಲ; ಸೇರಿಯೂ ಇಲ್ಲ; ಸೇರುವುದೂ ಇಲ್ಲ. ಸಂಸ್ಕೃತ ಸೂತ್ರಕಾರ-ವಾಕ್ಯಕಾರ-ಭಾಷ್ಯಕಾರ ಮುನಿತ್ರಯರು ಕೂಡ ಇವುಗಳನ್ನು 'ಮೂಲ ವರ್ಣವೆಂದು' ಎಲ್ಲಿಯೂ ಹೇಳಿಲ್ಲ. ಬರೆಯಲು ಸುಲಭವಾಗುವಂತೆ ಈ ಅಕ್ಷರಗಳ ಬಳಕೆ ಜಾರಿಗೆ ಬಂತು. ನನ್ನ ಮಾತು ನಿಜವೋ ಇಲ್ಲವೋ ಎಂದು 'ಮಾಹೇಶ್ವರ ಸೂತ್ರ'ಗಳನ್ನು ಪರಿಶೀಲಿಸಿ ನೋಡಬಹುದು. ಸಕ್ಕದದಲ್ಲಿಯೇ ಇಲ್ಲದ ಮೇಲೆ ಕನ್ನಡದಲ್ಲಿ ಅವು ಮೂಲ ವರ್ಣಗಳೆಂದು ಯಾರು ಹೇಳಿದರೋ ನನಗೆ ತಿಳಿಯದು! ನಿಜವಾಗಿ ಸಕ್ಕದಕ್ಕೇ ಜೋತುಬೀಳಬೇಕಿದ್ದಲ್ಲಿ 'ಕ್ಷ', 'ತ್ರ', 'ಜ್ಞ' ಗಳನ್ನು ಬರೆಯಲು ಸಕ್ಕದದಂತೆ ಕನ್ನಡದಲ್ಲೂ ವಿಶೇಷ ಅಕ್ಷರಗಳೇ ಹುಟ್ಟಬೇಕಿತ್ತಲ್ಲವೇ? ಯೋಚಿಸಿ ನೋಡಿ! ತಮಿಳಿನಲ್ಲಿ 'ಶ್ರೀ' ಬರೆಯಲೆಂದೇ ಹೊಸ ಅಕ್ಷರ ಹುಟ್ಟಿತು; ಕನ್ನಡದಲ್ಲಿ ಹಾಗಾಗಲಿಲ್ಲ! ಇಂದಿಗೂ 'ಕ' ಕ್ಕೆ 'ಷ' ಒತ್ತು 'ಕ್ಷ' ಎಂದೇ ಎಲ್ಲರೂ ಬರೆಯುತ್ತಿರುವುದಲ್ಲವೇ? 'ಬಲವಂತದ ಹೇರಿಕೆ' ಹೇಗಾದೀತು?

ನಿಮ್ಮವ

ಬೆನಕ

ಕನ್ನಡಪುಟ.ಬ್ಲಾಗ್‍ಸ್ಪಾಟ್.ಕಾಂ.