ಸಂಗನಗೌಡರೇ,
ನಿಮ್ಮ ಅಭಿಪ್ರಾಯಗಳೇನೇ ಇದ್ದರೂ, ನೀವು ಹುಟ್ಟಿಸಿದ 'ತಳದ ಅಕ್ಕರ' ಎಂದರೆ 'ಕೆಳಗಡೆಯ ಅಕ್ಷರ' ಎಂದೇ ಅರ್ಥವಾಗುವುದು. 'ಹೊಸನಾಡ ಕಟ್ಟುವ' ಹುಮ್ಮಸ್ಸಿನ ನಿಮ್ಮ ಅಭಿಪ್ರಾಯಗಳು ಇದುವರೆಗಿನ ಕನ್ನಡ ಪದಗಳ ಬಳಕೆಯನ್ನು ಇಲ್ಲವಾಗಿಸುವ ಮಟ್ಟಕ್ಕೆ ಹೋಗದಿರಲೆಂದು ಆಶಿಸುತ್ತೇನೆ. ಅದೇನೇ ಇರಲಿ, ಮುಖ್ಯ ಪ್ರಶ್ನೆಗೆ ಬರೋಣ:

ನಾನು ಓದಿರುವ, ಕಲಿತಿರುವ, ಕಲಿಸಿರುವ, ಕೇಳಿರುವ, ಹೇಳಿರುವ ಯಾವುದೇ ಸಂದರ್ಭದಲ್ಲೂ 'ಕ್ಷ', 'ತ್ರ', 'ಜ್ಞ' ಎಂಬಕ್ಷರಗಳು 'ಮೂಲವರ್ಣಗಳು' ಎಂದು ಇರಲಿಲ್ಲ. ಸಕ್ಕದದಲ್ಲೇ ಮೂಲವರ್ಣಗಳಲ್ಲದ ಇವು ಕನ್ನಡದಲ್ಲಿ ಮೂಲವರ್ಣಗಳೆಂದು ತಮಗೆ ಯಾರು ಹೇಳಿದರೋ ತಿಳಿಯದು. ನಿಮ್ಮ ಸಂದೇಹದಿಂದ ನನಗೆನಿಸಿದ್ದು ಇಷ್ಟೇ: ದೇವನಾಗರೀ ಲಿಪಿಯನ್ನು ಬಳಸುವ ಹಲವು ಭಾಷೆಗಳ ಪುಸ್ತಕಗಳಲ್ಲಿ ವರ್ಣಮಾಲೆಯ ಕೊನೆಗೆ ಕ್ಷ, ತ್ರ, ಜ್ಞ ಗಳನ್ನು ಸೇರಿಸುವ ರೂಢಿ ಜಾರಿಯಲ್ಲಿತ್ತು; ಅವುಗಳನ್ನು ಬರೆಯುವ ರೀತಿ ಬೇರೆಯಾದ್ದರಿಂದ ಅದು ಸಹಜ ಕೂಡ. ಕರ್ನಾಟಕದ ಹೊರಗೆ ಮುದ್ರಣವಾಗುತ್ತಿದ್ದುದರಿಂದ ಕೆಲವು ಕನ್ನಡ ಪುಸ್ತಕಗಳಲ್ಲೂ ಇದೇ 'ಅಭ್ಯಾಸ' ಉಳಿದುಕೊಂಡಿತ್ತು; ಆದರೆ ಮೂಲವರ್ಣಗಳೆಂದು ಯಾರೂ ಹೇಳಿಲ್ಲ. ಈಗಲೂ ಹೊಸಗನ್ನಡದಲ್ಲಿ ವರ್ಣಗಳು ಐವತ್ತೇ(೫೦). 'ೠ' ವನ್ನು ಕೈಬಿಟ್ಟಾಗಿನಿಂದ ನಲವತ್ತೊಂಬತ್ತು(೪೯) ಆಗಿವೆ ಅಷ್ಟೇ:
ಅ - ಔ ೧೪ ಸ್ವರಗಳು + ಕಚಟತಪ ವರ್ಗೀಯವ್ಯಂಜನಗಳು ೨೫ + ಯ - ಳ ಅವರ್ಗೀಯ ವ್ಯಂಜನಗಳು ೯ (ಹಳಗನ್ನಡದಲ್ಲಿ ಱ,ೞ ಸೇರಿ ೧೧) + ಯೋಗವಾಹಗಳು ೨ = ೫೦.

ಕ್ಷ, ತ್ರ, ಜ್ಞ ಗಳನ್ನು ಬರೆಯುವುದಕ್ಕಾಗಿ ಕನ್ನಡದಲ್ಲಿ ಹೊಸ ಅಕ್ಷರಗಳೂ ಹುಟ್ಟಿಲ್ಲ; ಈ ಬಗ್ಗೆ ಹಿಂದೆಯೇ ಪ್ರತಿಕ್ರಿಯಿಸಿದ್ದೇನೆ. ಇನ್ನು ಸಕ್ಕದದ 'ಬಲವಂತದ' ಹೇರಿಕೆಯನ್ನು ಸಾಕ್ಷಿ ಸಮೇತ ತೋರಿಸುವುದು ನಿಮ್ಮ ಸರದಿ! ನಾನೂ ನಿಮ್ಮಂತೆಯೇ ಕನ್ನಡಿಗ; ಕನ್ನಡದ ಮೇಲೆ ಯಾವುದೇ 'ಬಲವಂತದ' ಹೇರಿಕೆಯನ್ನು ನಾನೂ ವಿರೋಧಿಸುತ್ತೇನೆ; ಆದರೆ ಸಕ್ಕದದ ಸಮುದ್ರವನ್ನರಿಯದೆ ಕನ್ನಡಿಗರು ಬಾವಿಯ ಕಪ್ಪೆಗಳಾಗಬೇಕೆಂಬುದನ್ನು ನಾನು ಒಪ್ಪುವುದಿಲ್ಲ.

ನಿಮ್ಮವ

ಬೆನಕ

ಕನ್ನಡಪುಟ.ಬ್ಲಾಗ್‍ಸ್ಪಾಟ್.ಕಾಂ.