ನಿಮಗೆ ತಿಳಿದಿರಬಹುದು, ಸರಕಾರಿ ಸ್ವಾಮ್ಯದಲ್ಲಿ ಅಯ್ಯಯ್ಯೋ(ಅದು ದಿಟವಾಗಿ AIR ಎಂಬುದಾಗಿ, ಆದರೆ ಅವರ ರಾಗವಾಗಿ ಹಾಡುವಾಗ ಅಯ್ಯಯ್ಯೋ ಎಂಬಂತೆ ಕೇಳಿದಂತಾಗುತ್ತದೆ.) ಎಫ್.ಎಮ್.ರೇನ್ಬೋ ಕೇಳುತ್ತೀರಾದರೆ, ಎರಡು ಹೆಸರುಗಳನ್ನು ನೆನಪಿನಲ್ಲಿಟ್ಟುಕೊಳ್ಳಲೇ ಬೇಕು.

೧. ಕಬಾಡಿಯಿಂದ(ಅದು ಕಬಾಡಿ ಇಂದ್ರ ಇರಬಹುದು) ವೆಂಕಟೇಶ್.
೨. ಜ್ಹೂಸ್(ಅಥವಾ ಜ್ಯೂಸ್) ನಾಗ.

ಇವರಿಬ್ಬರು ಯಾವುದೇ, ಕಾರ್ಯಕ್ರಮವಿರಲಿ, ತಪ್ಪದೇ ಕರೆ ಮಾಡುತ್ತಾರೆ. ನಾನು ಇವರಿಬ್ಬರಲ್ಲಿ, ಜ್ಯೂಸ್ ನಾಗನನ್ನು ಭೇಟಿ ಮಾಡಿರುವೆ. ಇವನದು, ಬನಶಂಕರಿ ಎರಡನೇ ಹಂತದಲ್ಲಿರುವ ಬಿ.ಡಿ.ಎ ಕಾಂಪ್ಲೆಕ್ಸ್ ಬಳಿ ಒಂದು ಜ್ಯೂಸ್ ಅಂಗಡಿ ಇದೆ. ತುಂಬಾ ಚೆನ್ನಾಗಿ ಮಾತನ್ನಾಡುತ್ತಾನೆ.

ಅಂದ ಹಾಗೆ ನನ್ನ ಗೆಳೆಯನೊಬ್ಬ ಹೇಳಿದ, "೮ ಅಲ್ಲ ೧೦ ಎಫ್.ಎಮ್. ಚಾನಲ್ಲುಗಳಿವೆ" ಎಂಬುದಾಗಿ. ಅದರಲ್ಲಿ ಸರಕಾರದವರದು ೩ ಅಂತೆ. ಅಮೃತವರ್ಷಣಿ, ರೇನ್ಬೋ, ಮತ್ತು ವಿವಿಧಭಾರತಿ.

ಅದೆಲ್ಲಾ, ಇರಲಿ, ಇನ್ನೊಂದು ೨೪ ಘಂಟೆ ಕನ್ನಡ ಹಾಡುಗಳನ್ನು ಹಾಕುವ ಚಾನೆಲ್ ಇದೆ. ತಮಾಷೆಯೆಂದರೆ ಮೊನ್ನೆ ಮಧ್ಯರಾತ್ರಿ ೨:೦೦ ಘಂಟೆಗೆ ಎಚ್ಚರವಾದಾಗ, ಗಮನಿಸಿದೆ, ನನ್ನ ತಮ್ಮ ರೇಡಿಯೋ ಆಫ್, ಮಾಡದೆ ಮಲಗಿದ್ದ. ಆದರೆ ಅಚ್ಚರಿಯೆಂದರೆ, ಆಗಲೂ ಲೈವ್ ಕಾರ್ಯಕ್ರಮ ಬರುತ್ತಿತ್ತು, ಕನ್ನಡದಲ್ಲಿ. ಮಧ್ಯೆ ಮಧ್ಯೆ ಆಚಮನೀಯಂ ಆಚಮನೀಯಂ ಸಮರ್ಪಯಾಮಿ ಎನ್ನುವಂತೆ ಅವರುಗಳು ಮಸ್ತ್ ಮಜ್ಜಾ ಮಾಡಿ ಅಂತ ಪದೇ ಪದೇ ಉಲಿಯುತ್ತಿದ್ದರು.

ಆಗಲೂ ಅವನು ಕೆಲವು ಪ್ರಶ್ನೆಗಳನ್ನು ಕೇಳುತ್ತಿದ್ದ. ನೀವು ಚಿನ್ನದ ನಾಣ್ಯ ಗೆಲ್ಲಬೇಕಾದರೆ, ಕರೆ ಮಾಡಿ ******* ಎಂದ. ನಾನು ಅರ್ಧ ಘಂಟೆ ಜತುನಗೈದೆ. ನನಗೆ ಎಂದೂ ಕೂಡ, ಯಾವ ಚಾನೆಲ್ಲಿನಲ್ಲಿಯೂ ಲೈನ್ ಸಿಕ್ಕಿಲ್ಲ, ಎಸ್.ಎಮ್.ಎಸ್ ಅಂತೂ ನಾನು ಎಂದೂ ಕಳುಹಿಸುವುದಿಲ್ಲ. ಯಾವಾಗ ಮಾಡಿದರೂ, "ಇಸ್, ಮಾರ್ಗೆ ಕೆ ಸಭೀ ಲೈನೇ......" ಬರುತ್ತದೆ. ಸರಿ ಈ ಸರಿರಾತ್ರಿಯಾದರೂ ಸಿಗಬಹುದು ಎಂದು ಮಾಡಿದರೆ ಮತ್ತದೇ, "ಇಸ್, ಮಾರ್ಗೆ ಕೆ ಸಭೀ ಲೈನೇ......". ಸದ್ಯ, ನನ್ನಂತ ಬಕ್ರಗಳು ಬಹಳಷ್ಟಿದ್ದಾರೆ ಎಂದು ನನಗೆ ನಾನೇ ಸಮಾಧಾನ ಮಾಡಿಕೊಂಡು ಸುಸ್ತಾಗಿ ರೇಡಿಯೋ ಆರಿಸಿ ಮಲಗಿದೆ.

ಅಲ್ಲ ಸರಿ ರಾತ್ರಿಯಲ್ಲೂ  ಫೋನ್ ಮಾಡುವವರು ಇದ್ದಾರೆ ಎಂದರೆ ನಂಬುವುದ ಸ್ವಲ್ಪ ಕಷ್ಟ.