ನಾನು ಸಣ್ಣವನಿದ್ದಾಗ ಅನುಪಮಾ ನಿರಂಜನರವರ 'ದಿನಕ್ಕೊಂದು ಕಥೆ' ಓದಿದ ಜ್ಞಾಪಕ. ಕಥೆಗಳು ಬಹಳ ಚೆನ್ನಾಗಿರುತ್ತಿದ್ದವು. ಅಣ್ಣನ ಜೊತೆ ಗುದ್ದಾಡಿ ಪುಸ್ತಕ ಓದಲು ಪಡೆಯಬೇಕಿತ್ತು. ಇವಲ್ಲದೇ ಪ್ರತಿ ವಾರವೂ 'ಬಾಲವನದಲ್ಲಿ ಕಾರಂತಜ್ಜ' ತಪ್ಪದೇ ಓದುತ್ತಿದ್ದ ನೆನಪು. ಕಾರಂತಜ್ಜರಿಗೆ ಹಲವು ಬಾರಿ ಪತ್ರ ಬರೆದದ್ದೂ ಉಂಟು, ಆದರೆಂದೂ ಉತ್ತರವೇ ಬರಲಿಲ್ಲವೆಂಬ ಬೇಜಾರು ಇವತ್ತಿಗೂ ಇದೆ.

'ಚಂಪಕ'ವೆಂಬ ಮಾಸಿಕ (?) ತಪ್ಪು ತಪ್ಪು ಕನ್ನಡದಲ್ಲಿ ಪ್ರಕಟವಾಗುತ್ತಿತ್ತು. ಸಿ ಬಿ ಎಸ್ ಸಿ ಸ್ಕೂಲಿನಲ್ಲಿ ಅದರ ಆಂಗ್ಲ ಆವೃತ್ತಿ ತರಿಸುತ್ತಿದ್ದರಿಂದ ಇದೂ ಕೆಲವು ಕಾಪಿಗಳಂತೆ ಬರುತ್ತಿತ್ತು.

'ಬಾಲಮಂಗಳ'ವೆಂಬ ಕಾರ್ಟೂನ್ ಪತ್ರಿಕೆ ಬಹಳ ಚೆನ್ನಾಗಿರುತ್ತಿತ್ತು. 'ಡಿಂಗ'ವೆಂಬ ಇಲಿಯೂ ಅಲ್ಲದ ಮನುಷ್ಯನೂ ಅಲ್ಲದ ವಿಚಿತ್ರ ಸೂಪರ್ಮ್ಯಾನ್(ಸೂಪರ್ ಇಲಿ-ಮ್ಯಾನ್?) ಅದರಲ್ಲಿ ಬಹುದೊಡ್ಡ ಆಕರ್ಷಣೆ.

ಇನ್ನು ಚಂದಮಾಮದ ಬಗ್ಗೆ ಹೇಳಬೇಕೆ? ಅದಂತೂ ಎಲ್ಲರೂ ಓದಿರುವಂತಹ ಪುಸ್ತಕ, ಬಹುಶಃ.

ಅಮರ ಚಿತ್ರ ಕಥೆ ಕೂಡ ಕನ್ನಡದಲ್ಲಿ ಓದಿದ ಜ್ಞಾಪಕ. ನನ್ನ ಬಳಿಯೇ ೨೦ಕ್ಕೂ ಹೆಚ್ಚು ಪುಸ್ತಕಗಳು ಇದ್ದವು. 'ನೀನು ದೊಡ್ಡವನಾಗಿದ್ದೀ. ಯಾರಿಗಾದರೂ ಸಣ್ಣಮಕ್ಕಳಿಗೆ ಕೊಡು' ಎಂದು ಕಾಲೇಜಿನಲ್ಲಿದ್ದಾಗ ಅಮ್ಮ ಅಕ್ಕನ ಮಗಳಿಗೆಂದು ಅವುಗಳನ್ನ ರವಾನಿಸಿಯಾದ ಮೇಲೆ ಅವುಗಳ ಮುಖ ನೋಡಿಲ್ಲ.

'ಇದು ನಮ್ಮ ಭಾರತ' ಎಂಬ 'ಕ್ಲಾಸಿಕ್' ಪುಸ್ತಕಗಳನ್ನೂ ಓದಿದ ನೆನಪು. ಈ ಪುಸ್ತಕಗಳು ಬಹುಶಃ ಕನ್ನಡ ಸಾಹಿತ್ಯ ಪರಿಷತ್ತಿನಿಂದ ಪ್ರಕಟವಾಗುತ್ತಿದ್ದವು. ಭಾರತದ ಸಂಸ್ಕೃತಿಯ ಬಗ್ಗೆ ಹಲವು ಲೇಖನಗಳು ಮಕ್ಕಳಿಗಾಗಿಯೇ ಬರುತ್ತಿದ್ದವು. ಅಂತಹ ಪುಸ್ತಕಗಳು ಈಗ ಪ್ರಕಟವಾದರೆ ಕನ್ನಡ ಎಷ್ಟೋ ಬೆಳೆಯುವುದರಲ್ಲಿ ಸಂದೇಹವಿಲ್ಲ.

ಇನ್ನು, ಮೈಸೂರು ವಿಶ್ವವಿದ್ಯಾಲಯದವರು ಪುಟಾಣಿಗಳಿಗೆ ಒಂದು ವಿಜ್ಞಾನ ಕುರಿತ ಪತ್ರಿಕೆ ಪ್ರಕಟಿಸುತ್ತಿದ್ದರು. (ಅದರ ಹೆಸರು ನನಗೆ ಸರಿಯಾಗಿ ನೆನಪಿಲ್ಲ. ಮೈಸೂರಿನ ಆಯುರ್ವೇದ ಕಾಲೇಜಿನ ಎದುರು ಇದ್ದ ಗ್ರಂಥಾಲಯಕ್ಕೆ ಸಾಧ್ಯವಾದಾಗಲೆಲ್ಲ ಲಗ್ಗೆ ಇಟ್ಟು ಓದುತ್ತಿದ್ದೆ, ಶಾಲೆಯಲ್ಲಿದ್ದಾಗ) ಆ ಪುಸ್ತಕದಲ್ಲಿ ಎಷ್ಟೋ ವೈಜ್ಞಾನಿಕ ಮಾಹಿತಿ ನನ್ನ ಚಿಂತನಾ ಕ್ರಮವನ್ನೇ ಬದಲಿಸಿದ್ದವೆಂದು ಹೇಳಿದರೆ ಸುಳ್ಳಾಗದು. ಯಾರೋ ಪುಣ್ಯಾತ್ಮರು ಪ್ರಕಟಿಸುತ್ತಿದ್ದ ಪುಸ್ತಕಗಳು... ನನಗೆ ಪ್ಯಾಪೆಮಾಷೆ ಮಾಡುವುದನ್ನೂ, ಪ್ಲಾಸ್ಟರ್ ಆಫ್ ಪ್ಯಾರಿಸ್ ಉಪಯೋಗಿಸುವುದನ್ನು, ಕೊನೆಗೆ ಗಾಳಿಯಂತ್ರವನ್ನುಪಯೋಗಿಸಿ ಹವಾಮಾನ ಕಂಡು ಹಿಡಿಯುವುದನ್ನು, ಆಟದ ಪುಟ್ಟ ದೋಣಿಯನ್ನು ಸುಟ್ಟ ಪೇಪರಿನಿಂದ ಮುಂದೆ ತಳ್ಳುವುದನ್ನೂ ತಿಳಿಸಿಕೊಟ್ಟು ಶಾಲೆಯ ದಿನಗಳನ್ನು Memorable ಮಾಡಿದ ಪುಸ್ತಕವದು!

ಇನ್ನು ಮಕ್ಕಳ ಕಥೆಗಳಿಗೆ ವಾಪಸ್ ಬಂದರೆ, ಪಳಕಳ ಲಕ್ಷ್ಮೀನಾರಾಯಣ ಭಟ್ಟರು (ಹೆಸರು ಸರಿಯೇ?) ಎಂಬುವರ ಕಥೆಗಳನ್ನೂ ಓದಿದ ನೆನಪು.

ಒಟ್ಟಾರೆ ಕನ್ನಡದಲ್ಲಿ ಮಕ್ಕಳಿಗಾಗಿ (ಒಳ್ಳೆಯ) ಪುಸ್ತಕಗಳು ಮತ್ತು ಲೇಖನಗಳು ಈಗ ಕಡಿಮೆಯೆ. ಹಿಂದೆ ಕಡಿಮೆ ಇದ್ದವು ಎಂಬುದನ್ನು ನಾನೊಪ್ಪುವುದಿಲ್ಲ. (ಐದು ಹತ್ತು ವರ್ಷಗಳ ಹಿಂದೆಯೇ ಎಷ್ಟೊಂದು ಇದ್ದವು ಎಂಬುದನ್ನು ಮೇಲೆ ಪಟ್ಟಿ ಮಾಡಿದ್ದೇನಷ್ಟೆ!)

--

"ಹೊಸ ಚಿಗುರು, ಹಳೆ ಬೇರು"