ಓಎಲ್ಎನ್ ರ ಅಭಿಪ್ರಾಯವನ್ನು ಒಪ್ಪಲು ಮನಸ್ಸಾಗುತ್ತಿದೆ !!

ನಿನ್ನೆ ಇಸ್ಮಾಯಿಲ್ ರವರ ಉತ್ತರ ಓದಿದ ಮೇಲೆ ಈ ಬಗ್ಗೆ ಇನ್ನಷ್ಟು ಯೋಚಿಸುತ್ತಿದ್ದೆ. ಕಾವ್ಯ ಇರುವುದು ಓದುವುದಕ್ಕೆ, ಹಾಡುವುದಕ್ಕಲ್ಲ ಎನ್ನುತ್ತಿದ್ದ ರಾಮಚಂದ್ರ ಶರ್ಮರಾಗಲಿ, ಕೆ.ಎಸ್. ನರಸಿಂಹಸ್ವಾಮಿಯವರನ್ನು ಲೇವಡಿಮಾಡಲೆಂದೇ 'ಪುಷ್ಪಕವಿಯ ಪರಾಕು' ಬರೆದ ಅಡಿಗರಾಗಲಿ, ಲಕ್ಷೀನಾರಾಯಣ ಭಟ್ಟರನ್ನು ಕ್ಯಾಸೆಟ್ ಭಟ್ಟರೆಂದು ಗೇಲಿ ಮಾಡುತ್ತಿದ್ದ ಲಂಕೇಶರಾಗಲಿ ಮಕ್ಕಳಿಗಾಗಿ ಏನನ್ನೂ ಬರೆದಿದ್ದು ನನಗೆ ತಿಳಿದಿಲ್ಲ. ನವ್ಯರ ಮನೋಧರ್ಮ ಹೀಗಿರುವಾಗ ಶಿಶುಸಾಹಿತ್ಯವನ್ನು ಅವರಿಂದ ನಿರೀಕ್ಷಿಸುವುದು ಹೇಗೆ ಎಂದೆಲ್ಲಾ ಗೊಂದಲದಲ್ಲಿದ್ದೆ. ಇಸ್ಮಾಯಿಲ್ ರವರು ನೆನಪಿಸಿರುವ ನಿರಂಜನ, ಗೋವಿಂದ ಪೈ ಇವರೆಲ್ಲ ನವೋದಯ / ಪ್ರಗತಿಪರ ಎಂದು ಗುರುತಿಸುವ ಐಡಿಯಾಲಜಿಯಲ್ಲಿ ನಂಬಿಕೆಯಿಟ್ಟು ಬರೆದವರು. ಈ ಐಡಿಯಾಲಜಿಗಳ ಅಶಯವನ್ನು ಗಮನಿಸಿದರೆ ಅದು ಆಶ್ಚರ್ಯವಲ್ಲ ಎಂದುಕೊಳ್ಳುತ್ತ ನಾನು ಚಿಕ್ಕಂದಿನಲ್ಲಿ ಓದುತ್ತಿದ್ದ ಪುಸ್ತಕಗಳನ್ನು ನೆನಪಿಸಿಕೊಳ್ಳತೊಡಗಿದೆ. ಆದಷ್ಟು ಬೇಗ ದೊಡ್ಡವನಾಗಬೇಕೆಂಬ ಆಸೆ ನನಗೂ ಇತ್ತು. ಮಕ್ಕಳ ವಿಭಾಗದ ಕಥೆ, ಪದ್ಯಗಳನ್ನು ಓದುತ್ತಲೇ 'ದೊಡ್ಡವರ' ಧಾರಾವಾಹಿಗಳನ್ನು ಓದುತ್ತಿದ್ದಾಗಿನ ಥ್ರಿಲ್ ನೆನಪಿದೆ.

ಬಹುಶಃ ನಾವು ತಲೆಕೆಡಿಸಿಕೊಳ್ಳಬೇಕಾದದ್ದು ಮಕ್ಕಳಲ್ಲಿ ಕನ್ನಡ ಓದುವ ಹವ್ಯಾಸ ಹೇಗೆ ಬೆಳೆಸಬೇಕು ಎಂಬುದರ ಬಗ್ಗೆ. ಏನನ್ನು ಓದಬೇಕು ಎಂಬುದರ ಬಗ್ಗೆಯಲ್ಲ ಅನ್ನಿಸುತ್ತಿದೆ.

ಈ ವಿಷಯದಲ್ಲಿ ಓಎಲ್ಎನ್ ರಿಂದ ಇನ್ನಷ್ಟು ವಿವರ ನಿರೀಕ್ಷಿಸುತ್ತಿದ್ದೇನೆ.