ಅಂದ ಹಾಗೆ, ನಾನು ಪಂಡಿತನಲ್ಲ, ನಾನು ಕನ್ನಡ ಕಾವ್ಯಗಳನ್ನು ಓದಿಲ್ಲ. ಏನೋ ಒಂದೆರೆಡು ಪುಸ್ತಕಗಳ ಒಂದಿಷ್ಟು ಪುಟಗಳನ್ನು ಓದಿರಬಹುದು ಅಷ್ಟೇ. ಆದರೆ ನನ್ನ ಉದ್ದೇಶ ಇಷ್ಟೇ, ಪ್ರಾಚೀನ ಕನ್ನಡ ಕಾವ್ಯಗಳಲ್ಲಿರಬಹುದಾದ ಸಂಪತ್ತನ್ನು ಈಗಿನ ಕಾಲಕ್ಕೆ ಪ್ರಸ್ತುತವಾಗಿಸಬಹುದೇ ? ತಂತ್ರಜ್ಞಾನಕ್ಕೆ ಸೃಜನಶೀಲತೆಯ ಸೋಂಕು ತಗುಲಿಸಬಹುದೇ ? ಇವುಗಳಿಗೆ ಉತ್ತರ ಕಂಡುಕೊಳ್ಳುವ ಉತ್ಸಾಹ. ನನ್ನ ಮಟ್ಟಿಗೆ ಕನ್ನಡವು ಅಗಾಧ ಸಂಪತ್ತುಳ್ಳ ಭಾಷೆ. ಕನ್ನಡದಲ್ಲಿಯೇ ಆಲೋಚಿಸಿ, ನಾನು ಕಂಡುಕೊಂಡ ಈ ಸಂಪತ್ತು ಎಲ್ಲರಿಗೂ ಸಿಗಲಿ ಎಂಬ ಸದುದ್ದೇಶದಿಂದ ಹಂಚಿಕೊಳ್ಳುತ್ತಿದ್ದೇನೆ. ನನ್ನ ಆಲೋಚನೆಗಳು ಯಾರಿಗೂ ಹೊರೆಯಾಗದಿರಲಿ ಎಂದು ದೇವರಲ್ಲಿ ಪ್ರಾರ್ಥಿಸುತ್ತೇನೆ

ನನಗಂತೂ ಈ ಉಲ್ಲಿತ, ಉದಿತ ಪದಗಳನ್ನು ಊಹಿಸಿಕೊಂಡಂದಿನಿಂದ ತುಂಬಾ ಸಂತೋಷವಾಗಿದೆ. ನನ್ನ ಈ ಆನಂದದಲ್ಲಿ ನಿಮಗೂ ಭಾಗಿಯಾಗಬೇಕೆನಿಸಿದರೆ, ನೀವೂ ಭಾಗಿಯಾಗಿ, ಆನಂದ ಮತ್ತಷ್ಟು ಹೆಚ್ಚಾಗುತ್ತದೆ. ಏನಾದರೂ ಪ್ರತಿಕ್ರಿಯಿಸಬೇಕೆಂದುಕೊಂಡರೆ, ಯಾವುದೇ ಅಳುಕಿಲ್ಲದೆ ಪ್ರತಿಕ್ರಿಯಿಸಿ, ಮತ್ತೂ ಸಂತೋಷವಾಗುತ್ತದೆ. ಸಂಪದದಲ್ಲಿರಬಹುದಾದ ಪಂಡಿತರು, ಕನ್ನಡದ ಮೇಷ್ಟ್ರುಗಳು ಏನಾದರೂ ಪ್ರತಿಕ್ರಿಯಿಸಿದರೆ ಮತ್ತೂ ಹೆಚ್ಚು ಸಂತೋಷವಾಗುತ್ತದೆ. ತಂತ್ರಜ್ಞರು, ಸೃಜನಶೀಲರು ಎಲ್ಲರೂ ಒಟ್ಟಾಗಿ ಕನ್ನಡಕ್ಕಾಗಿ ದುಡಿಯೋಣ. ಜೈ ಕನ್ನಡ.

ಕನ್ನಡದಲಿ ಹರಿ ಬರೆಯುವನು, ಕನ್ನಡದಲಿ ಹರ ತಿರಿಯುವನು, ಕನ್ನಡದಲ್ಲಿಯೇ ಬಿನ್ನಹಗೈದೊಡೆ ಹರಿ ವರಗಳ ಮಳೆ ತಾ ಕರೆಯುವನು.

ಬಹುಶಃ ನಾನು ಶಾಲಾ ಕಾಲೇಜುಗಳಲ್ಲಿ ಕವಿರಾಜಮಾರ್ಗವನ್ನು ಓದಿದ್ದರೆ, ಅವುಗಳಲ್ಲಿ ಅಡಕವಾಗಿರಬಹುದಾದ ರಸಗಳನ್ನು ಹೀರಿಕೊಳ್ಳಲು ಸಾಧ್ಯವಾಗುತ್ತಿತ್ತೋ ಇಲ್ಲವೋ ತಿಳಿಯದು, ಆದರೆ ಈಗಂತೂ ಅದನ್ನು ಹಿಡಿದುಕೊಂಡು ಕುಳಿತರೆ, ಪ್ರಸ್ತುತ ಸಮಾಜದ ಅನೇಕ ಪ್ರಶ್ನೆಗಳಿಗೆ ಉತ್ತರವನ್ನು ನೀಡುತ್ತಾ ಹೋಗುತ್ತಿದೆ. ಸಮಯಹೋಗುವುದೇ ತಿಳಿಯುವುದಿಲ್ಲ.