ತುಂಬಾ ಕ್ರಿಯಾಶೀಲರಾದ ವ್ಯಕ್ತಿಗಳನ್ನು (ಸಾಮಾನ್ಯವಾಗಿ ಕಿರಿಯರನ್ನು) ಪ್ರೀತಿಯಿಂದ ಕಿಡಿಗೇಡಿಗಳು ಎಂದು ಕರೆಯುವುದು ರೂಢಿಯಲ್ಲವೇ? ಇವರು ಸುಮ್ಮನೆ ಕೂಡಲೊಲ್ಲರು. ಏನಾದರೊಂದನ್ನು ಮಾಡುತ್ತಲೇ ಇರಬೇಕು.ಪ್ರತಿಯಾಗಿ ಸುಮ್ಮನೆ ಕೂಡುವ ಮನೋಧರ್ಮಿಗಳು ಏನನ್ನೂ ಮಾಡಲು ಮುಂದುವರೆಯರು! ಸಾಧ್ಯವಾದಲ್ಲಿ ಇತರರು ಮಾಡಿದ ಕೆಲಸಗಳಲ್ಲಿ ಇಲ್ಲಸಲ್ಲದ ತಪ್ಪುಗಳನ್ನು ಹುಡುಕಿ ಕಟಕಿಯಾಡುವರು. (ಬಹುಶಃ ನಾನು ಈ ವರ್ಗಕ್ಕೆ ಸೇರಿರಬೇಕೆಂದು ನನಗೆ ಒಂದೊಂದು ಸಲ ಅನ್ನಿಸುತ್ತಿರುತ್ತದೆ)

ಇಲ್ಲಿ ಕಿಡಿ(ಗೇಡಿ)ಗಳು ಅಂತ ಅಂದಿದ್ದು ಹಲವಾರು ದೃಷ್ಟಿಕೋನಗಳಿಂದ.
ಅ) ಓಪನ್ ಸೋರ್ಸ್ ರಂಗದಲ್ಲಿ ಕನ್ನಡದ ಜ್ಯೋತಿಯನ್ನು ಹೊತ್ತಿಸಿದ "ಕಿಡಿಗಳು" ಇವರು.
ಬ)ಏನೂ ಇಲ್ಲದ ಜಾಗದಲ್ಲಿ ಸಾಕಷ್ಟು ಪ್ರಗತಿಯನ್ನು ಮೂಡಿಸಿದ್ದರೂ ಜಾಗತಿಕವಾಗಿ ಇದು ಇನ್ನೂ "ಕಿಡಿಯ" ರೂಪದಲ್ಲಿಯೇ ಇರುವುದು. ಇದೊಂದು ಪ್ರಖರ ತೇಜಃಪುಂಜವಾಗಬೇಕಲ್ಲವೇ?
ಕ)ಇನ್ನೂ ಹಲವಾರು ಭಾಷೆಗಳು ಇನ್ನೂ ಅತ್ಯಂತ ಶೈಶವಾಸ್ಥೆಯಲ್ಲಿಯೇ ತೆವಳುತ್ತಿರುವಾಗ ನಾವು "ಕಿಡಿಯ" ರೂಪದಲ್ಲಿಯಾದರೂ ಇದ್ದೇವಲ್ಲ ಎನ್ನುವ ಸಂತಸ.
ಡ)ಯಾವಾಗಲಾದರೊಮ್ಮೆ ನೈಜ ಕೇಡಿಗಳು ಕನ್ನಡಕ್ಕೆ ಅಪಚಾರ ಮಾಡಿದಾಗ ಅದನ್ನು ಪ್ರತಿಭಟಿಸಿ ಅವರ(ಅಪಚಾರ ಮಾಡಿದವರ) ಪಾಲಿನ ಕಿಡಿಗೇಡಿಗಳೂ ಹಾಗು "ಕೇಡಿ"ನ "ಕಿಡಿ"ಗಳೂ ಆಗಿದ್ದರಿಂದ ಕಿಡಿ(ಗೇಡಿ)ಗಳೆನ್ನುವ ಅಭಿಪ್ರಾಯಕ್ಕೆ ಬಂದೆ.
ಇ) ಕಿಡಿ(ಗೇಡಿ)ಗಳೇ ಪ್ರತಿಭಟಿಸಬೇಕಲ್ಲದೇ ಅಮುಲ್ ಬೇಬಿಗಳೆಂತು ಪ್ರತಿಭಟಿಸಿಯಾವು? ಹಾಗಾಗಿ ಕಿಡಿ(ಗೇಡಿ)ಗಳೇ ಉತ್ತಮರು

ಎನಗಿಂತ ಕಿರಿಯರಿಲ್ಲ