ಸ್ತಬ್ಧವಾಯಿತು ಚಣವು!
-----------

ಬಟ್ಟಲಿನ ಬಿಳಿ ಕಟ್ಟೆಯೊಡೆದು
ದಿಟ್ಟತನದಲಿ ಅಲೆಯನೆಬ್ಬಿಸಿ
ಪುಟ್ಟೆದೆಯುಬ್ಬಿಸಿ ಅಬ್ಬರಿಸುವ
ನೋಟಕಿದೋ ಸ್ತಬ್ಧವಾಯಿತು ಚಣವು!

ಹದಿಬದೆಯ ಶಾಪದಲಿ ಕಲ್ಲಾದ
ಕಡಲ ಬಟ್ಟಲಲಿಳಿದ ರವಿಯೋ!
ಸ್ವಾತಿಯಲಿ ಚಿಪ್ಪೊಳಗಿಳಿದು ಕೆಂಪಾದ
ಮುಕ್ತ ಭಾವನೆಗಳ ಕವಿಯೋ!

ತುಟಿಗಿಟ್ಟ ಪಾನೀಯದಲಿ ಬಿದ್ದ
ಸಡಿಲ ಮೂಗುತಿಯ ಹರಳೋ!
ಹಸಿದೊಡಲ ಸೇರಿಸೆ ತಂದ
ಅತಿಬೆಲೆಯ ಹಣ್ಣ ತಿರುಳೋ!

ಚಣವದುವೆ ತೀರಿತ್ತು!
ಕಣವದುವೆ ಜಾರಿತ್ತು!
ಕಣಕಣವ ಚಣಚಣದಿ
ಕವಿಗಣ್ಣು ಹಿಡಿದಿತ್ತು!

-ನಿಮ್ಮ

ಬೆನಕ

ಕನ್ನಡಪುಟ.ಬ್ಲಾಗ್‍ಸ್ಪಾಟ್.ಕಾಂ.