ಬರೆಯಲು ಪ್ರಯತ್ನಿಸುವ ಎಲ್ಲರಿಗೂ ಮನಸ್ಸಿನಲ್ಲಿ 'ನೀವು ಬರೆದದ್ದು ಚೆಂದವಾಗಿದೆ' ಎಂದು ಹೇಳಿಸಿಕೊಳ್ಳಬೇಕೆಂಬ ಮಹದಾಸೆ ಇದ್ದೇ ಇರುತ್ತದೆ. ಕೆಲವರಿಗಂತೂ ಇದು ವಿಪರೀತ ಹೆಚ್ಚು. ಅಂತರ್ಜಾಲದಲ್ಲಿ ತಮ್ಮದೊಂದು ಮನೆ ಕಟ್ಟಿಕೊಳ್ಳುವುದು ದಿನೇ ದಿನೇ ಸುಲಭವಾಗುತ್ತಿರುವಂತೆಲ್ಲ ಈ ಸಹಜ ಬಯಕೆಗೊಂದು ಸಾಧನ ಲಭ್ಯ.

ನನ್ನ ಸ್ವಂತದ ಅನುಭವದಿಂದ ಇಷ್ಟು ಹೇಳಬಲ್ಲೆ:
ಹೊಸತಾಗಿ ಬರೆಯುವವರಿಗೆ ಅಂತಹ ಸಾಧನ ಮೊದಮೊದಲಿಗೆ ಸಾಕಷ್ಟು ಸಂತೋಷ, ತೃಪ್ತಿ ತಂದುಕೊಡಬಲ್ಲುದು. ತಮ್ಮದೊಂದು ಬ್ಲಾಗ್ ಎರಡು ಮೂರು ಕ್ಲಿಕ್ಕುಗಳಲ್ಲೇ ನಿರ್ಮಿಸಿ, ಅದರಲ್ಲೊಂದು ಲೋಕ ಕಂಡುಕೊಂಡು ತಮ್ಮ virtual ಸ್ನೇಹ ಸಮೂಹವೊಂದನ್ನು ನಿರ್ಮಿಸಿಕೊಂಡು ಸಂತೋಷಪಟ್ಟಿಕೊಳ್ಳುತ್ತಾರೆ. ಹೀಗೆ ಬರೆಯುವವರು ಒಂದು ಹದ ಕಂಡುಕೊಳ್ಳದಿದ್ದಲ್ಲಿ ಎಲ್ಲ ಆಸಕ್ತಿ, ಮತ್ತು initial excitement ದಿನೇ ದಿನೇ ಕಣ್ಮರೆಯಾಗುತ್ತ ಹೋಗುತ್ತದೆ. ಅದೇ ಕೆಲವು ಸ್ನೇಹಿತರು, ಬೋರಾಗುವ ಅದೇ ಚರ್ಚೆಗಳು ಬೇಸರ ತರಿಸುವ ತನಕ ನಡೆದಿರುತ್ತದೆ. ಕೊನೆಗೊಂದು ದಿನ ಆ ಪುಟ ಎಲ್ಲದರೊಂದಿಗೆ ಸೇರಿಹೋಗಿ ಮೂಲೆಯೊಂದರಲ್ಲಿ ಅದರ ಲೇಖಕನ ಗಮನವನ್ನೂ ಸೆಳೆಯದಂತಹ ಪರಿಸ್ಥಿತಿಯಲ್ಲಿ ಕಾಣದಂತಾಗುತ್ತದೆ.

ಮೊದಲ ಆಸಕ್ತಿ ಕಳಕೊಂಡ ನನ್ನಂತಹ ಕೆಲವರು ಸಮುದಾಯವೊಂದನ್ನು ಹುಡುಕಿಕೊಂಡು ಹೋಗುತ್ತಾರೆ. ಸಮುದಾಯದಲ್ಲಿ ಹೆಚ್ಚಿನ ಹೊಸ ಓದುಗರು, ಹೊಸ ಅಭಿಪ್ರಾಯಗಳು, ಹೊಸ ದೃಷ್ಟಿಕೋನಗಳು ಹಾಗೂ ಮುಖ್ಯವಾಗಿ ವೈವಿಧ್ಯ ಸಿಗುತ್ತವಷ್ಟೆ. ಆಸಕ್ತಿ ಮೂಡಿಸುವ ಚರ್ಚೆಗಾಗಿ ಟಿ ವಿ ಚ್ಯಾನಲ್ಲುಗಳನ್ನು ಬದಲಾಯಿಸಿದಂತೆ ಹೆಚ್ಚು ಹುಡುಕಬೇಕಿರುವುದಿಲ್ಲ. (ಹೀಗಿದ್ದೂ ಕೆಲವೊಮ್ಮೆ ಸಮುದಾಯಗಳೂ ಬೇಸರ ತರಿಸುವಷ್ಟು ನೀರಸವಾಗಬಹುದು (ಆರ್ಕುಟ್ ನೋಡಿದ್ದರೆ ನಿಮಗೆ ತಿಳಿದಿರುತ್ತದೆ). ಆದರೆ ಸಮುದಾಯಗಳಲ್ಲಿ ಬದಲಾವಣೆಯ ಗತಿ ಹೆಚ್ಚಿರುವುದರಿಂದ ಚೇತರಿಸಿಕೊಳ್ಳುವ, ಮತ್ತೊಮ್ಮೆ ಆಸಕ್ತಿದಾಯಕವಾಗುವ possibilityಯಂತೂ ಇರುತ್ತದೆ).

ಬ್ಲಾಗುಗಳನ್ನು ಬರೆಯಲು ಪ್ರಾರಂಭಿಸುವವರು ಹಲವು ಬಾರಿ ಬರೆಯಲು ಬೇರೇನೂ ಸಿಗದಂತಾಗಿ ತಮ್ಮ ದಿನನಿತ್ಯ ಜೀವನದ ಬಗ್ಗೆ, ದಿನೇ ದಿನೇ ಕುಕ್ಕುವ ವಿಷಯಗಳ ಬಗ್ಗೆ rant ಬರೆದುಕೊಳ್ಳೋದು ಸರ್ವೇ ಸಾಮಾನ್ಯ. ಹೀಗೆ ಬರೆದುಕೊಳ್ಳುವುದರಿಂದ ತಮ್ಮ ರೀತಿಯಲ್ಲೇ ಸೆಲೆಬ್ರಿಟಿ ಸ್ಟೇಟಸ್ ಕಂಡುಕೊಳ್ಳುತ್ತಾರೆ. ನಮ್ಮ ಅಮೇರಿಕದ ಸ್ನೇಹಿತರು ಇನ್ನೂ ಮುಂದು - ಜತೆಗಿರುವ ಸ್ನೇಹಿತೆಯರ ಬಗ್ಗೆ, ಹಳೆಯ ಸ್ನೇಹಿತೆಯೊಂದಿಗೆ ಟೂ ಬಿಟ್ಟು ಹೊಸ ಸ್ನೇಹಿತೆಯೊಂದಿಗೆ ಡೇಟಿಂಗ್ ಮಾಡುತ್ತಿರುವ ಬಗ್ಗೆ ಎಲ್ಲ ಸಾರಾಸಗಟು ಗೀಚಿಕೊಂಡಿರುತ್ತಾರೆ. ಟೈಮ್ಸ್ ಆಫ್ ಇಂಡಿಯಾದಲ್ಲಿ ನಟಶೀರೋಮಣಿಗಳ ಜೀವನದ ಚೂರು ಪಾರೂ ಮುಖಪುಟ ಅಲಂಕರಿಸುವ ಸಂಸ್ಕೃತಿಯ ಬಯಕೆಯುಳ್ಳವರಂತೆ. ಕೆಲವರು ಪ್ರಾರಂಭದಿಂದಲೇ ತಮ್ಮ ಜೀವನ ಚಿತ್ರವನ್ನು ಬರೆಯಲೆಂದೇ ಬ್ಲಾಗು ಬಳಸುತ್ತಾರೆ. ಅಂತವರಲ್ಲಿ ಹಲವರಿಗೆ ಸ್ನೇಹಿತರೊಂದಿಗಿನ ನಿಜವಾದ ಆಫ್ಲೈನ್ ಚರ್ಚೆ ಕಡಿಮೆ ಎಂದು ಹಲವರ ಅಂಬೋಣ. ನಿಜವೋ ಸುಳ್ಳೋ, ಎಂದೂ ಕಂಡರಿಯದ ಓದುಗರಲ್ಲಿ ಅವರು ತಮ್ಮ ಸ್ನೇಹಿತರನ್ನು ಕಂಡುಕೊಳ್ಳುವುದು ಪರಮ ಸತ್ಯ. ಓದುಗರಿಗೂ ದೂರದ ಬೆಟ್ಟದಂತಿರುವ ಜೀವನದ ಸ್ವಾರಸ್ಯ ಆಕರ್ಷಿಸದೇ ಇರದು.

*******

"been there, done that" ಎಂಬ ಪರಿಸ್ಥಿತಿಯಲ್ಲಿರುವವರಿಗೆ ಮಾತ್ರ ಬರೆಯುವುದೊಂದು ಅಭ್ಯಾಸ, ಬರವಣಿಗೆಯ ಮೂಲಕ ಅವರ ಅನುಭವಗಳನ್ನು, ತಿಳುವಳಿಕೆಯನ್ನು ಹೆಚ್ಚು ಜನರೊಂದಿಗೆ ಹಂಚಿಕೊಳ್ಳುವ ಮನಸ್ಸು. ಅಂತವರು ಬರೆಯಲು ಪ್ರಯತ್ನಿಸುವುದಿಲ್ಲ ನೇರ ಬರೆಯುತ್ತಾರೆ.

--
Check my Blog
Kannada wikipedia

"ಹೊಸ ಚಿಗುರು, ಹಳೆ ಬೇರು"