ಪಬನಜರವರೆ,

ತಾವು ತುಳುವಿಗಾಗಿ ಈಗಿರುವ ಕನ್ನಡ ಲಿಪಿಗೆ ಸೇರಿಸಬೇಕಾದ ಅಕ್ಷರಗಳ ಪಟ್ಟಿ ಮಾಡಿದ್ದೀರಿ. ಆದರೆ ಇದು ತುಳುವಿಗೆ ಮಾತ್ರ ಸೀಮಿತವಾಗಿರಬೇಕೆಂದೇನೂ ಇಲ್ಲ. ಕನ್ನಡ ಭಾಷೆಯ ಬಳಕೆಯಲ್ಲೂ ಈಗ ಕೆಲವು ಹೊಸ ವ್ಯಂಜನಗಳು, ಸ್ವರಗಳು ಸೇರಿಕೊಂಡಿವೆ. ಈಗ ಅವುಗಳಿಗಾಗಿ ಚಿಹ್ನೆಗಳನ್ನು ರೂಪಿಸಬೇಕಿದೆ. ಉದಾ: mat ನಲ್ಲಿರುವ ಸ್ವರಕ್ಕೆ ಕನ್ನಡದಲ್ಲಿ ಯಾವುದೇ ಚಿಹ್ನೆಯಿಲ್ಲ. ಮ್ಯಾಟ್ ಎಂದು ಸಾಮಾನ್ಯವಾಗಿ ಬರೆದು ಬಿಡುತ್ತೇವೆ. ಆದರಿದು ಸರಿಯಾದ ಉಚ್ಚಾರಣೆಯನ್ನು ಸೂಚಿಸುವುದಿಲ್ಲ. ಹಾಗೆಯೇ, fat ನಲ್ಲಿರುವ ವ್ಯಂಜನ f ಗೆ ಕೂಡ ಕನ್ನಡದಲ್ಲಿ ಚಿಹ್ನೆಯಿಲ್ಲ. ಫ ಬಳಸುತ್ತೇವಾದರೂ ಅದು ಸರಿಯಾದದ್ದಲ್ಲ. ಹಾಗೇ z ಕೂಡ. ಇವುಗಳಿಗೆ ಕನ್ನಡದಲ್ಲಿ ಆದಷ್ಟು ಬೇಗ ಚಿಹ್ನೆಗಳನ್ನು ಸೇರಿಸುವುದೊಳಿತು ಎಂಬುದು ನನ್ನ ಮತ. ಈಗ ಹೆಚ್ಚು ಹೆಚ್ಚು ಎರವಲು ಪದಗಳು ಕನ್ನಡದಲ್ಲಿ ಬಳಕೆಯಾಗುತ್ತಿರುವಾಗ, ಕನ್ನಡ ಲಿಪಿ ಈ ಹೊಸ ಸ್ವರ ವ್ಯಂಜನಗಳನ್ನೊಳಗೊಂಡು ಬೆಳೆದರೊಳಿತು.

ಯುನಿಕೋಡ್ ಚಾರ್ಟ್ ನೋಡಿದಾಗ ಈ ಕೆಲವು ಚಿಹ್ನೆಗಳು ಕಣ್ಣಿಗೆ ಬಿದ್ದವು. ಅವುಗಳ ಕೋಡ್, 0CE1, 0C8C. ಇವುಗಳ ಬಳಕೆ ಎಲ್ಲಿದೆ. ನನ್ನ ಗಮನಕ್ಕಂತೂ ಇವು ಬಂದಿಲ್ಲ. ಹಾಗೇ, ಈಗಿರುವ ಯುನಿಕೋಡ್ ಕೀಲಿಮಣೆಗಳಲ್ಲಿ 0CB1 ಇರುವುದಿಲ್ಲ. ಇದು ಒಂದು ಕೊರತೆಯೇ ಅಲ್ಲವೇ. ಕಗಪ ಕೀಲಿಮಣೆ ರೂಪಿಸಿದವರೂ ಇದರತ್ತ ಗಮನ ಹರಿಸದಿರುವುದು ಆಶ್ಚರ್ಯ.