ಓದಿ ಆಶ್ಚರ್ಯ ಪಟ್ರ ? ಈವೊತ್ತು ಯಾಹೂ ಗ್ರೂಪ್ಸ್ನಲ್ಲಿ 'ಕನ್ನಡ' ಪದವನ್ನು ಸರ್ಚ್ ಮಾಡಿದಾಗ ತುಳುನಾಡು ಅನ್ನೋ ಒಂದು ಗ್ರೂಪ್ ನೋಡಿದೆ. ಅದರ ಉದ್ದೇಶಗಳು, ತುಳು ಭಾಷೆಯನ್ನು ಕನ್ನಡದಿಂದ ರಕ್ಷಿಸುವುದು, ತುಳು ಲಿಪಿಯನ್ನು ಮಾತ್ರವೇ ಬಳಸುವುದು, ಉಡುಪಿ, ಕೊಡಗು, ದಕ್ಷಿಣ ಕನ್ನಡ, ಕಾಸರಗೋಡುಗಳನ್ನೊಳಗೊಂಡ ಪ್ರತ್ಯೇಕ ತುಳುನಾಡು ರಾಜ್ಯ ಸ್ಥಾಪನೆಗೆ ಶ್ರಮಿಸುವುದು.

ಇನ್ನೇನ್ರಪ್ಪ, ಇಲ್ಲಿವರೆಗೂ ನಾವು ಯಾರನ್ನು ನಮ್ಮ ಸೋದರರೆಂದು ಕೊಂಡಿದ್ದೆವೋ, ಈಗ ಅವರೇ ನಮ್ಮ ಬೆನ್ನಿಗೆ ಇರಿಯಲು ತಯಾರಿ ನಡೆಸಿದ್ದಾರೆ. ಈಗ ಸದ್ಯ ಈ ಗುಂಪಿನ ಸದಸ್ಯ ಸಂಖ್ಯೆ ೯೯. ಇನ್ನು ಇದೇ ರೀತಿ, ಕೊಂಕಣಿಗರು, ತೆಲುಗರು ಎದ್ದು ನಿಂತರೆ ಈಗಿರುವ ಕನ್ಡ ನಾಡು ಒಡೆದು ಛಿದ್ರವಾಗಿ ಅರ್ಧ ಗಾತ್ರಕ್ಕೆ ಇಳಿಯುತ್ತೆ.

ಆದ್ರೆ, ಅವರು ಹೇಳುವ ಹಾಗೇ, ನಿಜವಾಗಲೂ ಕನ್ನಡ ಭಾಷೆಯನ್ನು ಅವರ ಮೇಲೆ ಅನವಶ್ಯಕವಾಗಿ ಹೇರುತ್ತಿದ್ದೇವೆಯೇ...? ನನ್ನಲ್ಲೇ ಪ್ರಶ್ನೆ ಹುಟ್ಟಿಕೊಂಡಿದೆ.

ಪವನಜರವರು ತಿಳಿಸಿದಂತೆ, ತುಳು ಲಿಪಿಯಿಂದ ಮಲಯಾಳ ಲಿಪಿ ಹುಟ್ಟಿದೆಯೆಂಬುದು ಅಷ್ಟು ಸಮಂಜಸವಲ್ಲ. ಬದಲಿಗೆ ಮಲಯಾಳ ಲಿಪಿಯಿಂದ ತುಳು ಲಿಪಿ ಹುಟ್ಟಿಕೊಂಡಿರುವ ಸಾಧ್ಯತೆಗಳೇ ಹೆಚ್ಚು. ಏಕೆಂದರೆ, ಮಲಯಾಳ ಲಿಪಿಯು, ಗ್ರಂಥ ಲಿಪಿಯಿಂದ ಬೆಳೆದು ಬಂದದ್ದಾಗಿದೆ. ತಮಿಳು, ಮಲಯಾಳ, ಹಾಗೂ ಸಿಂಹಳ ಭಾಷೆಯ ಲಿಪಿಗಳು ಈ ಪ್ರಾಚೀನ ಗ್ರಂಥ ಲಿಪಿಯಿಂದ ಹುಟ್ಟಿದಂಥವು. ಮಲಯಾಳ ಲಿಪಿಯಲ್ಲಿರುವ ಅನೇಕ ಅಕ್ಷರಗಳು ತಮಿಳು ಅಕ್ಷರಗಳನ್ನೇ ಹೋಲುತ್ತವೆ. ಉದಾ: ಉ,ಊ,ಕ,ಜ,ಣ,ನ,ಥ,ವ,ಯ,ರ ಇತ್ಯಾದಿ.

ಹೀಗಿರುವಾಗ ಮಲಯಾಳ ಲಿಪಿ ತುಳು ಲಿಪಿಯಿಂದ ಬಂದಿದೆ ಎಂಬುದು ಅಷ್ಟು ಸೂಕ್ತವಲ್ಲ. ಇದರ ಬಗ್ಗೆ ಕೆಲವು ವರ್ಷಗಳ ಹಿಂದೆ ತುಳುನಾಡು ಹಾಗೂ ಮಲಯಾಳದ ಕೆಲವು ವಿದ್ವಾಂಸರಿಗೂ ವಾಗ್ವಾದ ನಡೆದದ್ದು, ಅದು ಪತ್ರಿಕೆಯಲ್ಲೂ ಪ್ರಕಟವಾದದ್ದೂ ನೆನಪಿದೆ.