ಮಹೇಶರೆ,
ನಿಜ, ಇದೇನು ಮೊದಲಲ್ಲ. ಈ ಹಿಂದೆ "ಉತ್ತರ ಧೃವದಿಂ", "ದೋಣಿ ಸಾಗಲಿ", "ಮೂಡಲ ಮನೆಯ ಮುತ್ತಿನ ನೀರಿನ"(ಈ ಹಾಡಿನ ಕಾಳಿಂಗ ರಾವ್‌ರವರದೇ ನನಗೆ ಸುಖ) ಎಲ್ಲ ಆಗಿವೆ. ಆದರೂ ಈಗೀಗ ಪದ್ಯದ ಮೂಲಾರ್ಥವನ್ನು ವಿಸ್ತರಿಸುವ ಬದಲು, ಅರ್ಥದ ಬಗ್ಗೆ ಅಸಡ್ಡೆ ಇರುವಂತಿದೆ. ಇತ್ತೀಚೆಗೆ ಸಂಗೀತಕ್ಕೆ ಲಭ್ಯವಿರುವ ತಾಂತ್ರಿಕ ಸವಲತ್ತುಗಳಿಂದಾಗಿ ಸದ್ದಿನಾಡಂಬರ ಹೆಚ್ಚಾಗಿ, ಹಾಡಿನ ಅರ್ಥ ಹಿಂದಕ್ಕೆ ಸರಿಯುತ್ತಿದೆಯಲ್ಲ ಅನಿಸುತ್ತಿದೆ. ಹಳೆಯದೆಲ್ಲ ಸುಂದರ ಎಂದು ಗೋಗರೆಯುತ್ತಿಲ್ಲ. ಆದರೆ ಈಗಿರುವ ತಾಂತ್ರಿಕ ಸವಲತ್ತನ್ನು indulgent ಆಗಿ ಬಳಸದೆ, ಉದ್ದೇಶ ಸಾಧನೆಗೆ ಬಳಿಸಿದರೆ ಖುಷಿಯಾಗುತ್ತದೆ. ಉದಾಹರಣೆಗೂ ಅಂಥ ಪ್ರಯೋಗಗಳು ನೆನಪಾಗದಷ್ಟು ವಿರಳ ಅನಿಸುತ್ತಿದೆ.
ಸುನೀಲರೆ,
ಏನನ್ನುತ್ತೀರೋ, ಮಲ್ಲಿಕಾರ್ಜುನ ಮನ್ಸೂರರ ವಚನಗಳಿಗಾಗಿ ಬೆಂಗಳೂರಿಗೆ ಬಂದಾಗ ಹುಚ್ಚನಂತೆ ಅಂಗಡಿ ಅಂಗಡಿಗೂ ಅಲೆದಿದ್ದೇನೆ. ಅವರ ಶಾಸ್ತ್ರೀಯ ಸಂಗೀತದ ಹಲವಾರು ಕ್ಯಾಸೆಟ್, ಸಿಡಿಗಳು ಸಿಗುತ್ತವೆ ಆದರೆ ವಚನಗಳದು ಮಾತ್ರ ಒಂದೇ ಒಂದು ಸಿಕ್ಕಿತು. "ಸಂಯುಕ್ತ ವಚನಗಳು" ಅಂತ. ಬೇರೆ ಬೇರೆ ಗಾಯಕರ ನಡುವೆ ಇವರ ಒಂದೆರಡು ವಚನಗಳು ಅಷ್ಟೆ. ಅದರಲ್ಲೂ ಈ "ನಾನೊಂದು ಕನಸ ಕಂಡೆ" ಇಲ್ಲ! ಆ ಹಾಡು ಆಕಾಶವಾಣಿಯವರ ಭದ್ರಮುಷ್ಠಿಯಲ್ಲಿ ಸಿಲುಕಿದೆ ಎಂದು ಕಾಣುತ್ತದೆ. ಅವರೇ ಅದನ್ನು ಬಿಡುಗಡೆ ಮಾಡಿದಂತೆ ಕಾಣುವುದಿಲ್ಲ. ನಿಮಗ್ಯಾರಿಗಾದರೂ ಕಂಡರೆ/ಸಿಕ್ಕರೆ ದಯವಿಟ್ಟು ತಿಳಿಸಿ. ಆ ಹಾಡಿನ ಬಗ್ಗೆ ಏನೋ ವ್ಯಾಮೋಹ ನನಗೆ. ಅದಕ್ಕೇ ಹಿಂಸೆಯಾಯಿತು ಅಂದೆ! ಸೀರಿಯಸ್ಸಾಗಿ ತಗೋಬೇಡಿ.