ಖಂಡಿತವಾಗಿಯೂ ದಲಿತರು ಅಷ್ಟೊಂದು ನಿಷ್ಠುರರಲ್ಲ. ರವಿಬೆಳಗರೆಯವರು ಕೇಳಿದಂತೆ "...ಆದಾಗ ಯಾರಾದರೂ ಮುಸ್ಲಿಮರನ್ನು ಪ್ರಶ್ನಿಸಿದರೇ?" ಎಂದು ದಲಿತರು ಯಾರನ್ನೂ ಕೇಳಲಿಲ್ಲ. ಇಲ್ಲದಿದ್ದರೆ ಮನುಧರ್ಮ ಶಾಸ್ತ್ರ ಭಾರತದ ಸಂವಿಧಾನವಾಗಬೇಕಿತ್ತು ಎಂದು ಹಲವು ಹೈಕೋರ್ಟ್ ಗಳ ನ್ಯಾಯಾಧೀಶರಾಗಿದ್ದ ರಾಮಾ ಜೋಯಿಸರು ಹೇಳಿದಾಗಾಗಲೀ, ಆಡ್ವಾಣಿ, ವಾಜಪೇಯಿಯಂಥವರು ಈ ಹೇಳಿಕೆಗೆ ಅಡಿ ಒತ್ತು ಸೇರಿಸಿದಾಗಾಗಲೀ, ನಮ್ಮನ್ನು 'ಒಂದು' ಮಾಡಲು ಹೊರಟಿರುವ ವಿಶ್ವ ಹಿಂದೂ ಪರಿಷತ್ ನ ಅಧ್ಯಕ್ಷ ಅಶೋಕ್ ಸಿಂಘಾಲ್ ದಲಿತರ ಪ್ರಾಣಕ್ಕಿಂತ ಗೋವಿನ ಪ್ರಾಣವೇ ಮುಖ್ಯ ಎಂದೂ ಮನು ಸ್ಮೃತಿಯನ್ನು ಹಾಡಿ ಹೊಗಳಿದಾಗಾಗಲೀ ನಾವು ರವಿ ಬೆಳಗರೆಯನ್ನಾಗಲೀ, ಭೈರಪ್ಪನವರನ್ನಾಗಲೀ ಚಿದಾನಂದಮೂರ್ತಿಯವರನ್ನಾಗಲೀ ಶೇಷಗಿರಿರಾಯರನ್ನಾಗಲೀ ನೀವೇಕೆ ಇದನ್ನು ಖಂಡಿಸುತ್ತಿಲ್ಲ ಎಂದು ಕೇಳಿಲ್ಲ. ಏಕೆಂದರೆ ಔರಂಗಜೇಬನೆಂಬ ರಾಜ ಮಾಡಿದ ತಪ್ಪಿಗೆ ಪ್ರಜಾಪ್ರಭುತ್ವ ರಾಷ್ಟ್ರದ ಪ್ರಜೆಗಳಾದ ಮುಸ್ಲಿಮರನ್ನು ಹೊಣೆಗಾರರನ್ನಾಗಿ ಮಾಡುವ ಇವರೆಲ್ಲರಲ್ಲೂ ಇರುವಂಥ ತಂತ್ರಗಾರಿಕೆ ನಮ್ಮಲ್ಲಿಲ್ಲ.
ರಮೇಶ್ ಸಮಗಾರ