ದಲಿತನಾಗಿ ನನಗನ್ನಿಸುವುದನ್ನು ಹೇಳಿದರೆ ನೀವು ಬೇಸರ ಪಡುವುದಿಲ್ಲ ಎಂದುಕೊಂಡೇ ಈ ಮಾತುಗಳನ್ನು ಬರೆಯುತ್ತಿದ್ದೇನೆ.
ತಥಾಕಥಿತ ಹಂದೂ ಧರ್ಮದ ಅಮಾನವೀಯತೆಯನ್ನು-ಇತಿಹಾಸದಲ್ಲಿರುವುದು ಮತ್ತು ವರ್ತಮಾನದಲ್ಲಿರುವುದೆರಡೂ ಸೇರಿ-ಮುಚ್ಚಿಡಲು, ದಲಿತರನ್ನು ನಿರಂತರವಾಗಿ ಶೋಷಿಸುವುದನ್ನು ಚರ್ಚಿಸದಂತೆ ತಡೆಯಲು ಈ ಮುಸ್ಲಿಂ ಭೂತವನ್ನು ನಮ್ಮೆದುರು ಇಡುತ್ತಿದ್ದೀರಿ ಎಂದು ಭಾವಿಸಿದರೆ ತಪ್ಪಿದೆಯೇ? ಈ ಹೊತ್ತಿನವರೆಗೂ ನಾನು ಮಾತನಾಡಿದ್ದೆಲ್ಲಾ ನನ್ನ ಸಮುದಾಯದ ಬಗ್ಗೆಯೇ. ಅದು ಅನುಭವಿಸುತ್ತಿರುವ ಸಮಸ್ಯೆಯ ಬಗ್ಗೆಯೇ. ಆದರೆ ನೀವು ಅದನ್ನು ಚರ್ಚೆಗೂ ಪರಿಗಣಿಸದೆ ಮತ್ತೆ ಇಸ್ಲಾಂನ ಸುತ್ತಲೇ ಸಂಚರಿಸುತ್ತಿರುವುದರ ಅರ್ಥವೇನು? ನಮ್ಮ ತಟ್ಟೆಯಲ್ಲಿ ಹೆಗ್ಗಣವೇ ಸತ್ತು ಬಿದ್ದಿರುವಾಗ ಪಕ್ಕದಲ್ಲಿರುವವನ ತಟ್ಟೆಯಲ್ಲಿರುವ ನೊಣದ ಕುರಿತೇಕೆ ಚರ್ಚೆ. ತಲಾಖ್ ನ ವಿಷಯವನ್ನೇ ಪರಿಗಣಿಸಿದರೂ ತಲಾಖ್ ನ ಪ್ರಮಾಣವೆಷ್ಟು? ನಿಮಗೆ ಪರಿಚಿತರಿರುವ ಎಷ್ಟು ಮುಸ್ಲಿಮರು ನಾಲ್ಕೈದು ಮದುವೆಯಾಗಿದ್ದಾರೆ ಎಂದು ಯೋಚಿಸಿ?

ಈ ಬಗೆಯ ಬ್ರಾಹ್ಮಿನಿಕಲ್ (ಜಾತಿ ಸೂಚಕವಲ್ಲ) ಡಿಸೈನ್ ಬಗ್ಗೆ ಅಂಬೇಡ್ಕರ್ ಬಹಳ ಹಿಂದೆಯೇ ಎಚ್ಚರಿಸಿದ್ದರು. ನೀವು ಮಾತನಾಡುತ್ತಿರುವುದೂ ಈ ಡಿಸೈನ್ ನ ಭಾಗದಂತೆಯೇ ಇದೆಯಲ್ಲವೇ? ಎಷ್ಟು ಮಂದಿ ಸವರ್ಣೀಯ ಹಿಂದೂಗಳು ತಮ್ಮ ಮಗಳು ದಲಿತನನ್ನು ಮದುವೆಯಾಗುವುದನ್ನು ಇಷ್ಟ ಪಡುತ್ತಾರೆ ಎಂದು ಹೇಳಿ? ನಗರೀಕೃತ ಪೊಲಿಟಿಕಲ್ ಕರೆಕ್ಟ್ ನೆಸ್ ಗಳನ್ನು ಬಿಟ್ಟು ಖುಲ್ಲಂ ಖುಲ್ಲ ವಿಷಯಕ್ಕೆ ಬನ್ನಿ.
ರಮೇಶ್ ಸಮಗಾರ