ಕಲ್ಪನಾ ಅವರಿಗೆ, ನಮಸ್ಕಾರ.

ಸರಿ. ಹೆಚ್ಚುಹೆಚ್ಚು ಪ್ರತಿಕ್ರಿಯೆಗಳಿಗೆ ನೀವು ಉತ್ತರಿಸುತ್ತಿದ್ದಂತೆ ನೀವೇನು ವ್ಯಕ್ತಪಡಿಸಹೊರಟಿದ್ದಿರಿ ಎಂದು ಸ್ವಲ್ಪಸ್ವಲ್ಪವಾಗಿ ತಿಳಿಯತೊಡಗಿದೆ.

ಪರವಾ ಇಲ್ಲ, ಹೊಸದಾಗಿ ಬ್ಲಾಗ್ ಬರೆಯಲಾರಂಭಿಸಿದ್ದೀರಷ್ಟೇ. ಕ್ರಮೇಣ ನಿಮ್ಮ ಯೋಚನಾಲಹರಿಗಳು ಅಚ್ಚುಕಟ್ಟಾಗಿ ಅಕ್ಷರರೂಪಕ್ಕಿಳಿಯುವುದು ಅಭ್ಯಾಸವಾಗುತ್ತದೆ. ಅದಕ್ಕಾಗಿ ಬರವಣಿಗೆಗೆ ಬಿಡುವು ಸಾರಲು ಮಾತ್ರ ಹೋಗಬೇಡಿ. ನೀವೇ ಹೇಳಿಕೊಂಡಂತೆ ಇನ್ನಷ್ಟು ಪ್ರಾತಿನಿಧಿಕ ಸಾಮಗ್ರಿಯನ್ನು ಓದಿಕೊಂಡು ನಿಮ್ಮ ಪ್ರಸ್ತುತ ವಿಚಾರವನ್ನು ಪುಷ್ಟೀಕರಿಸಿದರೆ ಒಳ್ಳೆಯದೇ. ನಾನು ಪಿಯುಸಿಯಲ್ಲಿ ಓದಿದ ಸಂಖ್ಯಾಶಾಸ್ತ್ರ (statistics) ಹೀಗೆ ಹೇಳುತ್ತದೆ: "The bigger the sample size is, more are the chances that it truely represents the entire population". ಬಹುಶಃ ಈ ಮಾತು ನಿಮಗೂ ಒಪ್ಪಿಗೆಯಿದೆ.

ಇಲ್ಲಿ ನಿಮ್ಮ ವಾದ ತಪ್ಪು ಎಂದಾಗಲೀ ಅಥವಾ ನೀವು ಹಾಗೆ ಅನ್ನಲೇಬಾರದು ಎಂದಾಗಲೀ ಉದ್ದೇಶವಲ್ಲ. ನಿಮ್ಮ ಮೂಲಲೇಖನ ತುಸು ಗೊಂದಲಮಯವಾಗಿತ್ತು, ತಡವರಿಕೆ ಇತ್ತು, ಅದನ್ನೊಂದಿಷ್ಟು ಬಿಡಿಸಿನೋಡಿ ನಿಮ್ಮ ಅಭಿಪ್ರಾಯಗಳನ್ನು ತಿಳಿದುಕೊಳ್ಳೋಣವೆಂಬ ಆಸಕ್ತಿಯಿಂದ ನಾನು ನಿಮಗೆ ಪ್ರತಿಕ್ರಿಯೆಗಳನ್ನು ಬರೆದದ್ದು. ಅವುಗಳಿಗೆಲ್ಲ ಉತ್ತರಿಸಿ ಈಗ ವಿಚಾರದಲ್ಲಿ ನೀವು ಹೆಚ್ಚು ಸ್ಪಷ್ಟತೆಯನ್ನು ತಂದಿರಿ; ನಿಮಗೆ ಅಭಿನಂದನೆಗಳು ಮತ್ತು ಧನ್ಯವಾದಗಳು.

ಇನ್ನು, ರಹೀ ಬಾತ್ feel good factorಕೀ. ಅದನ್ನು ನಾನು ’ಹಿತಾನುಭವ’ ಎನ್ನುತ್ತೇನೆ. ಮೂರು ವರ್ಷಗಳ ಹಿಂದೆ ಭಾರತದಲ್ಲಿ ಲೋಕಸಭಾ ಚುನಾವಣೆಗಳ ವೇಳೆ ಭಾ.ಜ.ಪ ದವರ ಸ್ಲೋಗನ್ ಅದೇ ಆಗಿತ್ತು - ಫೀಲ್ ಗುಡ್ ಫಾಕ್ಟರ್. ವೈಯಕ್ತಿಕವಾಗಿ ನನಗೆ ಫೀಲ್ ಗುಡ್ ಇಷ್ಟ. ಅಂತಹ ಸಾಮಗ್ರಿ ಓದಲಿಕ್ಕೆ/ ಕೇಳಲಿಕ್ಕೆ/ ನೋಡಲಿಕ್ಕೆ ಇಷ್ಟ. ಜೀವನ ಇರುವುದೇ ಸೆಲಬ್ರೇಟ್ ಮಾಡಲಿಕ್ಕೆ, ಸಣ್ಣಸಣ್ಣ ಸಂಗತಿಗಳಲ್ಲೂ ಸ್ವಾರಸ್ಯಸಂತೋಷಗಳನ್ನು ಕಂಡುಕೊಳ್ಳಲಿಕ್ಕೆ ಎಂದು ನಂಬಿದವನು ನಾನು. ನೀವು ಡಾ|ಗುರುಕಾಗಿನೆಲೆಯವರ, ಶಶಿಕಲಾ ಅವರ ಕಥೆಗಳು ಇಷ್ಟವಾಗುತ್ತವೆಂದು ತಿಳಿಸಿದಾಗ, ನಿಮಗೂ ಖುಶಿಯಾಗಿದೆಯೆಂದು ತಿಳಿದುಬಂದಾಗ ನಾನು ಸಂತಸ ವ್ಯಕ್ತಪಡಿಸಿದ್ದು ಅದೇ ಕಾರಣಕ್ಕೆ.

ಆದರೆ ಎಲ್ಲರಿಗೂ ಹಾಗೆಯೇ ಇರಬೇಕು/ಇರುತ್ತದೆಯೆಂದೇನೂ ಇಲ್ಲ. ನೀವು ಹೇಳುವುದು (ಅಥವಾ ಹೇಳಹೊರಟಿರುವುದು) ಸರಿಯೇ. ಇಲ್ಲಿನ ಬದುಕಿನಲ್ಲೂ ಗೋಳಿದೆ, ನೋವಿದೆ, ನರಕವಿದೆ. ಅದು ಒಂದು ಕಥೆಯ ರೂಪದಲ್ಲಿ ಓದಲಿಕ್ಕೆ ಸಿಕ್ಕರೆ ತನ್ನ ದನಿಗೊಂದು ರೂಪವಾಯ್ತಲ್ಲಾ ಎಂದು ಹಾತೊರೆಯುವ ಮನಗಳಿವೆ. ಅಂಥಾದ್ದರಲ್ಲಿ ಇವರೆಲ್ಲ ಸೋಗಲಾಡಿತನದ ವೈಭವೀಕರಣ ಮಾಡುತ್ತಿದ್ದಾರಲ್ಲಾ ಎಂದು ಹಿಡಿಶಾಪ ಹಾಕುವ ನೊಂದ ಜೀವಗಳು ಅನೇಕವಿವೆ.

ಅದಕ್ಕೇನು ಉಪಾಯ? ಬೇರೆಯವರು ಬರೆಯುವುದಿಲ್ಲವಾದರೆ ಹಾಳಾಗಿಹೋಗಲಿ, ನಾನೇ ಬರೆಯುತ್ತೇನೆ ಎಂದು ಹೊರಡಿ! ನೀವೇ ಒಂದು ಹೃದಯಸ್ಪರ್ಶಿ ಕಥೆಯನ್ನು ಬರೆಯಿರಿ. ದಟ್ಸ್‌ಕನ್ನಡದವರು ಯಾಕೆ ಪ್ರಕಟಿಸುವುದಿಲ್ಲ ನೋಡೋಣ. ಯುನಿಕೋಡ್ ಕನ್ನಡ ಟೈಪಿಂಗ್ ಹೇಗೂ ಅಭ್ಯಾಸಮಾಡಿಕೊಂಡಿದ್ದೀರಿ. ಕಥೆ ಬರೆಯಿರಿ. ಕಾಗುಣಿತ ತಪ್ಪುಗಳಿದ್ದರೆ ನಾನು ಸರಿಪಡಿಸಿಕೊಡಲು ಸಿದ್ಧನಿದ್ದೇನೆ, ಆದರೆ ಕಥೆ ಹೇಗಿದೆ ಎಂದು ಓದಿತಿಳಿಸಲು ಮಾತ್ರ ಹೇಳಬೇಡಿ. ಕಥೆ-ಕಾದಂಬರಿ ಓದೋದು not my cup of ಕಷಾಯ (or ರಾಗಿಮಾಲ್ಟ್) ಎಂದು ನಾನು ನಸುನಗುತ್ತಲೇ ಹೇಳುತ್ತೇನೆ.

ನಿಮ್ಮ ಬರವಣಿಗೆ ಮುಂದುವರಿಸಿ.

ಇತಿ

ಶ್ರೀವತ್ಸ ಜೋಶಿ