ಪಟವರ್ಧನರೆ,

ನನಗೆ ಕನ್ನಡ ಅಕ್ಷರಮಾಲೆಯ ಮೇಲೆ ಸಿಟ್ಟಿದೆ ಅಂತ ನನ್ನ ಯಾವ ಮಾತಿನಿಂದ ನಿಮಗನಿಸಿತು ಸ್ವಲ್ಪ ಹೆಕ್ಕಿ ತೋರಿಸುತ್ತೀರಾ? ಅಥವಾ ಸಂಸ್ಕೃತ-ಕನ್ನಡದ 'ಗುದ್ದಾಟ'ದ ಬಗ್ಗೆ ನನ್ನ ನಿಲುವೇನು ಅಂತ ಹೇಳುವ ಒಂದೇ ಒಂದು ಪದ ನೀವು ಹೆಕ್ಕಿದರೂ ಸಾಕು. (ಅಥವಾ ಈ ಗುದ್ದಾಟದ ಬಗ್ಗೆ ಚರ್ಚೆ ನಡೆಯುತ್ತಿರುವ ಕಟ್ಟೆಗೆ ಆಗಾಗ ನಾನು ಬಂದುಹೋಗುವುದೇ ಈ ಸಿಟ್ಟಿನ ಸಂಕೇತ ಅಥವಾ ಅದರ ಬಗ್ಗೆ ನನ್ನ ನಿಲುವೇನು ಅಂತ ಅದೇ ತೋರಿಸಿಬಿಡುತ್ತದೆ ಎಂದು ನೀವು ತೀರ್ಮಾನಿಸಿಬಿಟ್ಟಿದ್ದರೆ ನಾನೇನೂ ಮಾಡಲಾರೆ!)

ಸಂಪದದ ಕಟ್ಟೆ ಮೇಲೆ ಕೂತು ಪಟ್ಟಾಂಗ ಹೊಡೆಯಲು ಸಮಯವನ್ನು ಬೇರೆಲ್ಲಿಂದಲೋ ಕದ್ದು ತರಬೇಕು. ಹೀಗಿರುವಾಗ ಅನಿಸುವುದೆಲ್ಲವನ್ನೂ ಒಂದೇ ಬಾರಿ ಹೇಳಿಬಿಡುವುದು ಸಾಧ್ಯವಾಗುವುದಿಲ್ಲ. ಏನೋ ಯೋಚನೆ ಬಂದಾಗ ಗುರುತು ಹಾಕಿಕೊಳ್ಳುವಂತೆ ಇಲ್ಲಿ ಬಂದು ನುಡಿಮುತ್ತುಗಳನ್ನು ಉದುರಿಸಿ ಹೊರಟುಹೋಗುತ್ತೇವೆ. ಅದರಲ್ಲೂ ಯಾರಾದರೂ ಅಡ್ಡಹಾದಿಗೆ ಎಳೆದರೆ ಅಲ್ಲಿಂದ ತಪ್ಪಿಸಿಕೊಂಡು ಮತ್ತೆ ಹಾದಿ ಹಿಡಿಯುವಷ್ಟರಲ್ಲಿ ಮತ್ತಷ್ಟು ಸಮಯ ದಂಡವಾಗಿಬಿಟ್ಟಿರುತ್ತದೆ. ಇರಲಿ.

ವಿಷಯಕ್ಕೆ ಬರೋಣ. Phonetic symbols ಬಗ್ಗೆ ನೀವು ಪ್ರಸ್ತಾಪ ಮಾಡಿದ್ದು ನನ್ನ (ಎಲ್ಲರ) ಸಮಯ ಉಳಿಸಿತು! ಈ ಚರ್ಚೆಗೆ ಭವಿಷ್ಯವಿರುವುದೇ ಹೌದಾದರೆ ಮುಂದುವರೆಯಲು ಸರಿಯಾದ ಹಾದಿ ತೋರಿಸಿದ್ದೀರಿ.

ಸದ್ಯಕ್ಕಿಷ್ಟೆ,

ಹೆಣೆ