ನೀವು ಹೇಳುತ್ತಿರುವುದನ್ನೆಲ್ಲಾ ನಿಜವೆಂದೇ ಒಪ್ಪಿ ಕ್ರಮ ಕೈಗೊಂಡರೂ ನಕ್ಸಲೀಯರನ್ನು ಮಲೆನಾಡಿನಿಂದ ಹೊರಗಟ್ಟಲು ಸಾಧ್ಯವೇ?

 

ಆಂಧ್ರಪ್ರದೇಶ ನೀವು ಹೇಳಿರುವ ಎಲ್ಲಾ ಕೆಲಸಗಳನ್ನೂ ಚಾಚೂ ತಪ್ಪದೆ ಮಾಡಿತು. ಬಹಳಷ್ಟು ಜನರನ್ನು ಪೊಲೀಸರು ಕೊಂದರು. ಪೊಲೀಸರನ್ನು ನಕ್ಸಲೀಯರು ಕೊಂದರು. ಕೊನೆಗೇನಾಯಿತು. ಹಾವು ಸಾಯಲೂ ಇಲ್ಲ ಕೋಲು ಮುರಿಯಲೂ ಇಲ್ಲ. ಹಿಂಸೆ, ಪ್ರತಿಹಿಂಸೆ ಮತ್ತು ಹಿಂಸೆ ಅದಕ್ಕೆ ಪ್ರತಿಹಿಂಸೆ ಎಂಬ ಚಕ್ರವ್ಯೂಹವನ್ನು ಬೇಧಿಸುವ ಒಂದು ಉಪಾಯ ಕಂಡುಕೊಳ್ಳುವ ಅಗತ್ಯವಿದೆ. ಅದಕ್ಕೆ ಸಮಸ್ಯೆಯನ್ನು ಪರಿಹರಿಸ ಹೊರಡುವವರಿಗೆ ಅದರ ಸಮಗ್ರ ಗ್ರಹಿಕೆ ಬೇಕು. ನಮ್ಮ ಸರಕಾರಗಳೆಲ್ಲವೂ ಯುದ್ಧಕಾಲದ ಶಸ್ತ್ರಾಭ್ಯಾಸ ನಡೆಸುವಂಥವು. ರಾಜಕೀಯ ಪಕ್ಷಗಳೂ ಅಷ್ಟೇ. ನಕ್ಸಲ್ ವಾದಕ್ಕೆ ರಾಜಕೀಯವಾದ ಪ್ರತಿಕ್ರಿಯೆಯ ಅಗತ್ಯವೂ ಇದೆ ಎಂದು ಮನಗಾಣದೆ ತಮ್ಮದೇ ಆದ ಭ್ರಷ್ಟಾಚಾರದ ಕೂಪದೊಳಗೆ ಮುಳುಗಿ ಹೋಗಿವೆ. 

 

ಜನರ ಸಹಕಾರ ಬೇಕು ಎಂದು ಹೇಳುವುದು ಸುಲಭ. ಮಲೆನಾಡಿನ ಪೊಲೀಸರನ್ನು ಹೇಗೆ ನಂಬಿಯಾರು? ಸಹಕಾರ ಕೊಟ್ಟವರ ಗತಿ ಏನಾಯಿತು? ಜನ ಸಾಮಾನ್ಯ ಈಗ ರಾಜನ ಭಯ ಮತ್ತು ರಾಜನಿಲ್ಲದ ಭಯ ಎರಡನ್ನೂ ಅನುಭವಿಸಬೇಕಾಗಿದೆ. ಕುದುರೆಮುಖ ಅರಣ್ಯ ಪ್ರದೇಶದ ಹಳ್ಳಿಗಳವರಿಗೆ ಒಂದು ಕಡೆ ನಕ್ಸಲೀಯರ ಭಯ ಮತ್ತೊಂದು ಕಡೆ ಪೊಲೀಸರ ಭಯ. ಈವರೆಗೂ ಅವರಿಗಿದ್ದ ಸಾಮಾಜಿಕ, ಆರ್ಥಿಕ, ರಾಜಕೀಯ ಸಮಸ್ಯೆಗಳು ಈ ಬಗೆಯ ತೊಂದರೆಯನ್ನಂತೂ ತಂದಿರಲಿಲ್ಲ. ಮಲೆನಾಡಿನ ತುಂಬಾ ಶೋಷಕರೇ ತುಂಬಿದ್ದಾರೆಂಬ ಅರ್ಥದಲ್ಲಿ ಮಾತನಾಡುವ 'ಕ್ರಾಂತಿಕಾರಿ'ಗಳಲ್ಲಿ ಬಹುತೇಕರಿಗೆ ಮಲೆನಾಡಿನಲ್ಲಿ ಕೇಳಿದಷ್ಟು ಕೂಲಿಕೊಟ್ಟರೂ ಕೆಲಸಕ್ಕೆ ಜನ ಸಿಗದ ಸ್ಥಿತಿ ಇದೆ ಎಂಬುದರ ಅರಿವಿಲ್ಲ. 

 

ಕೀಟನಾಶಕ ಸಿಂಪಡಿಸಿ ಬೆಳೆಗೆ ಹತ್ತಿದ ಕೀಟಗಳನ್ನು ಓಡಿಸುವಂತೆ ನಕ್ಸಲೀಯರನ್ನು ಕೊಂದು ಮುಗಿಸಬೇಕೆಂದು ವಾದಿಸುವವರಿಗೆ ನಕ್ಸಲೀಯರಿಗೆ ಮಲೆನಾಡಿನಲ್ಲಿ ಒಂದು ನೆಲೆ ಕಲ್ಪಿಸಿಕೊಟ್ಟ ಗಿರಿಜನರ ಅಭದ್ರತೆಯ ಅರಿವೂ ಇಲ್ಲ. ರಾಷ್ಟ್ರೀಯ ಉದ್ಯಾನವನ ಯೋಜನೆ ಎಂಬ ಗೌಡ್ಲು ಮತ್ತು ಮಲೆಕುಡಿಯ ಸಮುದಾಯದವರಲ್ಲಿ ಸೃಷ್ಟಿಸಿದ ಅಭದ್ರತೆಯನ್ನು 1995ರಿಂದ 2000ದವರೆಗಿನ ಅವಧಿಯಲ್ಲಿ (ಈ ಅವಧಿಯಲ್ಲಿ ನಾನು ದಕ್ಷಿಣ ಕನ್ನಡ, ಉಡುಪಿ ಮತ್ತು ಚಿಕ್ಕಮಗಳೂರು ಜಿಲ್ಲೆಗಳಲ್ಲಿ ವರದಿಗಾರನಾಗಿದ್ದೆ) ನಾನೇ ಕಣ್ಣಾರೆ ಕಂಡಿದ್ದೇನೆ. ತಾವು ಕೃಷಿ ಮಾಡುತ್ತಿರುವ, ವಾಸಿಸುತ್ತಿರುವ ಭೂಮಿಗೆ ಸಂಬಂಧಿಸಿದಂತೆ ಅವರಲ್ಲಿ ದಾಖಲೆಗಳೇ ಇಲ್ಲ. ಸರಕಾರದ ಪುನರ್ವಸತಿ ಪ್ಯಾಕೇಜ್ ಗಳೆಲ್ಲವೂ ಭೂದಾಖಲೆಗಳನ್ನು ಹೊಂದಿದ್ದವರಿಗೆ ಮಾತ್ರ. ದಾಖಲೆಯೇ ಇಲ್ಲದೆ ಯಾವುದೋ ಕಾಲದಲ್ಲಿ ಯಾರಿಗೋ ಗೇಣಿಕೊಡುತ್ತಿದ್ದೆವು ಎಂದು ಹೇಳಿಕೊಂಡು ಬದುಕು ಕಟ್ಟಿಕೊಂಡಿರುವವರ ಗತಿಯಾದರೂ ಏನು?

 

ಈ ಕಾಡಿನ ಮಕ್ಕಳಿಗಾಗಿ ಸರಕಾರ ಸ್ಥಾಪಿಸಿರುವ ಗಿರಿಜನ ಆಶ್ರಮ ಶಾಲೆಗಳಲ್ಲಿ ಒಂದೆರಡಾದರೂ ಸರಿಯಾಗಿದ್ದಿದ್ದರೆ, ಗಿರಿಜನರ ಮಕ್ಕಳು ಆಧುನಿಕ ವಿದ್ಯಾಭ್ಯಾಸವನ್ನು ಪಡೆಯುವುದನ್ನು ಖಚಿತ ಪಡಿಸಿಕೊಂಡಿದ್ದರೆ ಕಳೆದ ಐವತ್ತು ವರ್ಷಗಳ ಅಭಿವೃದ್ಧಿ ಯಾತ್ರೆಯಲ್ಲಿ ಈ ಗಿರಿಜನರಲ್ಲಿ ಬಹುಪಾಲು ಜನ ಊರಜನರಾಗಿಬಿಡುತ್ತಿದ್ದರು. ಗಿರಿಜನಾಭಿವೃದ್ಧಿ ಯೋಜನೆಗಳೆಲ್ಲಾ ತಾಲೂಕು ಕೇಂದ್ರಗಳಾಚೆಗೆ ಹೋಗದೇ ಉಳಿದದ್ದರ ಪರಿಣಾಮವನ್ನು ಈಗ ಎದುರಿಸುತ್ತಿದ್ದೇವೆ. ಈಗಲೂ ಕಾಲ ಮಿಂಚಿಲ್ಲ. ಕುದುರೆಮುಖ ಅರಣ್ಯ ವ್ಯಾಪ್ತಿಯಲ್ಲಿ ಬರುವ ಪ್ರತೀ ಕುಟುಂಬದ ಮಕ್ಕಳಿಗೆ ಉತ್ತಮ ಗುಣಮಟ್ಟದ ಆಧುನಿಕ ಶಿಕ್ಷಣವೊಂದನ್ನು ಖಚಿತ ಪಡಿಸಿದರೆ ಸಮಸ್ಯೆಯಲ್ಲಿ ಅರ್ಧದಷ್ಟು ಪರಿಹಾರವಾಗುತ್ತದೆ. ಬದುಕಿನ ಕುರಿತ ಭರವಸೆಯೊಂದಿದ್ದರೆ ಮನುಷ್ಯ ಸುಲಭದಲ್ಲಿ ಬಂದೂಕು ಕೈಗೆತ್ತಿಕೊಳ್ಳುವವರನ್ನು ಒಪ್ಪುವುದಿಲ್ಲ. ಇದರ ಜತೆಗೆ ಕಾನೂನು ಪಾಲನೆಗೆ ಪೊಲೀಸರು ಪ್ರಾಮಾಣಿಕ ಪ್ರಯತ್ನ ನಡೆಸಿದರೆ ಅರ್ಥವಿದೆ.

ಇಸ್ಮಾಯಿಲ್ ನನ್ನ ಬ್ಲಾಗ್: http://ismail.in