ಹೊಸ ಕನ್ನಡ ಕೀಬೋರ್ಡ್ ಬಂತಂತೆ

ಸಂಪದದಲ್ಲಿ ಹೊಸತು! | Sign up | Login | Font Help

ಹೊಸ ಕನ್ನಡ ಕೀಬೋರ್ಡ್ ಬಂತಂತೆ

March 17, 2006 - 1:34pm — honnung

ಇದೀಗ ಗೊತ್ತಾಯಿತು ಈ ಸುದ್ದಿ. ಕನ್ನಡದಲ್ಲಿ ಹೊಸ ಕೀಲಿಮಣೆ ಬಂದಿದೆಯಂತೆ.

ಇದನ್ನು ಹೆಲ್ವೆಟ್ ಪ್ಯಾಕರ್ಡ್ ಕಂಪನಿಯವರು ತಯಾರಿಸಿದ್ದಾರೆ. ಇದರ ವಿಶೇಷವೆಂದರೆ ಇದರಲ್ಲಿ ಪೆನ್ ಬಳಕೆ ಇದೆಯಂತೆ. ವ್ಯಂಜನಗಳಿಗಾಗಿ ಬಟನ್ ಗಳು ಇದ್ದು, ಪೆನ್ ಬಳಸಿ ಅವನ್ನು ಕಾಗುಣಿತ ಮಾಡಬಹುದಂತೆ. ಹೇಗೋ ಗೊತ್ತಿಲ್ಲ. ನಾವು ಎರಡೂ ಕೈಯಿಂದ ಕುಟ್ಟುತ್ತಿದ್ದರೆ ಪೆನ್ ಹೇಗೆ ಸಮಂಜಸವಾಗಿ ಬಳಸಬಹುದು? ಇಲ್ಲವೆ ಬರೀ ಒಂದೇ ಕೈಯಿಂದ ಬಟನ್ ಒತ್ತಿ ಮತ್ತೊಂದು ಕೈಯಿಂದ ಪೆನ್ ಉಪಯೋಗಿಸಬಹುದು. ಏನಾದರು ಆಗಲಿ, ಸರಳವಾಗಿ ಬಳಸುವಂತಿದ್ದರೆ ಸಾಕು.

ಅಬ್ಬಾ! ಇದರ ಬೆಲೆ ಹೆಚ್ಚಾಯಿತೇನೊ ಅನ್ನಿಸುತ್ತೆ. ಒಂದು ಕೀಬೋರ್ದಿಗೆ ಬರೀ 2000 ರೂಪಾಯಿಗಳು! ಅಲ್ಲದೆ ಇದಕ್ಕಾಗಿ ಬೇರೆ ತಂತ್ರಾಂಶ ಬಳಸಬೇಕಾಗಿ ಬರಬಹುದು. ನೋಡೋಣ, ಕಂಪ್ಯೂಟರೆನಲ್ಲಿ ಭಾರತೀಯ ಭಾಷೆಗಳನ್ನು ತರುವ ಈ ಪ್ರಯತ್ನ ಸಫಲವಾಗುವುದೆ ಎಂದು. ಯಾರಾದರು ಈ ಕೀಲಿಮಣೆಯನ್ನು ನೋಡಿದರೆ/ಬಳಸಿದರೆ ನಿಮ್ಮ ಅನಿಸಿಕೆಯನ್ನು ಮರೆಯದೆ ತಿಳಿಸಿ.

ಸುದ್ದಿ, ಸಮಾಚಾರ

March 17, 2006 - 5:46pm — pavanaja

ಉ: ಹೊಸ ಕನ್ನಡ ಲೇಖನಿಮಣೆ

ಮೊದಲನೆಯದಾಗಿ -ಅದು ಕೀಲಿಮಣೆ (ಕೀಬೋರ್ಡ್) ಅಲ್ಲ. ಬದಲಿಗೆ ಅದೊಂದು ಲೇಖನಿಮಣೆ. ಡಿಜಿಟೈಸರ್ ನೋಡಿರಬಹುದು. ಅದರಲ್ಲಿ ಒಂದು ಪ್ಯಾಡ್ ಮತ್ತು ಪೆನ್ನು (ಲೇಖನಿ) ಇರುತ್ತವೆ. ಎಚ್‌ಪಿ ಲ್ಯಾಬ್‌ನವರು ತಯಾರಿಸಿರುವ ಲೇಖನಿಮಣೆಯಲ್ಲೂ ಸುಮಾರಾಗಿ ಹಾಗೆಯೇ ಇದೆ. ಇದರ ಕಾರ್ಯವಿಧಾನ ಸ್ವಲ್ಪ ವಿಚಿತ್ರ ಅನ್ನಿಸಬಹುದು. ಎಲ್ಲ ವ್ಯಂಜನ, ಸ್ವರ, ಸ್ವರ ಚಿಹ್ನೆ ಮತ್ತು ಒತ್ತುಗಳ ರೂಪಗಳು (ಅಥವಾ ಅಕ್ಷರಭಾಗಗಳು) ಪರದೆಯಲ್ಲಿ ಕಾಣುತ್ತವೆ. ನಿಮಗೆ ಬೇಕಾಗ ಅಕ್ಷರಭಾಗವನ್ನು ನೀವು ಲೇಖನಿಯನ್ನು ಅದಕ್ಕೆಂದೇ ಇರುವ ಪ್ಯಾಡ್ ಮೇಲೆ (ಅಥವಾ ಲೇಖನಿಯ ಇರವನ್ನು ಅರ್ಥೈಸಿಕೊಳ್ಳಬಹುದಾದ ಸ್ಥಳದಲ್ಲಿ ಅಂದರೆ ಮೇಜಿನ ಮೇಲೆ) ಕುಟ್ಟಿ ಆಯ್ಕೆ ಮಾಡಬೇಕಾಗುತ್ತದೆ. ಅನ್ನ ಎಂಬ ಪದವನ್ನು ರೂಪಿಸಲು ನೀವು ಮೊದಲು ಅ ಅಕ್ಷರದ ಮೇಲೆ ನಂತರ ನ ಅಕ್ಷರ ನಂತರ ನ ಅಕ್ಷರದ ಒತ್ತಿನ (ಅಕ್ಷರಭಾಗ) ಮೇಲೆ ಪೆನ್ನಿನಿಂದ ಕುಟ್ಟಿ ಆಯ್ಕೆ ಮಾಡಬೇಕು.

ಈ ವಿಧಾನವನ್ನು ಬಳಸಲು ಸ್ವಲ್ಪ ತರಬೇತಿ ಅಗತ್ಯ. ಭಾಷೆಯಲ್ಲಿ ನಾವು ಅಕ್ಷರ, ಪದಗಳನ್ನು ಜೋಡಿಸುವ ಸಹಜ ರೂಪದಲ್ಲಿ ಇಲ್ಲಿ ಅಕ್ಷರ, ಪದಗಳ ಸೃಷ್ಟಿ ಇಲ್ಲ. ಇದು online handwriting recognition ಅಲ್ಲ.

ಬಹುಶಃ, ಎಚ್‌ಪಿ ಲ್ಯಾಬ್ಸ್‌ನಲ್ಲಿ ಕೆಲಸ ಮಾಡುತ್ತಿರುವ, ಈ ಲೇಖನಿಮಣೆಯ ವಿನ್ಯಾಸಕ್ಕಾಗಿ ದುಡಿದಿರುವ ಹಾಗೂ ಸಂಪದದ ಸದಸ್ಯರಾಗಿರುವ ಪ್ರಶಾಂತ ಪಂಡಿತರು ಆಫಿಶಿಯಲ್ ಮಾಹಿತಿ ನೀಡಬಹುದು.

ಸಿಗೋಣ,
ಪವನಜ
-----------
Vishva Kannada
Think globally, Act locally

March 17, 2006 - 8:26pm — ಪ್ರಶಾಂತ.ಪಂಡಿತ

ಅಫಿಶಿಯಲ್ ಮಾಹಿತಿ

ಪವನಜರು ಹೇಳಿದಂತೆ ಇದೊಂದು ಲೇಖನಿಮಣೆ (ಅವರು ಆರಂಭಿಕ ಹಂತದಲ್ಲಿ ಇದನ್ನು ನೋಡಿದ್ದಾರೆ). ಇದರ ಚಿತ್ರವನ್ನು Electronics For You ಪತ್ರಿಕೆಯಲ್ಲಿ ನೋಡಬಹುದು. ಪ್ಯಾಡಿನ ಮೇಲೆ ವ್ಯಂಜನಗಳು ಹಾಗು ಸ್ವರಗಳ ಲೇಔಟ್ ಇರುತ್ತದೆ. ಲೇಖನಿಯಿಂದ ಕುಟ್ಟುವ ಮೂಲಕ ಅವುಗಳನ್ನು ಆಯ್ದುಕೊಳ್ಳಬಹುದು. ಕೊಂಬು, ದೀರ್ಘ, ಸುಳಿ, ತಲಗಟ್ಟು ಮುಂತಾದವನ್ನು ಬೇಕಾದ ವ್ಯಂಜನದ ಮೇಲೆ ಬರೆಯುವ ಮೂಲಕ ಕಾಗುಣಿತ/ಸಂಯುಕ್ತಾಕ್ಷರಗಳನ್ನು ಪಡೆಯಬಹುದು. ಲೇಖನಿ ಇರುವುದರಿಂದ ಸಹಜವಾಗಿ ಒಂದೇ ಕೈಯನ್ನು ಉಪಯೋಗಿಸಬೇಕು (ಕಾಗದದ ಮೇಲೆ ಬರೆಯುವ ಹಾಗೆ). ಇದರಿಂದ ಬರವಣಿಗೆಯ ವೇಗ ಕುಂಠಿತವಾಗುವುದೆಂಬ ಅನುಮಾನ ಸಹಜ. ಈವರೆಗೆ ನಮ್ಮ ಪರೀಕ್ಷೆಯಿಂದ ಕಂಡುಕೊಂಡ ವೇಗ ನಿಮಿಷಕ್ಕೆ ಸುಮಾರು ೧೮-೨೦ ಪದಗಳು. ಈ ವೇಗವನ್ನು ಐದು ನಿಮಿಷದ ಪರಿಚಯ ಹಾಗು ಸುಮಾರು ಅರ್ಧ ದಿನದ ಬಳಕೆಯಿಂದ ಸಾಧಿಸಬಹುದು. ಹತ್ತೂ ಬೆರಳುಗಳನ್ನು ಬಳಸುವ ನುರಿತ typistನ ವೇಗ ಸಹಜವಾಗಿಯೇ ಹೆಚ್ಚಾಗಿರುತ್ತದೆ. ಆದರೆ ಈ ವೇಗ ಸಾಧಿಸಲು ಹಲವಾರು ತಿಂಗಳ ಸತತ ಅಭ್ಯಾಸ ಅಗತ್ಯ. Pen ಮತ್ತು Keyboardನ ವೇಗದ ಹೋಲಿಕೆಯೇ ಅಪ್ರಸ್ತುತ. ಅಂದ ಹಾಗೆ, ನಾನು ಸಂಪದಕ್ಕೆ ಬರೆವಾಗಲೆಲ್ಲ ನಿರ್ಮಾಣ ಹಂತದಲ್ಲಿದ್ದ ಈ ಉಪಕರಣವನ್ನೇ ಬಳಸುತ್ತಿದ್ದೆ. ಈಗ ಪೂರ್ಣಗೊಂಡ product ಲಭ್ಯವಿದೆ. ಸಧ್ಯಕ್ಕೆ Windows ಆವೃತ್ತಿ ಮಾರುಕಟ್ಟೆಯಲ್ಲಿ ದೊರೆಯಲಿದ್ದು Linux ಆವೃತ್ತಿಯು ಕೆಲ ತಿಂಗಳಲ್ಲಿ ಲಭ್ಯವಾಗಲಿದೆ. ಸಧ್ಯಕ್ಕೆ ಇಷ್ಟು ಮಾಹಿತಿ ಸಾಕೇನೋ.