ಮಿತ್ರರೇ,
ಚಿದಂಬರ ರಹಸ್ಯ ಎಂದರೆ ಮುಖ್ಯವಾಗಿ ಎರಡು ಅರ್ಥಗಳಿವೆ:
೧.ಚಿದಂಬರದ ದೇಗುಲದ ರಹಸ್ಯ
೨.ಎಂದಿಗೂ ಬಗೆಹರಿಯದ, ಬಿಡಿಸಲಸಾಧ್ಯವಾದ ರಹಸ್ಯ

೧.ಚಿದಂಬರವೆಂದರೆ - ಚಿತ್ + ಅಂಬರ = ತಿಳಿ + ಆಕಾಶ = 'ಆಕಾಶವನ್ನು ತಿಳಿಯುವುದು ಹೇಗೆಂಬ' ರಹಸ್ಯ.

ತಮಿಳುನಾಡಿನ ಚಿದಂಬರಂ ಎಂಬ ಸ್ಥಳದಲ್ಲಿರುವ ಶಿವದೇವಾಲಯ ಇತಿಹಾಸ ಪ್ರಸಿದ್ಧವಾದುದು. ಪರಮೇಶ್ವರನ ಐದು ಮುಖಗಳನ್ನು ಪಂಚಭೂತಗಳಿಗೆ ಹೋಲಿಸಿ ಸುಮಾರು ಚೋಳರ ಕಾಲದಲ್ಲಿ ನಿರ್ಮಿತವಾದ ಪ್ರಸಿದ್ಧ ಐದು ದೇವಾಲಯಗಳಲ್ಲಿ ಇದೂ ಒಂದು. ಈ ದೇಗುಲದ ಅಂಶವಾದ 'ಆಕಾಶತತ್ವ'ವನ್ನು ಆರಾಧಿಸಲೆಂದು ದೇಗುಲದ ಗರ್ಭಗುಡಿಯಲ್ಲಿ ಯಾವ ಪ್ರತಿಮೆಯೂ ಇಡಲ್ಪಟ್ಟಿಲ್ಲವೆನ್ನುತ್ತಾರೆ. ಈ 'ನಿರಾಕಾರ ಬ್ರಹ್ಮ'ವನ್ನು ಸಾಕಾರ ಪರಮಶಿವನೆಂದು ಕಾಣುವ ಬಗೆಯೇ ಇಲ್ಲಿನ 'ರಹಸ್ಯ'! ಅರ್ಥಾತ್ ಇಲ್ಲದ್ದನ್ನು ಇದೆಯೆಂದೂ, ಇರುವುದೆಲ್ಲವೂ ಇಲ್ಲವೆಂದೂ ತಿಳಿಯಲೆತ್ನಿಸಿದಾಗ ಹೇಗಾಗುವುದೆಂದು ಕಾಣುವ ನಿಗೂಢತೆಯೇ ಈ 'ಚಿದಂಬರ ರಹಸ್ಯ'.

೨.ಚಿದಂಬರವೆಂದರೆ - ಚಿತ್ + ಅಂಬರ = ತೆರೆ + ವಸ್ತ್ರ = ತೆಳುವಾದ ತೆರೆಯ ವಸ್ತ್ರದಿಂದ ಮುಚ್ಚಲ್ಪಟ್ಟ ರಹಸ್ಯ.

ಅದೇ ಚಿದಂಬರ ದೇವಾಲಯದಲ್ಲಿ ಕಾಣಲಾಗದ 'ಆಕಾಶ'ವನ್ನು ತೆರೆಯಿಂದ ಮುಚ್ಚಿ, ಅದರ ಮುಂಭಾಗದಲ್ಲಿ ತಾಂಡವನೃತ್ಯವನ್ನಾಡುವ ರುದ್ರನ 'ನಟರಾಜ' ಪ್ರತಿಮೆಯನ್ನು ಸ್ಥಾಪಿಸಲಾಗಿದೆ. ಈ ಸಾಕಾರ ನಟರಾಜನ ಹಿಂಬದಿಯ ತೆರೆಯ ಮರೆಯ ನಿರಾಕಾರದ ರಹಸ್ಯವೇ 'ಚಿದಂಬರ ರಹಸ್ಯ'.
ಕಾಲಾಂತರದಲ್ಲಿ ಇದೇ ನುಡಿಗಟ್ಟು ಜನಜನಿತವಾಗಿ, ಯಾವುದೇ ತಿಳಿಯಲಸಾಧ್ಯ ವಿಷಯವಿದ್ದರೂ, ತೆರೆ-ಮರೆಯ ಕತೆಯಾಗಿದ್ದರೂ ಅದನ್ನು ರೂಢಿಯಿಂದ 'ಚಿದಂಬರ ರಹಸ್ಯ' ಎನ್ನುತ್ತಾರೆ.

ನಿಮ್ಮವ

ಬೆನಕ