ಈ ವಿಷಯವಾಗಿ, ಅನಂತಮೂರ್ತಿಯವರು ಈ ದಿನದ ಪತ್ರಿಕೆಗಳಲ್ಲಿ ವರದಿಯಾಗಿರುವಂತೆ ಅವುಗಳನ್ನು ಎಂಜಲು ಪತ್ರಿಕೆಗಳೆಂದು ಲೇವಡಿ ಮಾಡಿದ್ದಾರೆ.

ಈ ಅನುವಾದಿತ ಪತ್ರಿಕೆಗಳ ಮೇಲೆ ನನ್ನಲ್ಲೇನು ವಿಶೇಷವಾದ ಕಾಳಜಿ ಇಲ್ಲ. ಆದರೆ ಒಂದೇ ಒಂದು ಪ್ರಶ್ನೆ, ಇಷ್ಟು ವರ್ಷ ಯಾವುದೇ ತಕರಾರಿಲ್ಲದೆ ನಡೆದುಕೊಂಡು ಬಂದ,
೧. ಅನುವಾದಿತ ಸಾಹಿತ್ಯವನ್ನು ಎಂಜಲು ಸಾಹಿತ್ಯ ಎನ್ನಬಹುದೇ ?
೨. ಅನುವಾದ ಅಕಾಡೆಮಿಯನ್ನು ಎಂಜಲು ಅಕಾಡೆಮಿ ಎನ್ನಲಾಗುತ್ತದೆಯೇ ?

ಈ ಎಂಜಲು ಸಾಹಿತ್ಯ, ಅಕಾಡೆಮಿಗಳನ್ನು ಕುರಿತು, ಸಾಮಾನ್ಯ ಓದುಗರಿಗೆ, ಯಾವ ರೀತಿಯ ಸಮರ್ಥನೆ ಸಿಗಬಲ್ಲದು.

ಕನ್ನಡದ ಓದುಗರು ಇಂಗ್ಲಿಷ್ ನಿಂದ ಅನುವಾದಿತವಾದ ದಿನಪತ್ರಿಕೆಯನ್ನು ಓದಬೇಕೆಂದಾಗ ಬೇಸರವಾಗುವುದು ಸಹಜ.  ಆದರೆ ಈ ಕೆಲವು ವಿಷಯಗಳನ್ನು ಕುರಿತು ಆಲೋಚಿಸೋಣ.

೧. ದೇಶ-ವಿದೇಶಗಳ ವಾರ್ತೆಯನ್ನು ಸಂಗ್ರಹಿಸಲು ಮತ್ತು ಅವುಗಳ ವಿಶ್ಲೇಷಣೆ ಮಾಡಿಸಿ ಲೇಖನ ಬರೆಸಲು ಅಗತ್ಯವಾದ ಸಂಪನ್ಮೂಲಗಳು ಕನ್ನಡ ಪತ್ರಿಕೆಗಳಿಗೆ ಇದ್ದಂತೆ ತೋರುವುದಿಲ್ಲ.

೨. ಕಾರಣ ಏನೇ ಇರಲಿ, ಕನ್ನಡ ಪತ್ರಿಕೆಗಳಲ್ಲಿ ಇಂಥ ಗಂಭೀರ ಬರೆಹಗಳು ಕಡಿಮೆಯಾಗುತ್ತಿವೆ. ಐ.ಏ.ಎಸ್., ಕೆ.ಏ.ಎಸ್. ಮುಂತಾದ ಪರೀಕ್ಷೆಗಳನ್ನು ತೆಗೆದುಕೊಳ್ಳುವ ನನ್ನ ವಿದ್ಯಾರ್ಥಿಗಳು ಪಡುವ ಪಾಡನ್ನು ನಾನೇ ನೋಡಿದ್ದೇನೆ. ಅಲ್ಲಿ ಅಪರಾಧ, ಹುಸಿ ಮನರಂಜನೆ ಮತ್ತು ಪ್ರಚಾರ ರೂಪದ ಬರಹಗಳನ್ನು ಓದಿ ನಿಟ್ಟುಸಿರು ಬಿಟ್ಟಿದ್ದೇನೆ.

೩. ಈಗ ಕನ್ನಡದಲ್ಲಿ ಬರುತ್ತಿರುವ ಅನ್ಯದೇಶೀಯವಾದ ಮಾಹಿತಿಗಳು ಕೂಡ, ಇಂಗ್ಲಿಷ್ ಪತ್ರಿಕೆಗಳು ಮತ್ತು ಇಂಟರ್ ನೆಟ್ ನಲ್ಲಿ ದೊರೆಯುವ ಮಾಹಿತಿಗಳ ಸಂಗ್ರಹಿತವಾದ ಅನುವಾದವೇ ಆಗಿರುತ್ತದೆ.

೪. `ಟೈಮ್ಸ್ ಆಫ್ ಇಂಡಿಯಾ' ಮತ್ತು `ದಿ ಹಿಂದೂ'ಗಳು ಸೇರಿದಂತೆ ಎಲ್ಲ ಪತ್ರಿಕೆಗಳೂ ಬೆಂಗಳೂರು ಆವೃತ್ತಿಯನ್ನು ಪ್ರಕಟಿಸುತ್ತಿವೆ .

೫. ಇತರ ಇಂಗ್ಲಿಷ್ ಪತ್ರಿಕೆಗಳ ಬಗ್ಗೆ ನಾನು ಏನೂ ಹೇಳಲಾರೆ. ಆದರೆ, ಹಿಂದೂ ಪತ್ರಿಕೆಯಲ್ಲಿ ಬರುವ ಎಲ್ಲ ಸುದ್ದಿ ಮತ್ತು ವಿಶ್ಲೇಷಣೆಗಳು ಕೇವಲ ಕನ್ನಡ ಬರುವ ಓದುಗರಿಗೆ ದೊರೆತರೆ, ಬಹಳ ಅನುಕೂಲವಾಗುವುದೆಂದು ನನ್ನ ಗ್ರಹಿಕೆ.

೬. ನಾವು ಸಂಬಂಧಪಟ್ಟವರ ಮೇಲೆ ಒತ್ತಡ ತಂದು ಅನುವಾದಿತ ಪತ್ರಿಕೆಯಲ್ಲಿ ಕನ್ನಡ ಸಂಸ್ಕೃತಿಗೆ ಮೀಸಲಾದ, ಅನುವಾದವಲ್ಲದ ಕೆಲವು ಪುಟಗಳು ಇರಬೇಕೆಂದು ಒಪ್ಪಿಸಬಹುದು.

೭. ಇಂಥ ಪೈಪೋಟಿಯಿಂದ ಕನ್ನಡ ಪತ್ರಿಕೆಗಳ ಮಟ್ಟವೂ ಹೆಚ್ಚಬಹುದು. ಆದರೆ ಅವುಗಳಿಗೆ ಧಕ್ಕೆ ಬರದಂತೆ ನೋಡಕೊಳ್ಳುವ ಹೊಣೆಯು ನಮ್ಮದೂ ಹೌದು.

೮. ಈ ವಿಷಯದ ಬಗ್ಗೆ ಇರಬಹುದಾದ ಸೂಕ್ಷ್ಮಗಳನ್ನು ಸಂಪದದಲ್ಲಿಯೇ ಪತ್ರಿಕೋದ್ಯಮದ ಮಿತ್ರರು ಮತ್ತು ಮಾಧ್ಯಮಗಳ ವಿದ್ಯಾರ್ಥಿಗಳು ನೀಡಿದರೆ ಚೆನ್ನಾಗಿರುತ್ತದೆ.

S.Raghavendra Rao

ರಿಮೇಕ್ ಪತ್ರಿಕೆ ನಮೆಗೆಲ್ಲರಿಗೂ ಬೇಡದಿರಬಹುದು, ಆದರೆ ಬೆನೆಟ್ ಎಂಡ್ ಕೋಲ್-ಮನ್ ಸಂಸ್ಥೆಗೆ ಬೇಕೆನ್ನಿಸುತ್ತಿದೆ - ಕರ್ನಾಟಕದ ಇನ್ನಷ್ಟು ಕನ್ನಡ ದಿನಪತ್ರಿಕೆ ಓದುಗರನ್ನು ತನ್ನತ್ತ ಸೆಳೆಯಲು. ನೆನಪಿರಲಿ, ಕೆಲವೇ ವರ್ಷಗಳ ಹಿಂದೆ ಡೆಕ್ಕನ್ ಹೆರಾಲ್ಡ್ ಕರ್ನಾಟಕದ ಕಿಂಗ್ ಆಗಿತ್ತು. ಈಗ ಅದು ಸಾಯುತ್ತಿದೆ. ಟೈಮ್ಸ್ ಆಫ್ ಇಂಡಿಯಾದ ಬೆಂಗಳೂರು ಆವೃತ್ತಿ ಎಲ್ಲಾ ತರಹದ ಆ(ಕಪ)ಟಗಳನ್ನು ಆಡಿ ಈಗ ಕರ್ನಾಟಕದ ನಂಬರ್ ಒನ್ ಆಂಗ್ಲ ದೈನಿಕ. ಈಗ ಬೆನೆಟ್ ಎಂಡ್ ಕೋಲ್-ಮನ್ ಕರ್ನಾಟಕದ ಉಳಿದ ಕನ್ನಡ ದಿನಪತ್ರಿಕೆಗಳನ್ನು ಮಲಗಿಸಲು ಹೊರಟಿದೆ.

ತನ್ನ ಸುಪರ್ದಿಯಲ್ಲಿರುವ ಉಶಾ ಕಿರಣದೊಂದಿಗೆ ಹೇಗೆ ಬೇಕಾದರೂ ಪ್ರಯೋಗ ಮಾಡುವ ಅಧಿಕಾರ ಬೆನೆಟ್ ಎಂಡ್ ಕೋಲ್-ಮನ್ ಗೆ ಇದೆ. ಆಂಗ್ಲ ಪತ್ರಿಕೆ ಓದುಗರು ಟೈಮ್ಸ್ ಆಫ್ ಇಂಡಿಯಾವನ್ನು ಸ್ವೀಕರಿಸಿದರು ಎಂಬ ಮಾತ್ರಕ್ಕೆ, ಕನ್ನಡ ದಿನಪತ್ರಿಕೆ ಓದುಗರು ಅದರ ನಕಲನ್ನು ಸ್ವೀಕರಿಸಬೇಕೆಂದಿಲ್ಲವಲ್ಲ. ಈಗಲೂ ಅಂಗ್ಲ ದಿನಪತ್ರಿಕೆಗಳು ಸುದ್ದಿಯನ್ನು ವಿವರ ಮಾಡುವ ಶೈಲಿಗೆ ಮತ್ತು ಕನ್ನಡ ದಿನಪತ್ರಿಕೆಗಳು ಸುದ್ದಿ ವಿವರಿಸುವ ಶೈಲಿಗೆ ಅಜಗಜಾಂತರ ವ್ಯತ್ಯಾಸವಿದೆ.