ನಾನು ಮುಂಗಾರು ಮಳೆಯಲ್ಲಿ ಮಿಂದದ್ದು, Renovate ಆಗಿರುವ ಈಶ್ವರಿ ಚಿತ್ರಮಂದಿರದಲ್ಲಿ, ೬:೩೦ಕ್ಕಿದ್ದ ಷೋಗೆ ನಾವು ೫:೩೦ಗೆ ಹೋದರೆ, ನಮಗೆ ಬಾಲ್ಕನಿ ಟಿಕೇಟು ಬ್ಲಾಕಿನಲ್ಲಿಯೂ ಸಿಕ್ಕಿರಲಿಲ್ಲ. ೨ನೇ ಕ್ಲಾಸು ೬೦ರೂ ಇತ್ತು. ಸರಿ ಇದರ ಸಹವಾಸವೇ ಬೇಡ ಅಂತ, ರಾತ್ರಿ ೯:೩೦ ಷೋಗೆ ಹೋದೆವು. ಆಶ್ಚರ್ಯವೆಂದರೆ ಈಶ್ವರೀ ಥಿಯೇಟರಿನ ಆವರಣದಲ್ಲಿಯೇ ಪೋಲೀಸ್ ಸ್ಟೇಷನ್ ಇದೆ

ಸರಿ ಇನ್ನು ಮೂಲ ಪ್ರಶ್ನೆಗೆ ಬರುತ್ತಾ, ಬ್ಲಾಕಿನಲ್ಲಿ ಟಿಕೇಟು ತೊಗೊಳ್ಳೋದು ಸರಿಯೇ ತಪ್ಪೇ ಎನ್ನುವುದಕ್ಕೆ ಒಂದೇ ಮಾತಿನ ಉತ್ತರ ಬೇಕೆಂದರೆ, ನನ್ನ ಉತ್ತರ ಅದು ತಪ್ಪು, ಅದೊಂದು ಸಾಮಾಜಿಕ ಅಪರಾಧ. ಆದರೆ ಬೆತ್ತಲೆ ನಾಡಿನಲ್ಲಿ, ಬಟ್ಟೆ ಹಾಕಿದವನೇ ನಗಪಾಟಲಿಗೀಡಾಗುವನು ಎಂಬ ತತ್ವವನ್ನು ಅರಿತಿರುವ ನನ್ನ ಮನಸ್ಸು ಈ ಸೂತ್ರಗಳನ್ನು ನೆಚ್ಚಿಕೊಂಡು ಕೆಲಸ ಮಾಡುತ್ತದೆ.

೧. ಅಪ್ಪಿತಪ್ಪಿಯೂ ಹಿಂದಿ ಮತ್ತು ಇಂಗ್ಲೀಷ್ ಸಿನಿಮಾಗಳಿಗೆ ನಾನು ಬ್ಲಾಕಿನಲ್ಲಿ ದುಡ್ಡು ಸುರಿಯುವುದಿಲ್ಲ. ಕೆಲವೊಮ್ಮೆ ಬರುವ ಒಳ್ಳೆಯ ಹಿಂದಿ ಮತ್ತು ಇಂಗ್ಲೀಷ್ ಸಿಸಿನಿಮಾಗಳನ್ನು ನೋಡಲೇಬೇಕೆನಿಸಿದಾಗ, ಟಿಕೇಟು ಸಿಕ್ಕಿದರೆ ಸಂತೋಷ, ಇಲ್ಲವಾದರೆ, ೨೦-೩೦ರೂಗಳನ್ನು ನೀಡಿ ಡಿ.ವಿ.ಡಿ ಪ್ರಿಂಟ್ ತಂದು ನೋಡಬಹುದು.

೨. ಒಳ್ಳೆಯ ಚಿತ್ರಗಳು ಬಂದಾಗ, (ಒಳ್ಳೆಯ ಚಿತ್ರಗಳೆಂದರೆ ಬರೇ ಕಲಾತ್ಮಕ ಚಿತ್ರಗಳಲ್ಲ ಎಂದು ನಂಬಿದ್ದೇನೆ) ಕೆಲವೊಮ್ಮೆ ಓದಿ ಓದಿ ಬೇಸರವಾದಾಗ ಅಥವಾ ಗೆಳೆಯರೆಲ್ಲರೂ ಒಟ್ಟಿಗೆ ಸೇರಿದಾಗ ಅಥವಾ ಬಳಗದವರೆಲ್ಲರೂ ಒಟ್ಟಿಗೆ ಸೇರಿ ಕನ್ನಡ ಸಿನಿಮಾ ನೋಡಲು ಹೋದಾಗ, ಬ್ಲಾಕಾದರೂ ಪರವಾಗಿಲ್ಲ ಕೆಲವೊಮ್ಮೆ ನೋಡಿ ಬರುತ್ತೇನೆ(ವೆ). ನಾನು ಅಪರಾಧದಲ್ಲಿ ಭಾಗಿಯಾಗುತ್ತಿದ್ದೇನೆ ಎಂಬ ಅರಿವಿದ್ದರೂ, ಬೇಸರವಾದರೂ, ಒಂದು ಕಾರಣಕ್ಕೆ ಸಂತೋಷವಾಗುತ್ತದೆ. ಕನ್ನಡದಿಂದ (ಕನ್ನಡವೆಂದರೆ ಬರೇ ನುಡಿಯಲ್ಲ ಎಂದು ನಂಬಿದ್ದೇನೆ) ದುಡ್ಡು ಸಂಪಾದನೆಯಾಗುವುದಿಲ್ಲ ಎಂಬು ಮಾತು ಸಂಪದದಲ್ಲೇ ಬಂದಿತ್ತು. ಆ ಮಾತು ಎಷ್ಟು ಪೊಳ್ಳು, ನಿರಾಧಾರ, ನಿರರ್ಥಕ ಮತ್ತು ನಿರಾಶಾವಾದದ ಸಂಕೇತ ಎಂಬುದನ್ನು ತಿಳಿದು ಮನಸ್ಸಿಗೆ ತುಂಬಾ ಹಿತವೆನಿಸುತ್ತದೆ.