ಆಯೋಗದ ಅತೀ-ಅತಿ

ತೋಳ್ಬಲದ ಬೆದರಿಕೆಗೆ ಇಂದು ಮತದಾರ ಮಣಿಯಬೇಕಾದ ಪರಿಸ್ಥಿತಿ ಇದೆ ಎಂದು ನನಗನಿಸುವುದಿಲ್ಲ. ನಮ್ಮದು ಗುಪ್ತ ಮತದಾನ ವ್ಯವಸ್ಥೆ ಆಗಿರುವುದರಿಂದ ಮತದಾರ ಯಾರಿಗೆ ಮತ ಹಾಕಿದ್ದಾನೆ ಎಂದು ಸ್ಪಷ್ಟವಾಗಿ ಯಾರಿಗೂ ಗೊತ್ತಾಗಲು ಸಾಧ್ಯವಿಲ್ಲ. ತೋಳ್ಬಲ ಬಳಸಿ ಮತದಾರರನ್ನು ಬೆದರಿಸದಂತೆ ಇಂದು ಚುನಾವಣ ಆಯೋಗ ಹಂತ ಹಂತಗಳಲ್ಲಿ ಭಾರೀ ಭದ್ರತಾ ಪಡೆಗಳನ್ನು ನಿಯೋಜಿಸಿ ಬಹಳ ಒಳ್ಳೆಯ ಕೆಲಸ ಮಾಡುತ್ತಿದೆ. ಇದರಿಂದಾಗಿ ತೋಳ್ಬಲದ ಮೂಲಕ ಮತದಾರರನ್ನು ಬೆದರಿಸುವ ಪರಿಸ್ಥಿತಿ ಹೋಗಿದೆ ಎಂದು ನನ್ನ ಭಾವನೆ. ಈಗ ಇರುವ ಸಮಸ್ಯೆ ಎಂದರೆ ಮತದರರೆ ಭ್ರಷ್ಟರಾಗಿರುವುದು. ಹಣ, ಹೆಂಡ ತೆಗೆದುಕೊಂಡು ವೋಟು ಹಾಕುವವರು ಇರುವವರೆಗೆ ಹಣ, ಹೆಂಡ ಕೊಟ್ಟು ಓಟು ಹಾಕಿಸಿಕೊಳ್ಳುವವರೂ ಇರುತ್ತಾರೆ. ಹೀಗಾಗಿ ನಿರ್ಲಜ್ಜ, ನಿಷ್ಕ್ರಿಯ ಶಾಸಕಾಂಗ ರೂಪುಗೊಳ್ಳಲು ಮತದಾರರೇ ಕಾರಣ. ಇದನ್ನು ತಡೆಯಲು ಚುನಾವಣ ಆಯೋಗ ಎಷ್ಟೇ ಬಿಗಿ ಕ್ರಮ ತೆಗೆದುಕೊಂಡರೂ ಸಾಧ್ಯವಿಲ್ಲ. ಹಣ, ಹೆಂಡ ಇತ್ಯಾದಿ ಆಮಿಷಗಳಿಗೆ ಬಗ್ಗದೆ ಮತದಾರರು ಮತದಾನ ಮಾಡುವ ಜಾಗೃತಿ ನಮ್ಮ ಜನರಲ್ಲಿ ಬರದೆ ಹೋದರೆ ಇದನ್ನು ಕಾನೂನುಗಳಿಂದ ತಡೆಯಲು ಬ್ರಹ್ಮನೇ ಬಂದರೂ ಸಾಧ್ಯವಿಲ್ಲ ಎನಿಸುತ್ತದೆ. ಯೋಗ್ಯ ವ್ಯಕ್ತಿ ಕಣದಲ್ಲಿ ಇಲ್ಲ, ಹಾಗಾಗಿ ಯಾರೋ ಒಬ್ಬ ಅಯೋಗ್ಯ ವ್ಯಕ್ತಿಗೆ ನಾವು ಮತ ಹಾಕುತ್ತೇವೆ ಎಂಬುದೂ ಅಷ್ಟು ಸಮಂಜಸವಲ್ಲ. ಕೆಲವೊಮ್ಮೆ ಅತ್ಯಂತ ಯೋಗ್ಯ ವ್ಯಕ್ತಿ ಕಣದಲ್ಲಿ ಇದ್ದರೂ ಮತದಾರರು ಅವರನ್ನು ಠೇವಣಿ ಕಳೆದುಕೊಳ್ಳುವಂತೆ ಮಾಡಿರುವ ಉದಾಹರಣೆಗಳೂ ಸಾಕಷ್ಟಿವೆ. ನಮ್ಮ ಜನರಲ್ಲಿ ಸಾಮೂಹಿಕ ರಾಜಕೀಯ ಜಾಗೃತಿ ರೂಪುಗೊಂಡಿಲ್ಲ. ಜಾತಿ ಆಧಾರದಲ್ಲಿ ಮತ ಹಾಕುವುದೂ ನಮ್ಮ ಪ್ರಜಾಪ್ರಭುತ್ವ ವ್ಯವಸ್ಥೆ ಕೆಡಲು ಕಾರಣ. ಜಾತಿಯ ಆಧಾರದಲ್ಲಿ ಮತ ಹಾಕುವುದೂ ಒಂದು ರೀತಿಯಲ್ಲಿ ಭ್ರಷ್ಟಾಚಾರವೇ. ಇದರಿಂದಾಗಿಯೇ ಜಾತಿ ರಾಜಕೀಯದ ಪಾಳೆಗಾರಿಕೆ ರೂಪುಗೊಳ್ಳಲು ಕಾರಣವಾಗಿದೆ.