ನಾನು ನಾಲ್ಕು ವಾರಗಳ ಹಿಂದೆ, ಯಶವಂತ ಸರದೇಶಪಾಂಡೆಯವರು ನಡೆಸಿಕೊಟ್ಟ, ರಾಶಿಚಕ್ರ ಎಂಬ ಪ್ರಯೋಗ ನೋಡಿಬಂದಿದ್ದೆ. ಆ ಕಾರ್ಯಕ್ರಮ ನನಗೇನು ಅಷ್ಟು ಹಿಡಿಸದಿದ್ದರೂ, ಕೊನೆಯಲ್ಲಿ ಏನೋ ಗದ್ದಲವಾದಾಗ, ಸರದೇಶಪಾಂಡೆ "ಕೌಂಟ್ನಾಗಿ ಕಟ್ಟಿ ಇಟ್ಕೊಂಡಗ್ ಇಟ್ಕೋರೀ. ಕೌಂಟು ಅಂದ್ರೆ ಏನು ಅಂತ ನಮ್ ಧಾರಾವಾಡ್ ಮಂದೀನ್ ಕೇಳಿ" ಎಂದಿದ್ದರು. ನನಗೆ ಈ ಕೌಂಟು ಅಂದರೆ ಏನು ತಿಳಿಯಲಿಲ್ಲ. ಆದರೆ ಕಳೆದ ಭಾನುವಾರ, ನಾನು ಮೈಸೂರು ಪ್ರವಾಸಕ್ಕೆ ಹೋಗಿ ಹಾಗು ಅಲ್ಲಿ ಮೃಗಾಲಯಕ್ಕೆ ಭೆಟ್ಟಿ ಕೊಟ್ಟ ಮೇಲೆ ಇದರ "ಓವಿ" ಮರ್ಮ ತಿಳಿಯಲು ಸಾಧ್ಯವಾಯಿತು.

ಮೈಸೂರು ಝೂನ ಕೊನೆಯಲ್ಲಿ ಕಾಣಸಿಗುವದು ಹಾವು, ಎಮು, ಬಾತುಕೋಳಿ, ಆಮೆ, ಮೊಸಳೆ ಮುಂತಾದವು. ಈ ಕೊನ್ಕೊನೆಗೆ ಕೆಲವೆಡೆ ಗಟ್ಟಿಯಾದ ಕಬ್ಬಿಣದ ಚೈನು ಅಂತ ನಾವೇನು ಹೇಳ್ತೀವಿ ಅವುಗಳನ್ನು ನೇತು ಹಾಕಿದ್ದಾರೆ. ಇವುಗಳನ್ನು ಬಳಸಿಕೊಂಡು ನಾವು ಮುನ್ನಡೆಯಬೇಕು. ಝೂನಲ್ಲಿ ನಮ್ಮೊಡನೆ ಹೆಜ್ಜೆಹಾಕುತ್ತಿದ್ದ ಒಬ್ಬರು, "ಅದ್ಯಾಕ್ ಕಬ್ಬಿಣದ ಕೌಂಟ್ ನೇತ್ಹಾಕ್ಯಾರೋ, ನಡೀಲಿಕ್ ಭಾಳ್ ತ್ರಾಸ್ ಆಗ್ತೈತಿ ಎಂದರು. ಆ ಊ ಅತ್ತಿಯ (ಹಿಂದ ಆಂಟಿ, ಅಂಕಲ್ ಇಲ್ಲದಿದ್ದಾಗ ಎಲ್ಲರನ್ನೂ ಅತ್ತಿ ಮಾವ ಎನ್ನುವ ಪರಿಪಾಠವಿತ್ತಂತೆ) ಮಾತು ಕೇಳಿದ ಮೇಲೆ ಕೌಂಟು ಎಂದರೆ ಚೈನು, ಸಲಾಕೆ ಎಂಬರ್ಥ ಇರಬಹುದು ಎಂದೆನಿಸಿತು.

ಸಂಪದದಲ್ಲಿರುವ ಗೆಳೆಯರಿಗೆ ಈ ಕೌಂಟು ಪದದ ಬಗ್ಗೆ ಏನಾದರೂ ಹೆಚ್ಚು ತಿಳಿದಿದೆಯೇ ?